Aýyldaǵy medısınany jaqsartý máselesi talqylandy
Densaýlyq saqtaý mınıstrligi 1 shildeden bastap barlyq aýylda medısınalyq tekseris uıymdastyrýdy josparlap otyr. Bul týraly densaýlyq saqtaý mınıstri Ajar Ǵınıat aýdandar men monoqalalardyń bas dárigerlerimen ótken kezdesýde aıtty, dep habarlaıdy Almaty-akshamy.kz Almaty.tv-ge silteme jasap.
Mınıstrdiń aıtýynsha, aýylda medısınalyq kómektiń qoljetimdiligin qamtamasyz etý, aýyl halqynyń ómir súrý sapasyn arttyrý densaýlyq saqtaý saıasatynyń basty basymdyǵy bolyp qala beredi.
"Negizgi medısınalyq, ınfraqurylymdyq, tehnologıalyq resýrstar qalalarda shoǵyrlanǵan. Al aýyl turǵyndary bilikti medısınalyq qyzmet, mamandandyrylǵan kómek alýda áli de qıyndyqtarǵa tap bolýda. Bizdiń ortaq mindetimiz – árbir ómir úshin kúresý, adam qaı jerde tursa da, ol bizdiń pasıent bolyp qala beredi, al dáriger oǵan eń qajetti kómek kórsetýge tıis", - dedi Ǵınıat.
Ol kóptegen problema jyldar boıy sheshilmeı, búginde densaýlyq saqtaý salasyna úlken júkteme túsirip jatqanyn aıtty. Bul kadr tapshylyǵy, medısınalyq obektilerdiń tozýy, jol-kólik qatynasynyń álsizdigi, aýylda medısınalyq tehnıkamen jaraqtandyrýdyń tómendigi.
Mınıstrdiń aıtýynsha, aýyl turǵyndary ambýlatorıalyq mekemelerge sırek barady, tek densaýlyǵy nasharlaǵan jaǵdaıda ǵana aýrýhanaǵa jatady. Óıtkeni turmystyq sıpattaǵy qıyndyqtarǵa baılanysty josparly emdeýden bas tartady.
"Osyǵan baılanysty mınıstrlik aýyl turǵyndaryn bastapqy dıagnostıkamen qamtýdy arttyrýǵa baǵyttalǵan birqatar is-sharany iske asyryp jatyr. Ol úshin barlyq jastaǵy aýyl turǵyndaryna profılaktıkalyq tekserý júrgizý týraly buıryqtyń jobasy ázirlendi. Ony 1 shildeden bastap iske qosý josparlanyp otyr", - dep habarlady densaýlyq saqtaý mınıstrliginiń baspasóz qyzmeti.
Budan basqa, aýylda medısınalyq kómektiń qoljetimdiligin jaqsartý úshin densaýlyq saqtaý uıymdary jelisiniń memlekettik normatıvi, medısınalyq kómek kórsetý standarttary qaıta qaralady, kólik medısınasynyń arsenaly kúsheıtiledi.
Mınıstr jergilikti atqarýshy organdardy, aýdandyq deńgeıdegi aýrýhanalar men monoqalalardyń bas dárigerlerin, depýtattyq korpýsty aýyldaǵy medısına problemalaryn birlesip sheshýge shaqyrdy.