Qalada 8 referendým komısıasy qyzmet etedi jáne 574 referendým ýchaskesi taǵaıyndalǵan.
Telegramm-kanalynda arnaıy bot ashylǵan, ol jerde JSN engizý arqyly ýchaskeńizdi bile alasyz, dep habarlaıdy Almaty-akshamy.kz
Bul týraly Almaty qalasy Óńirlik komýnıkasıa alańynda respýblıkalyq referendýmǵa daıyndyq taqyrybynda ótken brıfıńte aıtyldy.
Almaty qalalyq referendým komısıasynyń tóraıymy Janna Asanova qalada 8 referendým komısıasy qyzmet etetinin jáne 574 referendým ýchaskesi taǵaıyndalǵanyn málimdedi. 4938 adam referendým ýchaskesinde jumys isteıdi, al aýdandyq komısıalarda 62 adam bar. Jalpy alǵanda 5 myń adam komısıa múshesi retinde referendým naýqanyna qatysady eken.
20 mamyrdan bastap ýchaskelik saılaý komısıalary óz qyzmetterin bastady. Qazir jurtshylyq tarapynan «ýchaskemdi qalaı tabamyn, tizimnen ózimdi qalaı tabamyn?» degen suraqtar kóp. Ol úshin arnaıy baılanys ortalyǵy ashyldy. Estimegen adamdar bolsa 338-45-45 nómirine habarlasyp suraqtaryna jaýap ala alady. Odan bólek telegramm-kanalynda arnaıy bot ashylǵan, ol jerde JSN engizý arqyly ýchaskeńizdi bile alasyz. Eger referendýmǵa qatysýǵa quqyǵy bar azamattar tiziminen ózińizdi tappasańyz, arnaıy baılanys telefon nómirine qońyraý shalyp, anyqtaýǵa bolady,-dedi ol.
Almaty qalalyq referendým komısıasy tóraıymynyń orynbasary Aıgúl Qalyqovanyń aıtýynsha referendýmǵa qatysatyn azamattar tizimi aldyn ala jasalǵan. 20 mamyrdaǵy jaǵdaı boıynsha 1 mln 100 myńnan astam adam referendýmǵa qatysý quqyǵyna ıe eken.
Eger referendým kezinde azamat qalada bolmaıtyn bolsa, ol aldyn ala jergilikti ýchaskesinen tirkeý kýáligin ala alady. Onymen elimizdiń kez kelgen jerinde referendýmǵa qatysa alady. Tek Almatydaǵy ózge aýdandarda qatysa almaıdy, ıaǵnı Bostandyq aýdanynda tirkeýde bolsa, Jetisý aýdanyna baryp daýys bere almaıdy. Mindetti túrde óz aýdanyna barý kerek. Aýyryp jatqan nemese aýyryp jatqan adamǵa qarap shyǵa alamaı otyrǵandar úıge tapsyrys bere alady. Ondaı ótinishter 20 mamyrdan 5 maýysymǵa deıin qabyldanady,-dedi Qalyqova.