قازاق كينوسى تاريحىنداعى تۇڭعىش دجۋبوكس-ميۋزيكل «باقىت قۇشاعىندا» ءفيلمى فرانسيا استاناسىندا وتكەن «Festival du Film Kazakh» قازاق كينوسى فەستيۆالىندە «ۇزدىك دەبيۋت» جۇلدەسىن جەڭىپ الدى، دەپ حابارلايدى aqshamnews.kz
كينوفەستيۆال 29 قازان مەن 2 قاراشا ارالىعىندا پاريجدە جەتىنشى مارتە ءوتتى.
ءفيلمنىڭ فرانسياداعى تۇساۋكەسەرى فەستيۆالدىڭ جابىلۋ سالتاناتىندا ءوتتى. ءىس-شاراعا كينوگەرلەر، سىنشىلار، ساراپشىلار جانە حالىقارالىق كينوقوعام وكىلدەرى قاتىستى. كورەرمەن قاتارىندا پاريج قالاسىنداعى قوناقتار مەن جەرگىلىكتى قازاقتار دا كوپ بولدى. كورەرمەندەر «باقىت قۇشاعىندا» ميۋزيكلىنا جوعارى باعا بەرىپ، ەرەكشە اسەر العاندارىن جەتكىزدى.
«باقىت قۇشاعىندا» – كومپوزيتور ءشامشى قالداياقوۆتىڭ اندەرىنە نەگىزدەلگەن العاشقى قازاقستاندىق دجۋبوكس-ميۋزيكل. تۋىندىدا ۇلى كومپوزيتوردىڭ 12 ءانى سيمفونيالىق وركەستر سۇيەمەلىمەن قايتا وڭدەلىپ، ساۋندترەك رەتىندە جازىلعان. ءفيلمنىڭ ءتۇسىرىلىمى ەلوردادا ءبىر اي ىشىندە تولىقتاي قازاق تىلىندە وتكەن. كورىنىستەرگە 230-عا جۋىق اكتەر قاتىسقان، ەڭ اۋقىمدى ەپيزودتاردىڭ بىرىندە 80 ادام ءبىر مەزەتتە بيلەيدى. كارتينانىڭ رەجيسسەرى – سانات شاپاشوۆ. ءفيلمنىڭ شىعارماشىلىق توبىنا كومپوزيتوردىڭ ۇلى مۇحتار قالداياقوۆ پەن كەلىنى بوتاگوز قالداياقوۆا دا قولداۋ بىلدىرگەن.
ميۋزيكل قازاقتىڭ مادەني جانە رۋحاني قۇندىلىقتارىن جاڭاشا قىرىنان كورسەتەدى. وندا وتباسى ينستيتۋتىنىڭ ءمانى، انالارعا قۇرمەت پەن ەر ازاماتتىڭ جاۋاپكەرشىلىگى سياقتى الەۋمەتتىك تاقىرىپتار كەڭىنەن اشىلادى.
ايتا كەتسەك، تۋىندى 2025 جىلدىڭ 23 قازانىندا ءشامشى قالداياقوۆتىڭ 95 جىلدىعىنا وراي ۇلكەن ەكراندارعا جول تارتقان. ءقازىر فيلم ەلىمىزدىڭ كينوتەاترلارىندا كورسەتىلىپ جاتىر. كورەرمەندەر الەۋمەتتىك جەلىلەردە تۋىندىداعى اندەرگە قوسىلىپ ايتۋ، كوزگە جاس الۋ جانە قۋانىشقا بولەنۋ ساتتەرىن ءبولىسىپ، ءوز اسەرلەرىن بىلدىرۋدە.
«باقىت قۇشاعىندا» ميۋزيكلى قازاق كينوسىنىڭ جاڭا بەلەسى رەتىندە ۇلتتىق ونەر مەن كرەاتيۆتى يندۋستريانىڭ دامۋىنا سەرپىن بەردى.