2023-2024 oqý jylynda birinshi synypqa 30 myńnan astam bala bardy. Qala mektepterindegi saltanatty jıynǵa Almaty qalasy ákiminiń orynbasarlary Ásem Núsipova, Arman Qyryqbaev, Álisher Ábdiqadyrov, sondaı-aq, aýdan ákimderi jáne t. b. qatysty.
Bilim kúni Almatyda 323 mektep esigin aıqara ashty, onyń ishinde 215 –memlekettik jáne 108 – jekemenshik. Onyń ishinde, Túrksib aýdany, Qaırat shaǵynaýdanyndaǵy №211 memlekettik jańa mektep jáne 3000 oryndyq 9 jekemenshik mektep bar. Sondaı - aq, búgingi tańda 2 mektepte (№48, SHI №9) qosymsha ǵımarattardyń qurylysy aıaqtaldy, bul oqýshylar sanyn 420 orynǵa arttyrýǵa múmkindik berdi. Sondaı-aq, jyl sońyna deıin №148 300 oryndyq mektepke qosymsha qurylysty aıaqtaý josparlanýda. Qala mektepterinde barlyǵy 301 myńnan astam oqýshy oqıdy.
Bıyl Almaty ákimi Erbolat Dosaevtyń tapsyrmasy boıynsha 133 myńnan astam bastaýysh synyp oqýshylary tegin ystyq tamaqpen qamtamasyz etiledi. Al jergilikti búdjetten qarjylandyrylatyn "jalpyǵa birdeı oqytý" qorynan kómek somasy mektep formasy men keńse kerek-jaraqtaryn satyp alý úshin bir balaǵa 43 myń teńgeni qurady. Osy qordan HÁOT sanatyndaǵy (halyqtyń áleýmettik osal toptary) 15 myńnan astam almatylyq oqýshy kómek aldy.
Sondaı-aq, jańa oqý jylynda qala ákimi Erbolat Dosaevtyń tapsyrmasy boıynsha Almatyda alǵash ret mektep jasyndaǵy balalardy turǵylyqty jerinen oqý ornyna jáne keri qaraı tegin tasymaldaý úshin mektep avtobýstaryn usyný boıynsha aýqymdy joba engizildi. «Mektep avtobýsy» jobasy 30 memlekettik mektepti qamtıdy.
Ol bastaýysh synyp oqýshylaryna jáne mektepten alys turatyn oqýshylarǵa baǵyttalǵan. Osy maqsatta komýnaldyq avtopark Almaty qalasynyń bilim basqarmasymen birlesip 100 mektep avtobýsyn satyp aldy. Bul avtobýstar halyqaralyq qaýipsizdik standarttaryna jáne tehnıkalyq talaptarǵa sáıkes keledi: avarıalyq shyǵý, qaýipsizdik beldikteri, múmkindigi shekteýli balalarǵa arnalǵan pandýs, órt qaýipsizdigi júıesi jáne t.b. Balalardy tasymaldaý pedagogtyń qatysýymen jáne balalardy tasymaldaýdyń ázirlengen erejelerine sáıkes júzege asyrylatyn bolady.
