الماتى قالاسىندا جالپى ءبىلىم بەرەتىن مەكتەپتەردىڭ ينكليۋزيۆتى ءبىلىم بەرۋ سالاسىندا جۇمىس ىستەيتىن پەداگوگتەرىنە ارنالعان بىلىكتىلىكتى ارتتىرۋ كۋرستارى ءوتتى. وقىتۋ جۇمىستارىن وتاندىق جانە شەتەلدىك جەتەكشى ساراپشىلار جۇرگىزدى.
جوبا الماتى قالاسى ءبىلىم باسقارماسىنىڭ باستاماسىمەن جانە «تمد ەلدەرىندە ءبىلىم بەرۋدى ىلگەرىلەتۋ جونىندەگى حالىقارالىق قورىنىڭ» ۇيىمداستىرۋىمەن جۇزەگە اسىرىلدى.
وقىتۋ ەكى كەزەڭنەن تۇردى: 13–17 قازان ارالىعىندا ونلاين فورماتتا جانە 27–31 قازان كۇندەرى وفلاين رەجيمدە ءوتتى. ۇيىمداستىرۋشىلاردىڭ ايتۋىنشا، كۋرستار مەگاپوليستەگى مەكتەپتەردە ينكليۋزيۆتى ءبىلىم بەرۋدىڭ ساپاسىن ارتتىرۋعا باعىتتالعان. وقىتۋعا 300 پەداگوگ قاتىستى، ولاردىڭ 100ء-ى — باستاۋىش سىنىپ مۇعالىمدەرى، ال 200ء-ى — ءپان مۇعالىمدەرى. كەمىندە 80 ساعاتقا ەسەپتەلگەن باعدارلاما اياسىندا پەداگوگتەر ەرەكشە ءبىلىم بەرۋدى قاجەت ەتەتىن بالالاردى (ەبق) وقىتۋدىڭ زاماناۋي تاسىلدەرىن مەڭگەردى.
كۋرستىڭ نەگىزگى ماقساتى – پەداگوگتەردىڭ ينكليۋزيۆتى تاجىريبەنى ۇيىمداستىرۋ جانە ەنگىزۋ بويىنشا كاسىبي قۇزىرەتتىلىگىن ارتتىرۋ. اتاپ ايتقاندا، پەداگوگتەردە ينكليۋزيۆتى ءبىلىم بەرۋ تۋرالى جۇيەلى تۇسىنىك قالىپتاستىرۋ، ەبق بار بالالارعا پسيحولوگيالىق-پەداگوگيكالىق باعالاۋ جۇرگىزۋ الگوريتمدەرىن ۇيرەتۋ. سونداي-اق ەرەكشە قاجەتتىلىكتەرى بار بالالارعا ارنالعان وقۋ باعدارلامالارى مەن وقىتۋ ادىستەرىن بەيىمدەۋ داعدىلارىن دامىتۋعا كومەك كورسەتۋ.
«بۇگىنگى تاڭدا ءاربىر بالا ءۇشىن مەكتەپتەردە تەڭ ءبىلىم الۋ مۇمكىندىكتەرىن جاساۋ بۇرىنعىدان دا ماڭىزدى. بۇل كۋرستار – پەداگوگتەرىمىزدىڭ جۇمىس بارىسىندا ۇزدىك حالىقارالىق ادىستەمەلەر مەن يننوۆاسيالىق شەشىمدەردى قولدانۋىنا كومەكتەسەتىن تاجىريبەلىك قۇرال»، – دەدى الماتى قالاسى ءبىلىم باسقارماسى جانىنداعى ءبىلىم بەرۋدەگى جاڭا تەحنولوگيالار قالالىق عىلىمي-ادىستەمەلىك ورتالىعىنىڭ ديرەكتورى ارداق سماعۇلوۆا.