لۋۆردى توناعاندار ۇزاق بۇزاقىلار بولىپ شىقتى، ولار فرانسيا استاناسىنىڭ كەدەي اۋداندارىنىڭ بىرىندە تۇرادى، دەپ حابارلايدى aqshamnews.kz
ادەپكىدە بولجانعانداي ولاردىڭ ۇيىمداسقان قىلمىستىق توپقا قاتىسى جوق.
«ولاردى بولماشى قاراقشالار توبى دەي المايمىز، الايدا جوعارى ۇيىمداسقان قىلمىستىق توپقا دا جاتقىزبايمىز»، - دەدى پاريج پروكۋرورى لور بەكو.
ونىڭ ايتۋىنشا، لۋۆردى توناۋعا قاتىستى ۇستالىپ، ايىپ تاعىلعان ءتورت ادامنىڭ ۇشەۋى ەر ادام، ءبىرى ايەل. ولار جەرگىلىكتى تۇرعىندار، ءپاريجدىڭ سولتۇستىگىندەگى كەدەي اۋدان سانالاتىن سەن-دەني ماڭىندا تۇرادى.
بەكونىڭ سوزىنشە، تۇتقىندالعان ءتورت ادامنىڭ ەكەۋى بىرنەشە رەت سوتتى بولعان.
لۋۆردى توناۋعا قاتىستى ەكى كۇدىكتىگە ايىپ تاعىلدى. ءبىرى سەن-دەني ماڭىندا ورنالاسقان كۋرنوۆ قالاسىنىڭ تۇرعىنى 38 جاستاعى ايەل، ەكىنشىسى 37 جاستاعى ەر ادام. بەكو ولاردىڭ ازاماتتىق نەكەدە تۇراتىنىن جانە بالالارى بار ەكەنىن ايتتى، ءبىراق باسقا مالىمەت بەرمەدى. كۇدىكتىلەر وزدەرىنىڭ قىلمىسقا قاتىسى جوق ەكەنىن مالىمدەگەن.
بۇعان دەيىن بيلىك باسقا ەكى كۇدىكتىنى ۇستاعان ەدى. ولار 34 جاستاعى الجير ازاماتى مەن 39 جاستاعى تاكسي جۇرگىزۋشىسى. قۇقىق قورعاۋ ورگاندارىنىڭ مالىمەتىنشە، بۇل ادامدار لۋۆردى توناۋعا قاتىسى بار ەكەنىن ءىشىنارا مويىنداعان.
ايتا كەتەيىك، 19 قازاندا پاريجدەگى الەمگە ايگىلى لۋۆر مۋزەيىنە ۇرى تۇسكەن ەدى. ولار جالپى قۇنى 88 ميلليون ەۋرو بولاتىن تاريحي جادىگەرلەردى قولدى ەتكەن.