Jas mamandar bolashaqta elimizdiń ǵylymyna eleýli úles qosýdy maqsat etken.
Reseıde ornalasqan Birikken ıadrolyq zertteýler ınstıtýty aýadaǵy aýyr metaldardy anyqtaý úshin fıkýs pen evkalıpt dárilerin jasap shyǵardy. Jalpy atalǵan ınstıtýtta 18 eldiń ǵalymdary eńbek etedi, dep habarlaıdy Almaty-akshamy.kz.
Onyń ishinde qazaqstandyq jas ǵalymdar da bar.
Sońǵy 20-30 jylda birikken ıadrolyq zertteýler ınstıtýtynda iri, ilkimdi jobalar qolǵa alyndy. Bes jańa element sıntezdeldi. Munda 100-ge jýyq qazaqstandyq ǵalym eńbek etip júr. Jas mamandar bolashaqta elimizdiń ǵylymyna eleýli úles qosýdy maqsat etken.
«Qazaqstannan kelgen ǵalymdardyń basym bóligi ıadrolyq reaksıalar zerthanasynda jumys isteıdi. Olardyń kómegimen iri zertteýler jasaldy. Endigi jańa asa aýyr elementterdiń jańa hımıalyq qasıetterin zertteý jumystary júrgizilýde», - deıdi Iadrolyq reaksıalar zerthanasynyń dırektory Sergeı Sıdorchýk.
Zerthana qoldanbaly sıpattaǵy irgeli zertteýler júrgizedi. Sonymen qatar, aýyr ıondardyń ártúrli materıaldarmen árekettesýin zertteý jumysy da joǵary deńgeıde júrgizilýde.
«Osy laboratorıada Qazaqstannan 21 adam eńbek etedi. Onyń altaýy PhD dárejesine ıe. Barlyq qyzmetkerler ártúrli salada qyzmet atqarady. Olar fýndamentaldi fızıka, sonyń ishinde atap aıtatyn bolsaq, aýyr ıadrolardyń bóliný kezindegi bolatyn prosesterdi zertteıdi. Osy qyzmetkerlerdiń barlyǵy derlik Qazaqstandaǵy ǵylymı ınstıtýttarmen tyǵyz baılanysta», - deıdi ǵylymı qyzmetker Danıar Berikov.
Zerthana qyzmetkerleri Qazaqstandaǵy túrli ǵylymı baıqaýlarǵa qatysyp, jeńimpazdar qatarynan kórinýde. Sonymen qatar 2019 jyly Almatydaǵy ıadrolyq fızıka ınstıtýtymen birigip, neıtrondy radıografıa tomografıa qurylǵysyn qurdy. Bul Qazaqstandaǵy analogy joq jalǵyz qurylǵy.