Balalardy qorǵaý kúniniń tarıhy qandaı?
Bul aıtýly data Áıelderdiń halyqaralyq demokratıalyq federasıasynyń kongresinde 1949 jyly resmı túrde bekitildi. 1950 jyldan beri búkil álem osy kúndi balaǵa qamqorlyq kúni retinde atap ótip keledi, dep habarlaıdy Almaty-akshamy.kz.
Osy úrdisten Qazaqstan da tys qalǵan joq. Elde azamattyq qoǵamnyń qalyptasýy jedeldegen saıyn bala quqyǵyn qorǵaýǵa degen jaýapkershilik, balaǵa degen qamqorlyq artyp keledi.
Qazir elimizde Bala quqyqtary jónindegi ýákil jumys isteıdi. Bul laýazym ıesiniń tikeleı Prezıdentke baǵynatyny bala quqyǵyn qorǵaýǵa degen memlekettiń ustanymy qandaı deńgeıde ekenin kórsetedi.
Qazaqstanda bala men áıeldiń, jalpy adamnyń quqyǵyn qorǵaıtyn negizgi zańdardan bólek, balalarǵa arnalǵan ondaǵan zań men normatıvtik aktiler qabyldanǵan.
15 sáýirde Prezıdent áıel quqyǵy men balalardyń qaýipsizdigin qamtamasyz etetin zańdarǵa qol qoıdy.
Atalǵan qujat áıelderdi nemese balalardy jaraqattaǵandardy qylmystyq jazaǵa tartýdy kózdeıdi. Ondaı jaıt qaıtalansa, sot jábirleýshige qatysty sharany kúsheıte beredi. Sondaı-aq, zańda pedofılder men bala óltirgenderdi ómir boıy bas bostandyǵynan aıyrý jazasy bar. Zań memlekettik organ ókilderine kámeletke tolmaǵan nemese múgedektigi bar balalardyń arnaıy mekemelerin eskertýsiz tekserýge quqyq beredi.
Sonymen birge, zańda:
kámeletke tolmaǵandardy jábirlegeni (býllıng, kıberbýllıng) úshin ákimshilik jaýapkershilik alǵash ret engizildi;
16 jasqa deıingi balalar jol aqysyn tólemese de qoǵamdyq kólikten májbúrlep túsirýge tyıym salyndy.