1 qyrkúıekten bastap stýdentterdiń stıpendıasy kóbeıedi — Oljas Bektenov Úkimet qaýlysyna qol qoıdy
QR Premer-Mınıstri Oljas Bektenov 2024 jylǵy 1 qyrkúıekten bastap kolejder men JOO stýdentterine arnalǵan stıpendıalardy arttyrýdy kózdeıtin Úkimet qaýlysyna qol qoıdy, dep habarlaıdy almaty-akshamy.kz.
Kolej stýdentteri úshin shákirtaqy 50%-ǵa artyp, jumysshy mamandyqtary boıynsha 43 574 teńgeni, orta býyn mamandary úshin 41 896 teńgeni quraıtyn bolady.
Bakalavrıat stýdentteriniń stıpendıasy 20%-ǵa artyp, 47 135 teńgege deıin, al pedagogıka jáne medısına baǵyttaryndaǵy bilim alýshylardyń stıpendıasy 75 600 teńgege deıin ulǵaıady.
Internatýrada oqıtyndarǵa stıpendıa 85 376 teńge, al rezıdentýrada – 123 122 teńge kóleminde tólenetin bolady.
Magıstranttar men doktoranttarǵa stıpendıa 15%-ǵa ulǵaıtylady, onyń mólsheri tıisinshe 107 061 teńgeni jáne 240 000 teńgeni quraıdy. Sondaı-aq 2025 jylǵy 1 qyrkúıekte shákirtaqy bakalavrıat stýdentterine 20%-ǵa, magıstranttar men doktoranttarǵa 15%-ǵa kóbeıetin bolady.
Jalpy, Memleket basshysynyń tapsyrmasy boıynsha 2020 jyldan bastap stıpendıany kóbeıtý boıynsha josparly jumys júrgizilýde. Sonyń nátıjesinde 2025 jylǵa qaraı JOO men kolej stýdentteriniń stıpendıasy eki esege, magıstranttar men doktoranttar úshin 1,75 esege ósedi.