قۋات حاميتوۆ اكتەر ەركەبۇلان توقتارعا كاسىبي بوكس ەرەجەسىمەن جەكپە-جەك وتكىزۋدى ۇسىندى، - دەپ حابارلايدى Aqshamnews.kz.
بەلگىلى MMA فايتەرى قۋات حاميتوۆ الەۋمەتتىك جەلىدە اكتەر ەركەبۇلان توقتارعا كاسىبي بوكستان جەكپە-جەك وتكىزۋدى رەسمي تۇردە ۇسىندى. 37 جاستاعى سپورتشى مۇنداي كەزدەسۋ قازاقستان بوكسى ءۇشىن جىلدىڭ ەڭ شۋلى وقيعاسىنا اينالۋى مۇمكىن ەكەنىن ايتادى.
حاميتوۆتىڭ سوزىنشە، بۇل باستامانى ءوزى كوتەرگەن، ال توقتار ۇسىنىستان بەيحابار بولعان.
"قازاقستانداعى پروموۋتەرلەر ۇيىمداستىراتىن تۋرنيرلەردىڭ دەڭگەيى كوڭىل كونشىتپەيدى. شىنايى شوۋ مەن ماسشتاب جوق. بارلىعى جاساندى، ءبارى وتىرىك سەكىلدى… ال ناعىز قىزىق كەزدەسۋ – مەنىڭ جانە ەركەبۇلان توقتاردىڭ اراسىنداعى ايقاس بولماق! مۇنداي جەكپە-جەك ەلىمىزدەگى ەڭ ۇلكەن وقيعاعا اينالارى ءسوزسىز"، – دەدى قۋات حاميتوۆ.
توقتاردىڭ جاۋابى ۇزاق كۇتتىرمەدى
اكتەر ەركەبۇلان توقتار حاميتوۆتىڭ ۇسىنىسىنا ۆيدەو ارقىلى جاۋاپ بەرىپ، جەكپە-جەككە كەلىسەتىنىن، ءتىپتى ىقتيمال كۇن رەتىندە ءوز تۋعان كۇنى 29 جەلتوقساندى اتادى.
"مەن بالا كەزدە سەنىڭ فاناتىڭ بولدىم. ەندى سەن ماعان شاقىرۋ جولداپ وتىرسىڭ. جەكپە-جەك بولادى. ءيا، داۋى دا ۇلكەن بولادى. ءبىراق قۇلاۋ دا ۇلكەن بولادى"، - دەدى اكتەر.
ەركەبۇلان توقتار پوپ-MMA ارقىلى تانىلىپ، كەيىن كاسىبي دەڭگەيدە ونەر كورسەتە باستاعان. Topology دەرەگى بويىنشا ونىڭ رەكوردى — 11–3. ال حاميتوۆتىڭ تاجىريبەسى الدەقايدا مول — 27–8–2، سونىمەن قاتار ول بوكس رينگىندە دە جەڭىسكە جەتكەن.
حاميتوۆ: «توقتاردىڭ بوكسى كەيبىر MMA سپورتشىلارىنان مىقتى»
قۋات بۇل جەكپە-جەكتى ءوزىنىڭ كاسىبي MMA مانسابىنا كەدەرگى بولمايتىنىن ايتتى. 23 قازاندا ول Absolute Championship Akhmat (ACA) ۇيىمىنداعى دەبيۋتىندە جەڭىسكە جەتكەن.
"اسا-دا ونەر كورسەتۋدى جالعاستىرامىن. كەلەسى جىلى قايتا ورالعىم كەلەدى. ءقازىر فورمامدى جوعالتپاۋ ءۇشىن بوكس نەمەسە كورسەتىلىمدىك جەكپە-جەكتەردە ونەر كورسەتە بەرەمىن"، — دەدى سپورتشى.
جەكپە-جەكتىڭ ناقتى وتەتىن ۋاقىتى ازىرگە بەلگىسىز. ۇيىمداستىرۋشىلار تاراپىنان دا رەسمي مالىمەت جاريالانعان جوق.