2021 jyly kórý, estý jáne tirek-qımyl apparaty buzylǵan adamdar úshin 251,8 mln teńgege 113 arnaıy jumys ornyn qurý josparlanǵan.
Ústimizdegi jyldyń alty aıynda memlekettik baǵdarlama aıasynda 11,6 myń múgedektigi bar adamǵa (MBA) jumyspen qamtýdy qoldaý sharalary kórsetildi, dep habarlaıdy Almaty-akshamy.kz.
«9,4 myń MBA jumysqa ornalastyrylsa, onyń ishinde 3,3 myńy turaqty jumys oryndaryna, al 6,1 myńy ýaqytsha jumys oryndaryna (áleýmettik jumys oryndary, jastar tájirıbesi jáne qoǵamdyq jumystar) turǵyzyldy. Joǵaryda atalǵan kezeńde qysqa merzimdi kásiptik oqytýmen 362 adam qamtyldy. «Bastaý Bıznes» jobasy boıynsha kásipkerlik negizderine 1185 MBA oqytyldy, onyń ishinde 127-si óz jobalaryn qorǵap shyqsa, 45-i grant, 2-i shaǵyn nesıe aldy», – delingen Eńbek jáne halyqty áleýmettik qorǵaý mınıstrliginiń baspasóz qyzmetiniń habarlamasynda.
Mamandardyń habarlaýynsha, «Eńbek» memlekettik baǵdarlamasy aıasynda 158 adam shaǵyn nesıe alsa, taǵy 524 múgedektigi bar adamǵa qaıtarymsyz grant bólindi.
Budan basqa, MBA arnalǵan jumys oryndary kvotasy sheńberinde 4,4 myń adam jumysqa ornalastyryldy. Tıisti kvotalardy jergilikti atqarýshy organdar «Halyqty jumyspen qamtý týraly» zańyna sáıkes, aýyr, eńbek jaǵdaıy zıandy jáne qaýipti jumystardaǵy jumys oryndaryn eseptemegende, jumys isteıtinderdiń jalpy sanynyń 2-den 4%-ǵa deıingi (keminde 50 adam) mólsherinde belgileıdi.
«Sonymen qatar, halyqaralyq tájirıbe negizinde, múgedektigi bar adamdardy jumysqa ornalastyrý úshin arnaıy jumys ornyn jabdyqtaýǵa jumys berýshilerdiń shyǵynyn sýbsıdıalaý engizildi. 2021 jyly kórý, estý jáne tirek-qımyl apparaty buzylǵan adamdar úshin 251,8 mln teńgege 113 arnaıy jumys ornyn qurý josparlanǵan», – dep habarlaıdy baspasóz qyzmeti.
Aǵymdaǵy jyldyń 1 shildesindegi jaǵdaı boıynsha, 19,3 mln teńge ıgerilip, 9 arnaıy jumys orny qurylǵan.