وڭىرلىك كوممۋنيكاسيالار قىزمەتىنىڭ باسپا ءسوز الاڭىندا جەتىسۋ اۋدانىنىڭ اكىمى ءلاززات جىلقىبايەۆا اۋداننىڭ الەۋمەتتىك جانە ءبىلىم بەرۋ ينفراقۇرىلىمىنىڭ دامۋ بارىسى تۋرالى باياندادى. اكىمنىڭ ايتۋىنشا، بيىلعى 10 ايدا اۋدان بويىنشا جاڭا نىسانداردىڭ قۇرىلىسى قارقىندى ءجۇرىپ، بار مەكەمەنى جاڭعىرتۋدى كوزدەيتىن قىرۋار جۇمىس ىستەلىپ جاتىر.
جەتىسۋ اۋدانىندا 3 897 وقۋشى ورنىنا تاپشىلىق بار. بۇل ماسەلەنى شەشۋ ماقساتىندا «كەلەشەك مەكتەپتەرى» ۇلتتىق جوباسى اياسىندا ناقتى ءىس-شارالار قابىلدانىپتى. قازىرگى تاڭدا بورالداي كوشەسىندە 1 200 ورىندىق جاڭا مەكتەپتىڭ قۇرىلىسى اياقتالىپ قالدى. نىساننىڭ دايىندىق دەڭگەيى – 93%، ونى 2025 جىلدىڭ قاراشا ايىندا پايدالانۋعا بەرۋ جوسپارلانعان.
سونىمەن قاتار №43 پەن №112 مەكتەپتەردە قايتا جاڭارتۋ جۇمىستارى جۇرگىزىلىپ جاتىر. ال №87 مەكتەپكە قوسىمشا 300 ورىندىق جاڭا عيمارات سالۋعا ارنالعان جوبالىق-سمەتالىق قۇجاتتاما ازىرلەنە باستادى.
مەكتەپپەن قاتار بالاباقشا ينفراقۇرىلىمى دا دامىپ كەلەدى. ءقازىر №163 بالاباقشا مەن راتۋشنىي كوشەسى، 139 مەكەنجايىندا ورنالاسقان مەكتەپكە دەيىنگى ۇيىمدى كەڭەيتۋگە ارنالعان جوبالىق-سمەتالىق قۇجاتتاما دايىندالىپ جاتىر. بۇل جۇمىس كەلەر جىلدىڭ ءى توقسانىندا باستالادى.
مەديسينالىق ينفراقۇرىلىم سالاسىندا دا وڭ وزگەرىس بار. اۋدان اۋماعىندا جىل سوڭىنا دەيىن ەكى جاڭا ەمحانا اشىلادى: ءبىرى – نۇسىپبەكوۆ كوشەسىندە، ەكىنشىسى – وماروۆ كوشەسىندە. سونداي-اق، بيىل شىلدە ايىندا №21 ەمحانا كۇردەلى جوندەۋدەن ءوتىپ، پايدالانۋعا بەرىلگەن ەدى.
الەۋمەتتىك سالادا مەملەكەتتىك الەۋمەتتىك تاپسىرىس اياسىندا بەس جوبا ىسكە اسىرىلا باستادى. ولاردىڭ قاتارىندا وتباسىنى قولداۋ ورتالىعى، مۇمكىندىگى شەكتەۋلى ازاماتتارعا كومەك كورسەتۋ ورتالىعى، «شىڭعا ورلەۋ» الەۋمەتتىك كلۋبى مەن ەكى بەلسەندى ۇزاق ءومىر ءسۇرۋ ورتالىعى جانە بار.
جىل باسىنان بەرى اۋدان تۇرعىندارىنا 11 مىڭنان استام الەۋمەتتىك قىزمەت كورسەتىلدى. ولاردىڭ قاتارىندا پسيحولوگيالىق جانە زاڭگەرلىك كەڭەس بەرۋ، ءبىلىم بەرۋ مەن شىعارماشىلىق باعىتتاعى ساباقتار بار.