بىلتىر تۇرعىن ءۇي جاعدايى مەن دەنساۋلىعىن جاقسارتۋ ءۇشىن زەينەتاقى جيناعىن پايدالانعانداردىڭ ۇلەسى ەكى ەسە ارتقان.
ارنايى شوتقا 565 ملرد تەڭگە اۋدارىلدى. زەينەتاقى جيناقتارىنىڭ ءبىر بولىگىن قولدانۋعا نيەت بىلدىرگەندەر اسىرەسە جىلدىڭ ەكىنشى جارتىسىندا بەلسەندى بولا تۇسكەن. وتكەن جىلدىڭ سوڭىندا زەينەتاقى جيناعىنىڭ كومەگىمەن تۇرعىن ءۇي جاعدايىن جاقسارتقاندار كوبەيدى، دەپ حابارلايدى aqshamnews.kz 24.kz-كە سىلتەمە جاساپ.
ارنايى شوتقا 69،5 ملرد تەڭگە تۇسكەن. بۇل قاراشاداعى كورسەتكىشتەن 50%-عا ارتىق. وتىنىمدەردى ماقۇلداۋ 58%-عا ارتىپ، 90 مىڭعا جۋىقتاعان. بولىنگەن سوما نەگىزىنەن تۇرعىن ءۇي جيناعىن تولىقتىرۋعا جۇمسالدى. تەك 7 پايىزى باسپانا ساتىپ الۋ كەزىندە ەسەپ ايىرىسۋعا قولدانىلعان. دەنساۋلىعىن تۇزەۋگە نيەت بىلدىرگەندەردىڭ دە قاراسى قالىڭ. باس-اياعى 36 مىڭ ءوتىنىم يەلەرىنىڭ ارنايى شوتىنا 33 ملرد تەڭگە ءتۇستى. ونىڭ باسىم بولىگى ستوماتولوگيالىق قىزمەت اقىسىن وتەۋگە جۇمسالعان. ەسكە سالايىق، بيىل زەينەتاقى جيناعىنىڭ ءبىر بولىگىن شەشىپ الۋ شەگى وزگەرگەن جوق.
تازا ينۆەستيسيالىق كىرىس ₸2،78 ترلن جەتتى
سونداي-اق ەلدە جۇمىس بەرۋشىنىڭ مىندەتتى زەينەتاقى جارنالارى بويىنشا تازا ينۆەستيسيالىق كىرىس 14 ملرد تەڭگەدەن استى. ءسويتىپ جيناق كولەمى 204 ملرد تەڭگە بولعان. جارنانىڭ بۇل ءتۇرى بىلتىر عانا ەنگىزىلگەن ەدى. جالپى وتكەن جىلدىڭ 11 ايىندا قازاقستاندىقتاردىڭ تازا ينۆەستيسيالىق كىرىسى 2 ترلن 78 ملرد تەڭگەگە جەتتى. بۇل الدىڭعى سايكەس كەزەڭنەن 123 پايىزعا ارتىق.
جالاقىسىن كونۆەرتپەن الاتىندار كوپ
وكىنىشكە قاراي، الەۋمەتتىك كەپىلدەردى، ەڭبەك قۇقىعىنىڭ قورعالۋىن، ءتىپتى كەلەشەكتە زەينەتاقىمەن قامسىزدانۋدى قۇنتتامايتىن ازاماتتار بار. ەلىمىزدەگى ءاربىر ءۇشىنشى جۇمىسشى رەسمي تىركەۋسىز ەڭبەك ەتىپ ءجۇر. باسىم بولىگى – ەر ازاماتتار.
