Búgin áleýmettik jelilerde aqyn Tanakóz Tolqynqyzynyń jazbasy taraldy.
Tanakóz Tolqynqyzynyń jazýynsha, onyń ákesiniń jylqysyn baǵyp júrgen jylqyshysy satyp jibergen, dep habarlaıdy Almaty-akshamy.kz
«Týra ákemniń 70 jyldyq toıyn ótkizýge 1 kún qalǵanda adamdy esten tandyratyn bir jańalyq estımiz. Sol joǵalǵan jylqylarymyzdyń on shaqtysy aýyl adamdarynyń úıinde júr eken. Sheshem ýchaskovyıdy ertip alyp álgi adamdardyń úıine barsa, ol adamdar ol jylqyny bizdiń jylqyshydan satyp alǵanyn aıtady. Taǵy bireýin aýyldyń burynǵy ýchaskovyı mentinen satyp alǵan. Sonda bul uıymdasqan qylmys bolyp tur ǵoı. Burynǵy ment – búgingi ury bolyp shyqqany ma? Biz ony juttan qyrylyp qalǵan shyǵar dep júrsek! Jylqyshy ony shimirikpesten aýyl adamdaryna satqan. Ákem shyryldap, «jylqy joǵaldy, ár joǵalǵan jylqyǵa 100 myń teńge súıinshi beremin», dep habarlaǵan. Sonda aýyl adamdary ákemdi shyryldatyp qoıyp, túk bilmegen túr jasap, ákemniń jylqylaryn qorasynda ustap otyrǵan.100 jylqy bir jylqyny 1 mln teńgeden esepteseń 100 mln teńge. Oǵan Astananyń qaq ortasynan 3 ne 4 úı satyp alýǵa bolady. Al eń tómengi baǵamen esepteseń, 2 úı satyp alýǵa boldy. Ákem óte shynshyl adam. Kisi aqysyn jep kórmegen. Barlyq maldary tirkelgen, taǵbalanǵan, salyǵy tólengen, zańdastyrylǵan. Sonda ol jylqyshy bireýdiń 100 mln teńgesin sińirip alamyn dep eseptegen be? 100 jylqynyń suraýy bolady dep oılamaǵan ba?» dep jazdy Tanakóz.
Jelidegi jazba boıynsha, jylqyshy Káribaev Berikbol Ulytaý oblysy Jańaarqa aýdany Baıdaly bı aýylynyń turǵyny eken. İs sotqa berilgen. Jylqyshy 21 jyly 25 sáýirde 105 bas jylqyny baǵýǵa alǵan.
Jazbaǵa komentarı jazǵan Ulytaý oblysynyń PD ókilderi «Jańaarqa aýdandyq polısıa bóliminde qylmystyq is qozǵaldy, tergeý júrgizilýde» dep málimdepti.