"الماتى – تاشكەنت" باعىتىنداعى پويىزدار كۇن سايىن جۇرەتىن بولادى، - دەپ حابارلايدى Aqshamnews.kz ءتىلشىسى.
"جولاۋشىلار تاسىمالى" اق 2025 جىلعى 14 جەلتوقساننان باستاپ «الماتى – تاشكەنت» باعىتى بويىنشا Talgo پويىزىنىڭ كۇندەلىكتى قاتىنايتىنىن جاريالادى. بۇل وزگەرىس قازاقستان مەن وزبەكستان اراسىندا تۇراقتى جانە قولايلى قاتىناستى قامتاماسىز ەتۋدى كوزدەيدى.
كومپانيا مالىمەتىنشە، كۇن سايىنعى رەيستەر تاۋلىگىنە 400-دەن استام جولاۋشىنى تاسىمالداۋعا مۇمكىندىك بەرەدى. باعىتقا ۇزاق ساپارعا ارنالعان بارلىق قاجەتتى جايلىلىقپەن جابدىقتالعان زاماناۋي Talgo قۇرامدارى شىعارىلادى.
كۇندەلىكتى قاتىناستىڭ باستالۋى ەكى ەل اراسىنداعى تۋريستىك اعىندى ارتتىرۋعا، سونداي-اق مادەني جانە ىسكەرلىك بايلانىستاردى كۇشەيتۋگە مۇمكىندىك بەرەدى. بۇل باعىت جولاۋشىلار اراسىندا بۇرىننان جوعارى سۇرانىسقا يە.
بيلەتتەردى قايدان الۋعا بولادى:
– bilet.railways.kz رەسمي سايتىنان؛
– تەمىرجول ۆوكزالدارىنىڭ بيلەت كاسسالارىنان.
تولىق اقپاراتتى 1433 نومىرىنە قوڭىراۋ شالىپ نەمەسە tablo-railways.kz ونلاين-تابلوسىنان الۋعا بولادى.