Adam Research ساراپشىلارى جالدامالى جۇمىسشىلاردىڭ كەلىسىمشارت جاساۋعا اسىقپايتىنىن ايتتى. ولاردىڭ ۇلەسى – 6 پايىز. سونداي-اق مەملەكەتتەن كىرىسىن جاسىرىپ وتىرعان كاسىپ يەلەرى دە بار. ال ساۋالناماعا قاتىسقانداردىڭ 16 پايىزى جالاقىسىن كونۆەرتپەن الاتىنىن مويىندادى. رەسمي تىركەۋسىز جۇمىس ىستەپ جاتقانداردىڭ كوبى – جاستار نەمەسە زەينەتكەرلەر. دەنى تۇركىستان، الماتى وبلىستارىندا جانە شىمكەنت قالاسىندا تۇرادى. زەرتتەۋشىلەردىڭ بايقاۋىنشا، كولەڭكەلى كاسىپتى دوڭگەلەتىپ وتىرعاندار باتىس ايماقتاردا شوعىرلانعان. ال رەسمي دەرەككە سۇيەنسەك، ەلدە 9 ملن ادام ەكونوميكانىڭ ءار سالاسىندا ەڭبەك ەتەدى.
سپابەك سادىقوۆ، ق ر ەحاقم حالىقتى جۇمىسپەن قامتۋ دەپارتامەنتىنىڭ باس ساراپشىسى:
-ونىڭ ىشىندەگى 7 ملن استامى جالدامالى جۇمىسكەرلەر دە، 2،2 ملن ءوزىن-وزى جۇمىسپەن قامتىعاندار بولىپ تابىلادى. ءۇشىنشى توقسانى بويىنشا وسى جىلدىڭ جۇمىسسىزدىق دەڭگەيى 4،6% قۇرايدى نەمەسە 450 مىڭعا جۋىق ادام.
2030 جىلعا قاراي 2 ملن مامانعا سۇرانىس تۋىندايدى وسى رەتتە ايتا كەتەيىن، الداعى 5 جىلدا 2 ملن مامانعا تاپشىلىق تۋىندايدى. بۇل تۋرالى ەڭبەك رەسۋرستارىن دامىتۋ ورتالىعى حابارلادى.
ارنايى زەرتتەۋ ناتيجەسى جۇمىس ىستەپ جۇرگەن جاستاردىڭ 20%-ى باسقا سالالاردا قىزمەت ەتەتىنىن كورسەتتى. ءقازىر اۋىل شارۋاشىلىعى، ءبىلىم بەرۋ، قۇرىلىس، دەنساۋلىق ساقتاۋ، ت.ب. سالالاردى قوسا العاندا ءۇش ءجۇز مىڭ ادام جەتىسپەيدى. بيىل مەملەكەت باسشىسىنىڭ جارلىعىمەن جۇمىسشى ماماندىقتار جىلى جاريالاندى. قاسىم-جومارت توقايەۆ ءوز سوزىندە باسەكەگە قابىلەتتى ەكونوميكا ءتۇزۋ ءۇشىن دە جۇمىسشى جانە باسقا دا ءتۇرلى سالاداعى مامانداردىڭ الەۋەتىن ارتتىرۋدى تاپسىردى.
دميتريي شۋمەكوۆ، ەڭبەك رەسۋرستارىن دامىتۋ ورتالىعىنىڭ دەپارتامەنت ديرەكتورى:
-اسىرەسە جوعارى ءبىلىمدى قاجەت ەتپەيتىن سالالاردا مامان تاپشىلىعى قاتتى بايقالادى. تاجىريبەلى ساتۋشى، كۇزەتشىلەر از. قازىرگى تاڭدا تاربيەشىلەردى، سونداي-اق ءبىلىم بەرۋ سالالارىندا بولىمدەردى باسقاراتىن ادامداردى ىزدەيمىز. ەلەكتر ءمونتورلارى، دانەكەرلەۋشىلەر جەتىسپەيدى. سونىمەن قاتار مۇعالىمدەر، زاڭگەرلەر، جاتتىقتىرۋشىلار، ەسەپشىلەر مەن تىگىنشىلەرگە سۇرانىس ءتۇسىپ جاتىر.
مامان تاپشىلىعى بار، دەگەنمەن جۇمىس ىزدەپ سابىلىپ جۇرگەندەردىڭ دە قاراسى قالىڭ. ءقازىر ەڭبەك كز پورتالىندا 235 مىڭ ازاماتتىڭ تۇيىندەمەسى تۇر. ەلدەگى نيت ساناتىنداعى جاستاردىڭ ۇلەسى 6 پايىزدان اسادى.