Bıyl Bolashaq baǵdarlamasynyń otyz jyldyǵy.
Bul aıshyqty datany muhıt asyp bilim qýyp, biliktiligin shyńdap júrgen qazaqstandyq jastar AQSH-tyń Boston qalasynda aýqymdy sporttyq jarystar ótkizip atap ótti. Sheteldikter de qazaq jastaryna álemdik deńgeıdegi bilim nárimen sýsyndaýǵa múmkindik bergen biregeı baǵdarlamany joǵary baǵalap otyr, dep habarlaıdy almaty-akshamy.kz qazaqstan.tv-ge silteme jasap.
Garvard, Masachýsets tehnolgıalyq ınstıtýty sekildi álemdegi bedeldi JOO ornalasqan Boston AQSH-tyń akademıalyq astanasy sanalady. Sondyqtan bul jerde bilim alyp jatqan qazaqtar da kóp. Merekege oraı uıymdastyrylǵan sporttyq sharaǵa tań sáriden júzden asa jastyń jınalýy sonyń aıǵaǵy bolsa kerek. Qazaqtyń týyn alystan baıqap qalǵan amerıkalyq Per Hander de sharaǵa asyǵa jetipti. Qazaqstanmen ýran óndirisi boıynsha on jyldan beri tyǵyz baılanys ornatqan bıznesmen Bolashaq arqyly shetelde bilim alǵan qazaq jastarymen jumys barysynda talaı kezdeskenin ári olardyń jan-jaqtylyǵyna tánti bolǵanyn aıtady.
Per Hander,kásipker:
Olar jas bolsa da óte saýatty, aqyldy, birneshe tilde erkin sóıleıtin myqty mamandar. Sondyqtan menińshe Bolashaq óte sátti baǵdarlama jáne eldiń damýyna úlken úlesi bar dep oılaımyn.
Per Hander talapty jastarǵa bilim alýǵa múmkindik bergen baǵdarlamanyń jyldan jylǵa mańyzy arta túsetinine senimdi. Sebebi, básekege qabiletti memleket qalyptastyrý úshin damyǵan elderdiń ozyq tehnologıasyn ákelý jetkiliksiz, ozyq bilimin meńgerý kerek. Sondyqtan da Bostonda IT, medısına sekildi mańyzdy salalarda bilim alyp júrgen qazaqtar az emes. Mereıtoıǵa oraı olardyń bir bóligi fýtbol oınap, ústel tenısinen jaryssa, endi biri shahmattan baǵyn synady.
Tatána Zlataeva, Boston ýnıversıteti Metropolıten kolejiniń dekany:
Bul mereke Qazaqstan men Boston Ýnıversıteti arasyndaǵy baılanystyń 30 jyldyǵyn aıshyqtaıdy. Osy ýaqyt aralyǵynda bizdiń joǵarǵy oqý ornyn júzdegen qazaqstandyq stýdent támámdady. Olar memlekettik qyzmette, kásipte jáne qoǵamnyń belsendi múshesi retinde de tanytyp júr. Men soǵan qýanamyn. Qazir de qazaq stýdentteri ýnıversıtetimizdegi 17 túrli mamandyqty meńgerip jatyr.
Baǵdarlama iske qosylǵan otyz jyl ishinde 12 myń qazaqstandyq álemniń úzdik oqý oryndarynyn támamdasa, onyń basym bóligi Amerıka ýnıversıtetteriniń túlekteri. Qazirdiń ózinde AQSH-ta jarty myńnan astam stependıat bilim alyp jatyr.