وڭىرلىك كوممۋنيكاسيالار قىزمەتىنىڭ باسپا ءسوز الاڭىندا ءلاززات جىلقىبايەۆا اۋدان اۋماعىندا قولعا الىنعان اباتتاندىرۋ جۇمىسى جونىندە باياندادى. اكىمنىڭ ايتۋىنشا، بيىل اۋدان اۋماعىندا تۇرعىنداردىڭ جايلىلىعى مەن ەكولوگيالىق تەڭدىگىن ارتتىرۋعا باعىتتالعان اۋقىمدى جۇمىس قولعا الىنعان.
جىل باسىنان بەرى بىرنەشە ءىرى نىسان جاڭارتىلىپ، كوركەيتىلدى. سەيفۋللين، نازاربايەۆ پەن ابىلاي حان داڭعىلىنىڭ بويىنداعى بوس ايماقتاردى اباتتاندىرۋ اياقتالىپ قالدى. كەمەل ىقشاماۋدانىندا قاراسۋ وزەنى بويىنداعى جاعالاۋعا كۇردەلى جوندەۋ جۇرگىزىلىپ جاتىر. مۇندا ۇزىندىعى 1،5 شاقىرىم بولاتىن سەرۋەندەيتىن ايماق اشىلادى. اينابۇلاق ىقشاماۋدانىندا جاياۋ جۇرگىنشىلەر ارباتى جوندەلسە، قۇلاگەردە 83 كوپقاباتتى ءۇيدى قامتيتىن 28 اۋلا جاڭارتىلدى.
اباتتاندىرۋدىڭ ماڭىزدى بولىگى – «حالىق قاتىساتىن بيۋدجەت» باعدارلاماسى اياسىندا جۇزەگە اسقان جوبالار. تۇرعىنداردىڭ باستاماسىمەن 2 ميلليارد تەڭگەگە 30 جوبا قولعا الىندى. ونىڭ ىشىندە جاعالاۋلار مەن ساياباقتاردى اباتتاندىرۋ، بالالار مەن سپورت الاڭدارىن ورناتۋ، سەرۋەن ايماقتارىن قۇرۋ، كوگالداندىرۋ مەن اۆتوسۋارۋ جۇيەلەرىن ەنگىزۋ بار. سونىمەن قاتار الماتى – وسكەمەن جولىنىڭ بويىنا شۋدى وقشاۋلايتىن قالقاندار ورناتىلىپ، باتپاقتى اۋماقتار رەتكە كەلتىرىلدى.
قازىرگى ۋاقىتتا بەس جاڭا جوبانىڭ جوبالىق قۇجاتتاماسى ازىرلەنىپ جاتىر. ولاردىڭ قاتارىندا پاللادين كوشەسىندەگى 8،3 گەكتار اۋماقتى قامتيتىن جاسىل ايماقتى جاڭعىرتۋ مەن 2 گەكتارلىق كوكمايسا ساياباعىن قايتا جاڭارتۋ بار. سونداي-اق 48 اۋلانى جاڭارتۋ بويىنشا جوبالىق قۇجات دايىن – وندا گابيوندار، جارىقتاندىرۋ جۇيەلەرى، بالالار مەن سپورت الاڭدارى جانە شاعىن ساۋلەت نىساندارى ورناتىلادى.
«قولعا الىنعان بارلىق شارۋانىڭ ماقساتى – تۇرعىندارعا قولايلى، زامانعا ساي جانە ەكولوگيالىق تازا قالالىق ورتا قالىپتاستىرۋ. ءار ادام ءوز اۋدانىندا ءومىر ءسۇرىپ، دەمالىپ، وتباسىمەن ۋاقىت وتكىزۋگە جايلى جاعداي جاسالعانىن سەزىنۋى ءتيىس»، – دەيدى اۋدان اكىمى ءلاززات جىلقىبايەۆا.