ۆيسە-مينيستر دەنساۋلىق ساقتاۋ جۇيەسىندەگى جالاقى ماسەلەسىنە قاتىستى پىكىر ءبىلدىردى، - دەپ حابارلايدى Aqshamnews.kz ءتىلشىسى.
دەنساۋلىق ساقتاۋ ۆيسە-مينيسترى تيمۋر مۇراتوۆ الەۋمەتتىك جەلىدە پاتولوگواناتومنىڭ تومەن جالاقى جايلى جازباسىنا قاتىستى پىكىرىن ءبىلدىردى. ونىڭ ايتۋىنشا، قازاقستاندىق دارىگەرلەردىڭ ەڭبەكاقىسى راسىندا دا جەتكىلىكسىز.
"دارىگەرلەر از الادى. الەمدە كلينيكالىق مەديسينا ەڭ جوعارى اقى تولەنەتىن سالالاردىڭ ءبىرى. ءبىراق ەلدەگى قازىرگى ەكونوميكالىق جاعدايدى ەسكەرۋىمىز كەرەك. وكىنىشكە قاراي، بۇدان ارتىق دەڭگەيدە قامتاماسىز ەتە الماي وتىرمىز"، – دەدى مۇراتوۆ ۇكىمەتتەگى بريفينگتە.
ۆيسە-مينيستردىڭ ايتۋىنشا، اۋرۋحانالار مەن ەمحانالار اقىسىز مەديسينالىق كومەكتىڭ كەپىلدى كولەمىنە كىرمەيتىن جانە ءامسق ارقىلى وتەلمەيتىن قوسىمشا اقىلى قىزمەتتەر كورسەتۋ ارقىلى قوسىمشا تابىس تابا الادى.
"مىسالى، بوسانۋشى ايەلدەر ناقتى دارىگەردى تاڭداۋدى قالاسا، بۇل – اقىلى سەرۆيس. تۇسكەن قاراجات مەكەمەدە قالمايدى، قىزمەتكەرلەرگە ديففەرەنسيالدى تولەم نەمەسە سىياقى رەتىندە بەرىلەدى"، – دەپ ءتۇسىندىردى ول.
سونداي-اق مۇراتوۆ دارىگەرلەردىڭ ايلىق دەڭگەيى مىندەتتى مەديسينالىق ساقتاندىرۋ جۇيەسىنە تىكەلەي تاۋەلدى ەكەنىن اتاپ ءوتتى.
"جۇمىس بەرۋشى مەن قىزمەتكەردىڭ جارنالارى جوعارى ەلدەردە، مىسالى، وڭتۇستىك كورەيادا، دارىگەرلەردىڭ جالاقىسى دا ايتارلىقتاي جوعارى"، – دەدى ۆيسە-مينيستر.
ونىڭ مالىمەتىنشە، قازاقستاندا دارىگەرلەردىڭ مەدياندىق ايلىعى شامامەن 400 مىڭ تەڭگە. بۇعان دەيىن مينيستر اقمارال ءالنازاروۆا ۇكىمەت وتىرىسىندا ءدال وسىنداي دەرەك كەلتىرگەن. ال ەكس-مينيستر اجار عينيات 2023 جىلعا قاراي دارىگەرلەردىڭ ورتاشا جالاقىسى 550 مىڭ تەڭگەگە جەتەدى دەپ مالىمدەگەن ەدى.