جەتىسۋ اۋدانىندا قوعامدىق كەڭىستىكتى اباتتاندىرۋ مەن قولايلى قالالىق ورتا قۇرۋ جۇمىستارى اياقتالىپ قالدى. اۋدان اكىمى ءلاززات جىلقىبايەۆانىڭ ايتۋىنشا، بۇل جوبالار تۇرعىنداردىڭ ءومىر ءسۇرۋ ساپاسىن ارتتىرىپ، قالانىڭ كوككە ورانعان زامانعا ساي كەلبەتىن قالىپتاستىرۋعا باعىتتالعان.
سەيفۋللين مەن جانسۇگىروۆ قيىلىسىنداعى كولىك ايرىعى ماڭىنداعى قوعامدىق كەڭىستىكتى اباتتاندىرۋ نەگىزگى جوبانىڭ ءبىرى بولدى. جالپى اۋماعى 3،4 گەكتار بولاتىن بۇل جەردە 30،4 مىڭ م² اۋماقتى كوگالداندىرىپ، 5،8 مىڭ م² جەرگە تاس (برۋسچاتكا) توسەلدى. سونىمەن قاتار، 7 ۇڭعىما بۇرعىلانىپ، 3،5 گەكتار اۋماققا اۆتوماتتى سۋارۋ جۇيەسى ورناتىلعان. مۇندا 192 اعاش، 14 مىڭ بۇتا مەن 2 400 گۇل ەگىلىپ، ەكى الپىلىك توبەشىك جاسالدى.
«گۇلدەر» پاركىنىڭ جوندەۋ جۇمىسى دا اياقتالدى. مۇندا 6 مىڭ م² اۋماققا ءبىرجىلدىق جانە كوپجىلدىق گۇلدەر ەگىلىپ، 750 م² جەر كوگالداندىرىلدى. 4 ۇڭعىما بۇرعىلانىپ، 4،5 مىڭ م² اۋماققا اۆتوماتتى سۋارۋ جۇيەسى ورناتىلدى. پارك اۋماعىندا ءۇش ساندىك توعان مەن گۇلمەن كومكەرگەن اركالار پايدا بولدى.
بۇدان بولەك، قۇداباي ۇلى مەن ارالتوبە كوشەلەرىنىڭ بويىنداعى ۋچاسكەلەر مەن جۇمابايەۆ كوشەسىندەگى كوپىر اباتتاندىرىلدى.
12 جەردە اۆتوماتتى سۋارۋ جۇيەسى ورناتىلىپ، 15 ۇڭعىما بۇرعىلاندى، 76 مىڭ م² اۋماققا كوگال ەگىلدى. بۇل جۇمىستار قالانىڭ ماڭىزدى باعىتى – رىسقۇلوۆ–سەيفۋللين، رىسقۇلوۆ–ءسۇيىنباي، سەرىكوۆ، سولتۇستىك اينالما جول–بوكەيحانوۆ قيىلىسىندا اتقارىلدى. ماقساتى - جاسىل قوردى ساقتاپ، اۋداندى ەكولوگيالىق تۇرعىدا بارىنشا جايلى ەتە ءتۇسۋ.
قاجەتتىلىگى بار ادامدار ءۇشىن قولجەتىمدى ورتا قۇرۋعا دا ەرەكشە كوڭىل بولىنگەن. 18 جەرۇستى جاياۋ جۇرگىنشى وتكەلىندەگى تىك جانە كولدەنەڭ كوتەرگىشتەر جوندەلىپ، اۋىستىرىلدى.
سونىمەن قاتار، اباتتاندىرۋ اياسىندا قاراسۋ وزەنى ۇستىندەگى كوپىرگە كۇردەلى جوندەۋ جۇرگىزىلىپ، پەرۆومايكا اۋىلىنىڭ (سولتۇستىك-باتىس بولىگى) زيرات اۋماعىنا 163 م² قورشاۋ ورناتىلىپ، قاقپا مەن ەسىك جاسالدى.
كەلەر جىلى جەتىسۋ اۋدانىندا اباتتاندىرۋ جوبالارى جالعاسىن تابادى: اۆتوماتتى سۋارۋ جۇيەلەرىن كەڭەيتۋ، جاڭا دەمالىس ايماقتارىن قۇرۋ مەن تۇرعىلىقتى جايلارداعى تروتۋارلاردى قايتا جاڭارتۋ جوسپارلانعان.
«اباتتاندىرۋ – بۇل جاي جوندەۋ ەمەس. بۇل – تۇرعىندارعا جايلى ءومىر سۇرۋگە، دەمالۋعا جانە بالالارىمەن سەرۋەندەۋگە مۇمكىندىك بەرەتىن قالالىق ورتا قۇرۋ. ءبىز تابيعاتقا قامقورلىقتى ۇيلەستىرگەن زامانعا ساي اۋدان قالىپتاستىرىپ جاتىرمىز»، - دەپ تۇيىندەدى ءوز ءسوزىن ءلاززات جىلقىبايەۆا.