الماتىدا سپورتتىق ينفراقۇرىلىمدى دامىتۋ جانە بۇقارالىق سپورتتى ناسيحاتتاۋ بويىنشا اۋقىمدى جوبالار جۇزەگە اسىرىلىپ جاتىر. بۇل تۋرالى قالالىق سپورت باسقارماسىنىڭ وكىلدەرى حابارلادى.
2024-2025 جىلدارى مەگاپوليستە 6 جاڭا دەنەشىنىقتىرۋ-ساۋىقتىرۋ كەشەنى پايدالانۋعا بەرىلدى، سونداي-اق 2 سپورت نىسانى جەكە ينۆەستيسيا ەسەبىنەن سالىندى.
الاتاۋ اۋدانىنداعى نۇركەنت شاعىناۋدانىندا جەكە ينۆەستيسيا ەسەبىنەن جاڭا تەننيس ورتالىعى اشىلدى. كەشەننىڭ قۇرامىنا HARD جابىندى 4 جابىق جانە 4 اشىق كورت، سونداي-اق 6 توپىراقتى كورت كىرەدى.
ۇلتتىق سپورت تۇرلەرىن دامىتۋ ماقساتىندا «تۇلپار» كەشەنى كوممۋنالدىق مەنشىككە قايتارىلىپ، سپورت باسقارماسىنىڭ جەدەل باسقارماسىنا بەرىلدى. ونىڭ اۋماعىندا 100 اتقا ارنالعان ءتورت ات قورا، سپورت زالدارى جانە ەكى اشىق مانەج بار.
رايىمبەك داڭعىلىندا ەرەكشە قاجەتتىلىگى بار ادامدارعا ارنالعان سپورت ورتالىعىنىڭ قۇرىلىسى باستالدى. قۇرىلىستى اياقتاۋ 2026 جىلدىڭ IV توقسانىنا جوسپارلانعان. ورتالىق الماتىدا مۇمكىندىگى شەكتەۋلى سپورتشىلاردى دايارلاۋعا ارنالعان العاشقى مامانداندىرىلعان نىسان بولماق.
2027 جىلدىڭ سوڭىنا دەيىن ناۋرىزباي، الاتاۋ جانە تۇركسىب اۋداندارىندا التى دەنەنشىنىقتىرۋ- ساۋىقتىرۋ ، سونداي-اق ءۇش سپورت مەكتەبىن سالۋ جوسپارلانىپ وتىر. «اۆياتور»، «شۇعىلا»، №9 سپورت مەكتەبى جانە دارىندى بالالارعا ارنالعان مەكتەپ-ينتەرنات جوبالارى مەملەكەتتىك ساراپتامانىڭ وڭ قورىتىندى الدى.
سپورتتىق ماڭىزى بار ءىرى جوبالاردى جۇزەگە اسىرۋ جالعاسىن تاۋىپ وتىر. الماتىنىڭ جاڭا فۋتبول ستاديونىن سالۋ بويىنشا دايىندىق جۇمىستارى باستالىپ كەتتى. كوركەم گيمناستيكا ورتالىعىنىڭ جوباسى ازىرلەنىپ، «مەدەۋ» بيىك تاۋلى سپورت كەشەنىن قايتا قۇرۋ اياسىندا جاڭارتۋ جۇمىستارى جۇرگىزىلىپ جاتىر.
نۇركەنت شاعىناۋدانىندا ءجۇزۋ باسسەينى بار 5 مىڭ ورىندىق امبەباپ ارەنا سالۋ جوسپارلانعان.
الماتىدا جىل سايىن 310 مىڭنان استام سپورتشى قاتىساتىن 3 مىڭنان استام سپورتتىق-بۇقارالىق ءىس-شارا وتكىزىلەدى. ولاردىڭ قاتارىندا Almaty Marathon، ATP-250 Almaty Open، WTT Contender، ۇلى دالا ويىندارى، دزيۋدودان ازيا كۋبوگى، سونداي-اق مانەرلەپ سىرعاناۋدان 18 ەلدەن كەلگەن سپورتشى قاتىساتىن Denis Ten Memorial Challenge حالىقارالىق ءتۋرنيرى بار.
الماتىداعى Gorky Tennis Park الەمدەگى ەڭ ايتۋلى تەننيس تۋرنيرلەرىنىڭ ءبىرى Roland - Garros رەسمي كلۋبى مارتەبەسىنە يە بولدى.
2025 جىلدان باستاپ قالادا 35 جوو، 108 كوماندا جانە 1500 ستۋدەنتتى بىرىكتىرەتىن ستۋدەنتتەر ليگاسى باستالدى. بالالاردىڭ فۋتبول ليگاسى جوباسى ىسكە اسىرىلىپ جاتىر، وعان 8 مىڭنان استام بالا قاتىسىپ جاتىر.
جاقىندا الماتىدا وتكەن «جىگەر» فەستيۆالى ەرەكشە قاجەتتىلىگى بار 1 مىڭنان استام قاتىسۋشىنىڭ باسىن قوستى.
قىسقى كەزەڭدە كونكيمەن سىرعاناۋ جوباسى ءداستۇرلى تۇردە جالعاسىپ كەلەدى. بيىل قالانىڭ تانىمال قوعامدىق الاڭدارىندا 16 مۇز ايدىنىن جاساۋ جوسپارلانىپ وتىر. كەلەسى جىلى كونكيمەن ءاداپتيۆتى سىرعاناۋ ۇيىمداستىرىلادى.
2026 جىلدان باستاپ بۇقارالىق سپورتتى دامىتۋعا جانە بەلسەندى ءومىر سالتى مادەنيەتىن قالىپتاستىرۋعا باعىتتالعان Active city Hub جاڭا قالالىق جوباسى قولعا الىنادى. جوبا بويىنشا اپتا سايىنعى سپورتتىق ءىس-شارالارعا، اشىق جاتتىعۋلارعا، Run & Clean، Free Zone جانە Kids Lab باستامالارىنا جىلىنا 50 مىڭ ادام تارتۋ قاراستىرىلعان.
بيىل جىل سوڭىنا قاراي الماتىدا فۋتزالدان ۋەفا چەمپيوندار ليگاسىن، سونداي-اق كۇرەس تۇرلەرى بويىنشا قازاقستان رەسپۋبليكاسىنىڭ چەمپيوناتىن جانە جاسوسپىرىمدەر اراسىندا بوكستان ەل بىرىنشىلىگىن وتكىزۋ كوزدەلىپ وتىر.
«اتالعان جوبالاردى جۇزەگە اسىرۋ الماتىنىڭ ورتالىق ازيانىڭ سپورتتىق استاناسى رەتىندەگى مارتەبەسىن نىعايتۋعا، بۇقارالىق سپورتتى دامىتۋعا جانە قالانىڭ حالىقارالىق ءيميدجىن ارتتىرۋعا ىقپال ەتەدى»، - دەدى الماتى قالاسى سپورت باسقارماسىنىڭ وكىلدەرى.