Paıdalanylmaı jatqan jáne zańnamany buza otyryp berilgen aýyl sharýashylyǵy maqsatyndaǵy 10 mln gektar jer memleket menshigine qaıtaryldy. 2022-2023 jyldar aralyǵynda Memleket basshysy Qasym-Jomart Toqaevtyń Qazaqstan halqyna Joldaýynda aıtylǵan tapsyrmasyna sáıkes tıisti jumystar atqaryldy.
QR Prezıdentiniń tapsyrmalaryn sapaly ári ýaqtyly oryndaý maqsatynda Premer-Mınıstr Álıhan Smaıylovtyń ókimimen arnaıy memlekettik komısıa quryldy. Onyń quramyna quqyq qorǵaý organdarynyń, mınıstrlikter men ákimdikterdiń ókilderi kirdi.
Júrgizilgen jumystardyń nátıjesinde paıdalanylmaı jatqan jáne zańnamany buza otyryp berilgen 10 mln gektar aýyl sharýashylyǵy jerleri memleket menshigine qaıtaryldy. Sondaı-aq jaıylymdyq jer tapshylyǵy máselesiniń ózektiligin eskere otyryp, qaıtarylǵan jerlerdi tıisti eldi mekenderge bekitý arqyly basym tártippen sharýalardyń qajettilikteri úshin berilýde.
Memleket basshysynyń tapsyrmalaryn oryndaýda «AMANAT» partıasy janyndaǵy «Jer amanaty» komısıasynyń qoǵamdyq-partıalyq baqylaýy mańyzdy faktorǵa aınaldy. Atap aıtqanda, atalǵan komısıa qaıtarylatyn jerlerdi qaıta bólýdi baqylaýmen aınalysty.
Jerdi halyq arasynda odan ári ádil bólý máseleleri QR Úkimetiniń erekshe baqylaýynda bolady.