Bul teńizde, áýede jáne shalǵaı aımaqtarda baılanys úshin qoldanylatyn Inmarsat spýtnıktik baılanysyna tıesili kod.
Memlekettik tehnıkalyq qyzmet (MTQ) qazaqstandyqtarǵa +870 kodynan bastalatyn nómirlerden túsetin qońyraýlarǵa baılanysty úndeý jasady, - dep habarlaıdy aqshamnews.kz
MTQ málimetinshe, +870 telefon kody teńizde, áýede jáne shalǵaı aımaqtarda baılanys úshin qoldanylatyn Inmarsat spýtnıktik baılanysyna tıesili.
“Degenmen, alaıaqtar mundaı nómirlerdi aldaý maqsatynda belsendi paıdalanady, sebebi olar qazaqstandyq nómirlerge uqsas”, – delingen habarlamada.
Sondaı-aq, alaıaqtar Inmarsat-tyń basqa da uqsas kodtaryn qoldanýy múmkin:
+870 – jelige jalpy kirý kody (SNAC);
+871 – Atlant muhıty, shyǵys bóligi (AOR-E);
+872 – Tynyq muhıty aımaǵy (POR);
+873 – Úndi muhıty (IOR);
+874 – Atlant muhıty, batys bóligi (AOR-W).
Aıta keteıik, +870 telefon kody jalpy qoldanystaǵy kod bolyp tabylady jáne qońyraýlardyń qaı spýtnık arqyly jasalyp jatqany belgisiz bolǵan kezde qoldanylady. Alaıda SNAC Inmarsat-A termınaldaryna qońyraý shalýdy qoldamaıdy.
“Belgisiz +870 jáne basqa da osyndaı kodtary bar nómirlerge qaıta qońyraý shalmańyz! Jeke derekterińizdi, SMS kodtaryn jáne bank kartalaryńyzdyń málimetterin eshkimge habarlamańyz. Eger sizden osyndaı nómirler arqyly kod nemese basqa da aqparat suralsa, bul – alaıaqtyqtyń anyq belgisi. Eshqashan jeke aqparatyńyzdy bermeńiz”, – dep eskertti MTQ.