جەتىسۋ اۋدانىندا جول-كولىك ينفراقۇرىلىمىن دامىتۋدى كوزدەيتىن ۇلكەن جۇمىس ىستەلىپ جاتىر. اسىرەسە تۇرعىنداردىڭ قاۋىپسىزدىگى مەن جايلىلىعىن قامتاماسىز ەتۋگە ەرەكشە كوڭىل ءبولىپ وتىر اۋداندا.
اۋدان اكىمى ءلاززات جىلقىبايەۆا وڭىرلىك كوممۋنيكاسيالار قىزمەتىنىڭ الاڭىندا حابارلاعانداي، 2025 جىلى جالپى ۇزىندىعى 26 شاقىرىمدى قۇرايتىن 33 كوشەدە ورتاشا جول جوندەۋ جۇمىستارى جۇرگىزىلگەن.
سونىمەن قاتار، «تەحنيكالىق تروتۋارلاردى اباتتاندىرۋ» جوباسى اياسىندا 11 كوشەدەگى جۇمىس ءبىتتى. ولاردىڭ قاتارىندا كوكمايسا شاعىن اۋدانى، بورالداي، جانگەلدين، ەسەنوۆ، جەتىسۋ، قۇداباي ۇلى، شەكسپير كوشەسى، سونداي-اق سەيفۋللين داڭعىلى مەن سولتۇستىك اينالما جولى بار. جۇمىستىڭ جالپى اۋقىمى 11 مىڭ شارشى مەتردەن اسىپ ءتۇستى.
اۋدانداعى شۇڭقىرلار دا جوندەلدى: جول جامىلعىسىنىڭ 33 مىڭ شارشى مەتردەن استام اقاۋى جويىلىپ، 60 جاڭا ليۋك ورناتىلدى، سونداي-اق 257-دەن استام ليۋك پەن جاڭبىر سۋىن قابىلدايتىن قۇدىق سالىندى.
«كولىك ينفراقۇرىلىمىن دامىتۋ – جۇمىسىمىزدىڭ ەڭ ماڭىزدى باعىتىنىڭ ءبىرى. ءبىز جەتىسۋ اۋدانىنىڭ جولدارىن ىڭعايلى، ءقاۋىپسىز ءارى ۇزاققا شىدايتىن ەتۋدى ماقسات ەتىپ وتىرمىز»، - دەيدى ءلاززات جىلقىبايەۆا.
2026 جىلى جول جوندەۋ بارىسىندا 30 مىڭ شارشى مەتر اسفالت جابىندىسى جوندەلمەك. سونداي-اق ۇزىندىعى 5 220 مەتر (شامامەن 10 440 شارشى مەتر) تروتۋارلاردى قايتا قۇرىپ، اباتتاندىرۋ جاعى قولعا الىنباق.
تۇرعىنداردىڭ ءوتىنىشى بويىنشا جولداردى كەڭەيتۋ مەن اباتتاندىرۋ ءۇشىن قاجەتتى جەر ۋچاسكەلەرى ساتىپ الىنىپ جاتىر.