Sınoptıkter Qazaqstanda 13, 14 jáne 15 aqpanda aýa raıy qandaı bolatyny týraly boljam jasady, - dep habarlaıdy almaty-akshamy.kz.
Boljam boıynsha, 13-14 aqpanda Qazaqstannyń basym bóliginde frontal bólikter yqpalynan turaqsyz aýa raıy saqtalady, jańbyr men qar túrindegi jaýyn-shashyn, soltústik oblystarda qatty qar, burqasyn, kóktaıǵaq, sondaı-aq batysta aýa temperatýrasy 5 gradýs aıaz – 5 gradýs jyly, soltústik, ortalyq, shyǵys oblystarda 5 gradýs aıaz – 2 gradýs jylyǵa deıin kóteriledi dep kútiledi.
"Aıdyń ortasyna qaraı sıklon Qazaqstan aýmaǵynan shyǵyp, onyń ornyn arktıkalyq antısıklon basady, onyń áserinen respýblıkanyń soltústik jartysynda aıaz bolady. Elimizdiń batysynda, soltústik-batysynda jáne soltústiginde 15 aqpanǵa qaraı aýa temperatýrasy túnde 22-32, kúndiz 15-27 gradýs aıazǵa bolady dep kútiledi. Eldiń qalǵan bóliginde temperatýra fonynda kúrt ózgerister kútilmeıdi", - delingen habarlamada.