Almaty-akshamy.kz saıtynyń búgingi jańalyqtaryna sholý – kún kerýeni
Almaty alańynda – adamzat bolashaǵy
Búgin Almatyda Digital Almaty 2024 forýmy bastaldy. Jıynda sıfrlyq transformasıanyń jańa baǵyty talqylanady, sıfrlyq tehnologıalar salasyndaǵy jaryqqa shyqqan tyń dúnıeler kórmege qoıylady. Sıfrly bolashaqta qandaı mamandardy daıyndaý kerektiginen tartyp, ónerkásipti, úkimet jumysyn, áleýmettik qyzmet kórsetý salalaryn sıfrlandyrýdyń otandyq jáne sheteldik tájirıbeleri, strategıalary sóz bolady.
Almatydan 252 shaqyrymda jer silkindi
QR Tótenshe jaǵdaılar mınıstrligi 1 aqpan kúni saǵat 01:21-de jer silkinisin (aftershok) tirkedi. Silkinis oshaǵy Almatydan ońtústik-shyǵysqa qaraı 252 shaqyrym qashyqtyqta - Qytaı aýmaǵynda ornalasqan.
Júldeli jetkinshekter
Almatylyq oqýshylar 25-28 qańtar aralyǵynda Úndistannyń Goa qalasynda robototehnıkadan ótken «The Goa International Robotics Festival» halyqaralyq ashyq chempıonatynan júldeli oraldy. Dodaǵa 220 komanda qatysqan. Úsh kúndik jarystyń qorytyndysy boıynsha Almaty qalasynan barǵan «Sana team» jáne «Qazaq style» qurama komandalary eki joǵary nagradamen marapattaldy.
100 dollar jarylqaı ma?
"Ulttyq qor - balalarǵa" baǵdarlamasy boıynsha BJZQ-ǵa alǵashqy jınaqtar tústi. Áleýmettik jelilerdiń basty taqyrybyna aınalǵan 100 dollar qyzý talqyǵa túsip jatyr. Kópshilik bul aqshany aı saıyn tólenedi dep dámelenip qalǵan syńaıly.
Baǵdarlamaǵa qatysýshylardyń jalpy sany - 6 919 131 bala. Olarǵa Qazaqstan Ulttyq qorynyń ótken jylǵy tabysynan 100 AQSH dollary jáne 52 senti mólsherinde birdeı soma esepteldi.
Balanyń baǵdarlamaǵa qatysýy týraly jáne eseptelgen nysanaly talaptar týraly aqparatty kámeletke tolmaǵan balanyń ata-anasy (nemese basqa da zańdy ókilderi) arnaıy ashylǵan kids.enpf.kz saıtynda (balanyń JSN boıynsha) teksere alady. Munda siz, sondaı-aq, baǵdarlamanyń sharttarymen, nusqaýlyqpen tanysyp, ózińizdi qyzyqtyrǵan saýaldarǵa jaýap ala alasyz. Ata-analar óz balalary boıynsha eseptelgen qarjy týraly derekterdi egov.kz portalyndaǵy Jeke kabınetinde teksere alady.
Angelına Lýkas – álem chempıony!
Qazaqstandyq boksshy Angelına Lýkas Bakýde ótken kásipqoı boks keshinde óner kórsetip, pákistandyq sportshyny birinshi raýndta nokaýtpen jeńip, WIBA álem tıtýlyn ıelendi. Buǵan deıin Lýkas WBC International jáne UBO chempıondyq belbeýlerin de jeńip alǵan bolatyn.
Mýzeıden de ketti
Burynǵy prezıdent Nursultan Nazarbaevqa arnalǵan eskertkish Ulttyq mýzeı atrıýmynan alynyp tastaldy. Murajaı shilde aıynda mereıtoıyn atap ótetin Ulttyq mýzeıdiń 10 jyldyǵyn merekeleý aıasynda Mádenıet jáne aqparat mınıstriniń tapsyrmasy boıynsha 2024 jyly otandyq jáne sheteldik sarapshylardy tarta otyryp, Murajaı keńistigin jetildirý prosesi bastalǵanyn túsindirdi.
Telefon ustaýǵa tyıym salyna ma?
Oqýshylarǵa sabaq ýaqytynda telefon ustaýǵa zańdy túrde tyıym salý bilim berý sapasyna serpilis ákeledi. Al oqýshylar telefonyn mekteptegi arnaıy jáshikte nemese sómkesinde saqtaı alady.
Adamnan aıla artylmas
Kásipkerlik sıpattaǵy áreketterdi anyqtaý maqsatynda Kiris komıteti bankterden málimet alatyny belgili bolǵannan keıin keıbir dúken ıeleri tutynýshylarǵa aqshany telefon balanysyna jiberýdi surap jatqanǵa uqsaıdy.
Qarjy vıse-mınıstri Erjan Birjanovtyń oıynsha, bul ýaqytsha áreket. Qajet bolǵan jaǵdaıda uıaly operatorlar arqyly baqylaý júrgiziledi.
Taǵy bir mereke
Búgin elimizde alǵash ret azamattyq avıasıa qyzmetkerleriniń merekesi atap ótildi. Bul kásibı mereke – Qazaqstan Respýblıkasynyń azamattyq avıasıasy salasyndaǵy qyzmetke erekshe mán berýge jáne elimizdiń jas avıatorlarynyń patrıottyq rýhyn damytýǵa yntalandyrýǵa arnalǵan.