«مەنىڭ رەسپۋبليكام- مەنىڭ  ماقتانىشىم!» 

رەسپۋبليكا كۇنى – ەلىمىزدىڭ تاريحىنداعى ەڭ ماڭىزدى مەرەكەلەردىڭ ءبىرى. بۇل كۇن – قازاقستان حالقىنىڭ ەگەمەندىك پەن تاۋەلسىزدىك جولىنداعى جەتىستىكتەرىن دارىپتەيتىن، ەل بىرلىگى مەن تاتۋلىعىن  ايشىقتايتىن   مەرەيلى مەرەكە.  قالامىزداعى  № 191 بوبەكجاي-بالاباقش ۇجىمى دا وسىناۋ مەرەكەنى زور شابىتپەن اتاپ ءوتتى. مەكتەپالدى  «شابدالى» توبىندا  وتكەن  «مەنىڭ رەسپۋبليكام –  مەنىڭ ماقتانىشىم!» اتتى مەرەكەلىك ءىس-شارانى  مەڭگەرۋشى م.ا  ە. ءابىللماجيت پەن   تاربيەشىلەر ا.جاكىپوۆا، م.يماماتدينوۆا، مۋزىكا جەتەكشىسى گ. حاكيمجانوۆا  زور ىقىلاسپەن ۇيىمداستىردى.  
وسكەلەڭ ۇرپاقتىڭ بويىنا  وتانعا دەگەن سۇيىسپەنشىلىكتى ارتتىرۋ، پاتريوتتىق سەزىمدەرىن قالىپتاستىرۋ، سونداي-اق قازاقستان رەسپۋبليكاسىنىڭ مەملەكەتتىك رامىزدەرىن، مەرەكەلەرىن تانىپ-بىلۋگە باۋلۋ ماقساتىندا ۇيىمداستىرىلعان كەش شىن مانىندە ماعىنالى ءوتتى.  بۇل كۇنگى مەرەكەگە تاربيەلەنۋشىلەر مەن اتا-انالار، ۇستازدار جانە قوناقتار بەلسەنە قاتىستى.
ءىس-شارا سالتاناتتى تۇردە قازاقستان رەسپۋبليكاسىنىڭ انۇرانىمەن اشىلدى. بالالار مەن ۇستازدار قولدارىنا كوك بايراق ۇستاپ، ەلىمىزدىڭ باستى  مەرەكەسىنە   ايرىقشا قۇرمەت كورسەتتى. شارانىڭ جۇرگىزۋشىلەرى قازاقستان رەسپۋبليكاسىنىڭ قالىپتاسۋ تاريحى مەن تاۋەلسىزدىككە دەيىنگى كۇرەس جولدارى تۋرالى قىسقاشا ماعلۇمات بەرىپ، بالالاردىڭ نازارىن ەل تاريحىنا اۋداردى. ودان كەيىن بۇلدىرشىندەر وزدەرىنىڭ جاتتاعان ولەڭدەرىن مانەرلەپ وقىپ، كورەرمەندەرگە ەرەكشە اسەر سىيلادى. «وتانىم – قازاقستان»، «تۋعان جەرىم – التىن بەسىگىم»، «مەنىڭ ەلىم» سەكىلدى پاتريوتتىق تاقىرىپتاعى ولەڭدەر ارقىلى كىشكەنتايلار ءوز ەلىن سۇيەتىنىن، ونىڭ بولاشاعىنا سەنىممەن قارايتىنىن كورسەتتى. مۋزىكالىق بولىمدە بالالار «قازاقستان – وتانىم!»، «تاتۋلىق تىرەگىمىز» اندەرىن شىرقادى. ءاننىڭ اۋەنىمەن بىرگە ايتىلعان تازا دا ءمولدىر داۋىستار كورەرمەن جۇرەگىنە قۋانىش پەن ماقتانىش سەزىمىن ۇيالاتتى. ال «مۇزبالاق» جانە «حاس جۇيرىكتە سىن بولماس» اتتى بيلەر ۇلتتىق ناقىشتا ورىندالىپ، مەرەكەنىڭ ءسانىن كىرگىزدى. قازاق حالقىنىڭ بي مادەنيەتىن دارىپتەگەن بۇل كورىنىستەر بالالاردىڭ شىعارماشىلىق قابىلەتتەرىن، ونەرگە دەگەن سۇيىسپەنشىلىكتەرىن ايقىندادى. شارا بارىسىندا «رامىزدەردى تاپ» اتتى تانىمدىق ويىن دا وتكىزىلدى. بۇل ويىننىڭ ماقساتى – بالالاردىڭ مەملەكەتتىك رامىزدەر تۋرالى ءبىلىمىن تەرەڭدەتۋ جانە ولاردىڭ ءمان-ماعىناسىن ءتۇسىندىرۋ بولدى. بالالار تۋ مەن ەلتاڭبانى سۋرەت ارقىلى تانىپ، ولاردىڭ ەلەمەنتتەرىن دۇرىس اتاۋعا تىرىستى. سونىمەن قاتار، شىعارماشىلىق تاپسىرمالار بارىسىندا بۇلدىرشىندەر ءتۇرلى-تۇستى قاعازداردان تۋ مەن ەلتاڭبانىڭ بەينەلەرىن قۇراستىرىپ، ءوز قولدارىمەن جاساعان تۋىندىلارىن ماقتانىشپەن كورسەتتى. بۇل بولىمدە ولاردىڭ ۇقىپتىلىعى مەن وتانسۇيگىشتىگى ايقىن بايقالدى.
مەرەكەلىك ءىس-شارانىڭ تاعى ءبىر ەرەكشە ءساتى – «قازاعىم» اتتى فلەشموبتا  بالالار ۇلتتىق كيىم كيىپ، اسەم اۋەن ىرعاعىمەن بىرىگىپ بي بيلەدى. بۇل كورىنىس شارانىڭ شارىقتاۋ شەگى بولدى.