Aqtoty Raıymqulova otandastaryn qazaq kınosy kúnimen quttyqtady.
QR Mádenıet jáne sport mınıstri Aqtoty Raıymqulova Qazaqstan halqyn kıno kúnimen quttyqtady, dep habarlaıdy Almaty-akshamy.kz.
«Qurmetti dostar! Qadirli kınogerler!
Sizderdi 12 qyrkúıek – qazaq kınosy kúnimen shyn júrekten quttyqtaımyn!
Kıno – mádenıet pen ónerdiń kósh basynda turǵan, aýdıtorıasy tórtkúl dúnıeni tórine otyrǵyzǵan aýqymdy sala. Ǵumyry ǵasyrmen ólshenetin qazaq kınematografıasy alǵashqy qarlyǵashy «Amangeldiden» bastap osy kúnge sheıin kórermenge túrli týyndylar tartý etip keledi», -deıdi mınıstr.«Ár kınonyń ýaqyt keńistigindegi alar ornyn aıqyndaıtyn, bylaısha aıtqanda taǵdyryn sheshetin qudiret – ol qalyń kórermen ekeni sózsiz. Bizdiń elimizde búgingi kıno talabyna jaýap bere alatyn, kópshiliktiń talǵam údesinen shyqqan fılmder qatary jyl ótken saıyn artyp kele jatqany qýantady.
Shynaıy oqıǵa jelisimen túsirilgen, babalar danalyǵyn dáriptegen, atalar amanatyn arqalaǵan tarıhı týyndylarmen qatar kózi qaraqty ár adamdy nemquraıdy, jaıbaqarat qaldyrmaıtyn, áleýmettik máselelerdiń ózektiligin júrekke jetkizip, tolǵandyratyn otandyq týyndylar bedeldi halyqaralyq festıválderde júldege ıe bolyp, álemdik kınogerlerdiń joǵary baǵasyn alyp jatyr. Aldyńǵy aǵa býynnyń izin basyp, ózindik órnegin qalyptastyryp kele jatqan jas mamandar shoǵyry qalyptasty.
Memleket kınematografıa salasyna turaqty qoldaý kórsetýdi jalǵastyra beredi. Elimizdegi kıno naryqta taqyryby jaǵynan ár alýan qazaqstandyq fılmdermen qosa álemdik tanymal kınostýdıalardyń tańdaýly ónimderi kóp. Atalǵan kartınalardyń bári endi ana tilimizde aýdarmamen kórsetilýi mindetti ekeni arnaıy zańda kórsetilgen. Osy rette birqatar anımasıalyq týyndynyń qazaq tilindegi dýblájyn túsirgen kompanıanyń ózi álemdik naryqta joǵary baǵalaǵanyn aıtpaı ketýge bolmas. Budan bólek, qazir Mınıstrlik keńes úkimeti kezinde kórermenge jol tartqan otandyq kınolardy Reseıdiń memlekettik kıno qorynyń arhıvinen sandyq formatta óńdep alý boıynsha jumys júrgizip jatyr.
Aldaǵy ýaqytta da zamannyń zańǵary men ómirdiń zańdaryn jandy beınege aınaldyrǵan mazmundy fılmderimiz kóbeıip, halyqaralyq baıqaýlarda úzdik shyǵa berýine tilektespin.
Osynaý erekshe sátti paıdalana otyryp, sala mamandaryna myqty densaýlyq, qajymas qaırat, shyǵarmashylyq shabyt, tolaıym tabys tileımin!», - dep jazdy mádenıet jáne sport mınıstri óziniiń instagram áleýmettik paraqshasynda.