«Kelisip pishken ton kelte bolmaıdy». Eldiń erteńi men bolashaǵyna qatysty mańyzdy máseleler halyqtyń talqysyna túsip, qoǵamnyń talqylaýynan ótýi tıis. Sodan keıin ǵana mańyzdy sheshim qabyldanady. Atom elektr stansıasyn salýdy qoldaý jónindegi Halyqtyq shtab músheleri Túrkistan oblysynyń mádenıet salasy ókilderimen kezdesýinde osyndaı pikir bildirdi.
Dóńgelek ústelge qatysýshylar bul bizdiń qoǵamda jańa saıası mádenıet qalyptasqanynyń kórinisi ekenin atap ótti. Shtab músheleri elektr energıasynyń tapshylyǵy búginde elimizdiń ońtústik óńirlerinde erekshe sezilip otyrǵanyn jetkizdi. Mamandardyń aıtýynsha, ótken jyldyń qorytyndysy boıynsha mundaǵy tapshylyq saǵatyna 3,1 mlrd kVt quraǵan. Salystyrmaly túrde aıtsaq, ortasha eseppen 100 myń turǵyny bar bir qala jylyna 700 mln kVt elektr energıasyn tutynady eken.
«Sondyqtan kórshi elderge táýeldilikten arylý úshin qajetti qýat kózin ózimizde óndiretin atom elektr stansıasyn salýymyz qajet», – deıdi mamandar.
Halyqtyq shtab múshesi Qaırat Balabıev: «Kún men jaryq – eń aldymen halyqqa kerek nárse. Qazirgi ýaqytta biz elektr qýatyn Reseıden jáne birshama Qyrǵyzstannan alyp otyrmyz. Shymkent qalasynyń ónerkásibi men halqy tutynatyn elektr energıasynyń jyldyq qajettiligi tolyq qamtamasyz etilmegen. Sondyqtan da bizdiń bolashaǵymyz myqty, memleketimiz baı bolý úshin, biz elektr energıasy jaǵynan táýelsiz bolýymyz qajet», – deıdi.