Jambyl oblysy Sarysý aýdanynyń Qaratas aýylyndaǵy turǵyn úıdiń aýlasynan órt shyǵyp, 1 jylqy, 47 qoı órtenip ketti, dep habarlaıdy almaty-akshamy.kz.
«101» qyzmetine mal qoranyń órtke oranǵany týraly habarlama 25 naýryz kúni 21 saǵat 43 mınýtta kelip túsken. Oqıǵa ornyna Jańatas qalasynyń №16 órt sóndirý bóliminiń 1 bólimshesi, erikti órt quralymynan 7 adam, 1 Nıva avtokóligi, jergilikti atqarýshy organnan tirkemesi bar 1 MTZ-80 traktory shyqqan. Aýmaǵy 220 sharshy metrdi sharpyǵan órt 22 saǵat 36 mınýtta aýyzdyqtalyp, 22 saǵat 56 mınýtta tolyǵymen óshirilgen.
«Mal qora aýlasynda barlyǵy 228 bas usaq mal (qoı) bolǵandyǵy anyqtaldy. 1 jylqy men 47 bas qoı qora ishinde órtenip ketti. Aýyl turǵyndary men jergilikti atqarýshy organdar ókilderi jáne órt sóndirýshilerdiń jedel qımylynyń arqasynda qora mańyndaǵy maldar qaýipsiz jerge aıdap shyǵaryldy. Osylaısha 180 bas mal qutqaryldy. Órt elektr symdarynyń qysqa tuıyqtalýynan oryn alǵan. Atalǵan órt saldarynan zardap shekkender men qaza tapqandar tirkelgen joq», – delingen oblystyq tótenshe jaǵdaılar departamentiniń baspasóz qyzmeti taratqan aqparatta.