ۇرپاق تاربيەسىندە داستۇرگە كەڭىنەن ورىن بەرۋ قانشا ايتسا دا جاۋىر بولمايتىن تاقىرىپ. جاقىندا №107 ليسەيدە ۇيىمداستىرىلعان سەمينار «قازاق حالقىنىڭ ۇلتتىق قۇندىلىقتارى – بالا تاربيەسىندەگى قۇندىلىق كوزى» دەگەن جىپ-جىلى اتاۋمەن ءوتتى. ءتول قۇندىلىقتىق ۇرپاق تاربيەسىندەگى ماڭىزى باسا ايتىلعان يگى شارا «ءبىرتۇتاس تاربيە» باعدارلاماسى اياسىندا ءوتىپ وتىر. ونىڭ ۇستىنە مەكتەپ ديرەكتورلارىنىڭ تاربيە ءىسى جونىندەگى ورىنباسارلارىنا باعىتتالعانىن دا ايتا كەتكەن ءجون.
مازمۇندى شاراعا قاتىسقان ءبىلىم سالاسىنىڭ وكىلدەرى وزدەرىنە ويماقتاي بولسىن وي ءتۇيىپ قايتارى ءسوزسىز. سول رەتتە №107 ليسەي ديرەكتورى ءۇ.اقاتان ۇلىنىڭ مىنا ءبىر پىكىرىن العا تارتا كەتەيىك:
«ۇلتتىق قۇندىلىقتاردى بويىنا سىڭىرگەن ەڭبەكقور، ادال، سانالى جاسامپاز ازاماتتى تاربيەلەۋ ءبىزدىڭ باستى ماقساتىمىز. حالقىمىزدا «تاربيە – تالبەسىكتەن» دەگەن ءسوز بەكەر ايتىلماسا كەرەك. وتباسىنان باستاۋ الاتىن تاربيە مەكتەپتە جالعاسىن تاۋىپ جاتادى. سوندىقتان ءبىزدىڭ الدىمىزدا وتە جاۋاپتى مىندەت – بويىندا يمانى بار، ۇلتتىق قۇندىلىقتى تۇيسىنە بىلەتىن ۇرپاق تاربيەلەۋ ماسەلەسى تۇر».
سەمينار بارىسىندا «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتى كەاق اعا عىلىمي قىزمەتكەرى ەربولات سەكسەنباي ۇلىنىڭ «مەكتەپ پەن وتباسىنىڭ ىنتىماقتاستىعى – تابىستى تۇلعانى تاربيەلەۋدىڭ فاكتورى» جانە ب.دوسىنبەكوۆانىڭ «ءبىرتۇتاس تاربيە باعدارلاماسى: «قازاق حالقىنىڭ ۇلتتىق قۇندىلىقتارى – بالا تاربيەسىندەگى قۇندىلىق كوزى» دەپ اتالاتىن تانىمدىق دۇنيەلەرى اسا قىزىعۋشىلىق تۋعىزدى.
سونىمەن قاتار، سەمينار قوناقتارى ا.نادىربەكوۆانىڭ ۇيىتقى بولۋىمەن وتكەن «جەتى اتاسىن بىلگەن ۇل، جەتى جۇرتتىڭ قامىن جەر» دەپ اتالاتىن اشىق تاربيە ساعاتىنا قاتىستى. ۇلتتىق قۇندىلىق تۋرالى ايتقاندا حالقىمىزدىڭ ۇلتتىق ويىندارى تۋرالى ايتپاۋ مۇمكىن ەمەس. جاس ۇرپاق تاربيەسىندە ۇلتتىق ويىننىڭ ماڭىزى وتە زور. سوندىقتان سوڭعى جىلدارى «توعىزقۇمالاق» ويىنى مەكتەپتەردە كەڭىنەن قولعا الىنا باستادى. قازىرگى تاڭدا ءپان رەتىندە دە وقىتىلىپ ءجۇر. ۇلتتىق ويىندى ا.يمانقۇل مەن د.جەتەنبايەۆ ۇيىمداستىردى. سونىمەن قاتار، «زاماناۋي تەحنولوگيالار ۇلتتىق داستۇرلەردى جويىپ جىبەرە مە؟» دەپ اتالاتىن دەبات سوڭى «اتادان – وسيەت، انادان – قاسيەت» اتتى جاڭا فورماتتاعى اتا-انالار جينالىسىنا ۇلاستى.