بۇگىن اباي ۋنيۆەرسيتەتى الماتىنىڭ ىرگەسىندە اگروبيوستانسيا كەشەنىن رەسمي تۇردە ىسكە قوستى. اشىلۋىنا ۋنيۆەرسيتەت باسشىلىعى، پروفەسسورلىق-وقىتۋشىلار قۇرامى جانە ستۋدەنتتەر قاتىسىپ، زاماناۋي اگروبيوستانسيانىڭ لەنتاسى سالتاناتتى تۇردە قيىلدى. بۇل جاراتىلىستانۋ جانە گەوگرافيا فاكۋلتەتىنىڭ ءبىلىم الۋشىلارىنا زەرتتەۋ جۇمىستارىمەن اينالىسىپ، تاجىريبە جاساۋعا جاسالعان ۇلكەن مۇمكىندىك.
ستۋدەنتەردىڭ تەوريالىق ءبىلىمىن تاجىريبەمەن ۇشتاستىرۋعا، عىلىمي زەرتتەۋ جۇمىستارىن جۇرگىزۋگە ارنالعان اگروبيوستانسيا الماتى وبلىسى ەڭبەكشىقازاق اۋدانى جاڭاشار اۋىلىندا ورنالاسقان. 38 گەكتاردان استام اۋماقتى قامتيتىن كەشەن ستۋدەنتتەرگە وقۋ-تاجىريبەلىك ساباقتارىن وتكىزۋگە، عىلىمي جوبالاردى جۇزەگە اسىرۋعا جانە جاڭا اگروتەحنولوگيالاردى سىناقتان وتكىزۋگە مۇمكىندىك بەرەدى. زاماناۋي وقۋ-زەرتحانالىق بازادا زەرتحانالار، 60 ادامعا ارنالعان جاتاقحانا، اسحانا، جۋىناتىن بولمەلەر، سپورت الاڭدارى مەن كولىك تۇراعى قاراستىرىلعان.
«بۇگىن – ۋنيۆەرسيتەتىمىز ءۇشىن ماڭىزدى تاريحي كۇن. سەبەبى، ءبىلىم وردامىز تاعى دا ءبىر جاڭا نىسانمەن تولىقتى. بۇل – ۋنيۆەرسيتەتىمىزدىڭ زەرتتەۋ جوعارى وقۋ ورنىنا جاسالعان ۇلكەن قادام. اگروبيوستانسيا – تەوريا مەن تاجىريبەنىڭ سينتەزى. سوندىقتان، مۇنداي نىساننىڭ اشىلۋى ۋنيۆەرسيتەتىمىزدەگى عىلىمنىڭ دامۋىنا سەپتىگىن تيگىزەدى. بولاشاقتا بۇل جەردە تاجىريبەلىك جۇمىستار، عىلىمي زەرتتەۋ جۇمىستارى قىزۋ جۇرەدى دەپ سەنەمىن»، – دەدى اباي اتىنداعى قازۇپۋ باسقارما توراعاسى-رەكتورى بولات تىلەپ.
جاراتىلىستانۋ جانە گەوگرافيا فاكۋلتەتىندە وقيتىن ستۋدەنتتەر اگروبيوستانسيادا تاجىريبەلىك ساباقتارمەن اينالىسىپ، ماگيسترانتتار مەن دوكتورانتتار عىلىمي زەرتتەۋلەرىن جۇرگىزەدى. جوبالار توپىراق پەن سۋ رەسۋرستارىن ءتيىمدى پايدالانۋ، اۋىل شارۋاشىلىعى داقىلدارىن زەرتتەۋ، بيولوگيا، ەكولوگيا، گەوگرافيا سەكىلدى وقۋ باعدارلامالارى بويىنشا جاڭا تەحنولوگيالاردى سىناۋ ت.ب. باعىتتار بويىنشا وتكىزىلەدى.
«بۇگىن جاراتىلىستانۋ جانە گەوگرافيا فاكۋلتەتى ءۇشىن ەڭ قۋانىشتى كۇن. ءبىلىم الۋشىلار ءۇشىن تەوريا مەن تاجىريبەنى ۇيلەستىرىپ، ءبىلىمىن تەرەڭدەتىپ، عىلىمعا قىزۋعىشىلىعىن ارتتىراتىن بازا پايدا بولدى. ينفراقۇرىلىمدىق ۇلكەن بازادا ستۋدەنتتەر مەن جەتەكشىلەردىڭ عىلىممەن اينالىسۋىنا قولايلى جاعداي جاسالعان. اگروبيوستانسيانىڭ جۇمىسىن جانداندىرىپ، عىلىمي-ادىستەمەلىك ورتالىققا اينالدىرۋ ءبىزدىڭ ۇجىم مەن ستۋدەنتتەردىڭ قولىندا دەپ ويلايمىن»، – دەدى جاراتىلىستانۋ جانە گەوگرافيا فاكۋلتەتىنىڭ دەكانى كۇلاش كايمۋلدينوۆا.
كەشەن تابيعي-گەوگرافيالىق تۇرعىدان قولايلى ايماقتا ورنالاسقان. گيدروگەولوگيالىق زەرتتەۋلەر ناتيجەسىندە سۋ ۇڭعىمالارى قازىلىپ، ەگىستىك القاپتارىن سۋارۋعا مۇمكىندىك جاسالعان. اباي ۋنيۆەرسيتەتىنىڭ اگروبيوستانسياسى وقۋ-تاجىريبە بازاسى رەتىندە قىزمەت ەتەدى جانە ستۋدەنتتەردىڭ كاسىبي دايىندىعىن قولداۋعا باعىتتالعان.
سونىمەن قاتار، تۇساۋكەسەر راسىمىندە «تازا قازاقستان» اكسياسىنىڭ اياسىندا كوگالداندىرۋ مەن ەكولوگيالىق تابيعي رەسۋرستاردى بايىتۋ ماقساتىندا «ىلە الاتاۋ» ۇلتتىق پاركى 100 ءتۇپ اعاش كوشەتىن سىيعا تارتتى. اگروبيوستانسيانىڭ اشىلۋىندا ۋنيۆەرسيتەت باسشىلىعى مەن وقىتۋشى-پروفەسسورلار جانە ستۋدەنتتەر اۋماققا جاس وسىكدەردى وتىرعىزىپ، كەشەن مۇمكىندىگىمەن جان-جاقتى تانىستى.
اباي اتىنداعى قازۇپۋ
باسپا ءسوز قىزمەتى