2023 jyldyń 1 qańtarynan bastap Qoldau platformasynyń fermerlerge sýbsıdıa berýge arnalǵan servısi qyzmetin toqtatady, dep habarlaıdy Almaty-akshamy.kz Inform.kz-ke silteme jasap.
Atalǵan servıstiń qyzmetin toqtatý sýbsıdıalaýdyń biryńǵaı memlekettik aqparattyq júıesin iske qosýmen jáne Qoldau sıfrlyq platformasynyń aldyna qoıylǵan jańa, aýqymdy mindettermen baılanysty.
«Sýbsıdıalaýdyń derekter bazasy qabyldaý-tapsyrý aktisi arqyly QR Aýyl sharýashylyǵy mınıstrligine berildi. Qarjy ınstıtýttary – agroónerkásip keshenin qarjylandyrý naryǵyna qatysýshylardyń ótinishi boıynsha olarǵa, sondaı-aq sýbsıdıalaý servısiniń tarıhı derekteri usynyldy. Bul sýbsıdıalaý salasynyń Biryńǵaı memlekettik aqparattyq júıesine (BMAJ) aýyrtpalyqsyz kóshýine kepildik beredi.
Al Qoldau platformasy memlekettik shekaradaǵy ótkizý beketterin sıfrlandyrý, baǵalaý, aýdıtorlyq jáne býhgalterlik qyzmetti sıfrlandyrý, memlekettik kirister organdarynyń monıtorıńi úshin astyqty qadaǵalaý salasy, bankrottyq rásimderin sıfrlandyrý, memlekettik múlikti tıimdi paıdalaný monıtorıńi jáne el basshylyǵynyń tapsyrmalary sheńberinde basqa da aýqymdy jobalardy iske asyra otyryp, jumysyn jalǵastyra beredi», - delingen habarlamada.
Aıta keteıik, Qoldau sýbsıdıalaý servısi arqyly 2018 jyly pılottyq rejımde iske qosylǵan sátten bastap búginge deıin 700 mlrd teńgege jýyq sýbsıdıa tólendi (búgingi baǵam boıynsha 1,5 mlrd AQSH dollary). Sýbsıdıa alýshylardyń qatarynda 61 myńnan astam sharýa qojalyqtary men kompanıalar bar. Investısıalyq sýbsıdıalaý kólemi shamamen 312 mlrd teńgeni quraıdy. Qoldau servısi arqyly 95 mıllıardqa jýyq teńge úsh baǵyt boıynsha tólendi. Atap aıtqanda, kredıtter men lızıń boıynsha paıyzdyq mólsherlemeni sýbsıdıalaý, aýyl sharýashylyǵy ónimderin qaıta óńdeýdi qoldaý jáne agrarlyq sala kásiporyndaryn qarjylyq saýyqtyrý.
Qoldau sýbsıdıalaý servısi búdjet qarajatynsyz memlekettik-jekeshelik áriptestik negizinde jasalyp, engizildi. Osylaısha agroónerkásip keshenin sýbsıdıalaý ashyqtyǵy qamtamasyz etildi. Sıfrlandyrýdyń bul jobasy quqyq qorǵaý organdaryna memlekettik qarjyny jymqyrý faktilerin anyqtaýǵa múmkindik berdi. Sebebi servıs sıfrlandyrylǵan kez kelgen aralasýdy kórsetip otyrady. Osylaısha monıtorıń júrgizý kezinde fıskaldyq organdardyń jumysyn jeńildetti.