Premer-mınıstr Oljas Bektenov memlekettik satyp alýlar men kvazımemlekettik sektordyń satyp alýlarynda otandyq taýarlardyń úlesin arttyra otyryp, olardy túbegeıli jeńildetýdi jáne jedeldetýdi tapsyrdy, dep habarlady almaty-akshamy.kz. 

Úkimet basshysy qoldanystaǵy rásimder kóbine memlekettik satyp alýlar úderisiniń ádeıi keshiktirilýine ákelip soqtyratynyn, onyń saldarynan jańa jobalardy iske asyrý jáne tutastaı alǵanda ekonomıkanyń damýy baıaýlaıtynyn atap ótti.

Mundaı jaǵdaıda pármendi túrde alǵa jyljý kerek. Óıtkeni qazirgi satyp alý júıesi bárin tejep otyr. Konkýrstarǵa shaǵymdaný rásiminiń tóńireginde tutas astyrtyn bıznester paıda boldy. Keıin bul máselege qaıta aınalyp soqpas úshin biz jaǵdaıdy túbegeıli ózgertýimiz kerek, – dedi Oljas Bektenov Úkimettegi keńeste.

Bul rette ol tıisti yntalandyrý tetikteri arqyly satyp alýlardaǵy otandyq taýarlardyń úlesin edáýir arttyrý qajettigine toqtaldy. Bul – respýblıkada áli jolǵa qoıylmaǵan jańa óndiristerdi qoldaýǵa da qatysty másele.

Oljas Bektenov memlekettik organdarǵa qysqa merzimde sarapshylarmen jáne bıznes-qoǵamdastyqpen birge qajetti sharalardy pysyqtaýdy, olardy Parlament qaraýyndaǵy zańnamalyq túzetýlerge engizýdi tapsyrdy.

Talqylaý barysynda «Atameken» UKP tóralqasynyń tóraǵasy Raıymbek Batalov atalǵan tásilderdi qoldap, olardy iske asyrý úshin mınıstrliktermen birlesip, belsendi jumys isteýge daıyn ekendigin jetkizdi.

Sondaı-aq jıynda QazTech memlekettik basqarýdyń biryńǵaı sıfrlyq platformasyn iske qosý jáne turǵyn úı saıasatyn reformalaý máseleleri qaraldy.