Energetıka mınıstrliginiń ókilderi usynǵan aqparatqa sáıkes, mamyr aıynda energıa óndirýshi uıymdardyń elektr energıasyn óndirýge arnalǵan shekti tarıfterin qaıta qaraý josparlanyp otyr.
Energetıka mınıstrliginiń málimetinshe, 47 energıa óndirýshi uıymnyń 27-si shekti tarıfterdi túzetýge ótinim bergen. 20 energıa óndirýshi uıym úshin tarıf burynǵy deńgeıde saqtalatyn bolady, dep habarlaıdy Almaty-akshamy.kz Egemen.kz-ke silteme jasap.
Baǵanyń qymbattaýyna jóndeý jumystaryna qajet materıaldar men jabdyqtar qunynyń ósýi sebep bolyp otyr.
Elimizdegi energıa óndirýshi uıymdarynyń generasıalaýshy qýattarynyń jartysynan kóbiniń tozyǵy jetken. Tipti keıbireýi isten shyǵyp qalýdyń az-aq aldynda tur. Máselen, Stepnogor JEO-nyń tozý deńgeıi - 82 paıyz, Rıdder JEO - 75 paıyz, Oral JEO - 86 paıyz. 90 paıyzǵa deıin tozyp ketken JEO-lar da bar.
Sondaı-aq QR Energetıka mınıstrligi Memleket basshysy Qasym-Jomart Toqaevtyń tapsyrmasy sheńberinde stansıa qyzmetkerleriniń jalaqysynyń deńgeıin tıisti óńirler boıynsha ortasha deńgeıge deıin arttyrý boıynsha jumys júrgizýde. Shekti tarıf jobasynda óndiristik personal jalaqysynyń ulǵaıýy da eskeriledi. Bul energetıkalyq kásiporyndardan ekonomıkanyń aralas salalaryna joǵary bilikti mamandardyń ketýin toqtatýǵa baǵyttalǵan.
QR Ulttyq ekonomıka mınıstrliginiń Tabıǵı monopolıalardy retteý komıteti energıa óndirýshi uıymdardyń shekti tarıfterin arttyrýdyń halyqtyń áleýmettik ál-aýqatyna áserine taldaý júrgizip jatqanyn atap ótti.
Aıta keteıik, elektr energıasy tarıfi ótken jyly da 1 shildeden bastap qymbattaǵan edi.