پرەزيدەنتتىڭ الماتىداعى بۇرىنعى رەزيدەنسياسىنىڭ ورنىندا جاڭا ساياباق اشىلدى. ازىرگە رەسمي تانىستىرىلماسا دا، نيۋ-يوركتەگى ورتالىق پاركتەن كەم تۇسپەيتىن ساياباق بۇگىندە قالاداعى كورىكتى ورىنعا اينالىپ ۇلگەردى. رەزيدەنسيانىڭ اۋماعى قالاي وزگەردى؟ تولىعىراق اqshamnews.kz ماتەريالىندا.
جاڭا ساياباقتىڭ اۋماعى - 4 گەكتاردان اسادى. ول نازاربايەۆ داڭعىلىنىڭ باتىسىندا جانە گاندي كوشەسىنىڭ سولتۇستىگىندە ورنالاسقان.
بۇرىن اۋماقتى قورشاپ تۇرعان قورشاۋلاردىڭ ءبىر بولىگى الىنعان.
مۇندا ءتۇرلى وسىمدىكتەر وتىرعىزىلعان: 95 قىلقانجاپىراقتى جانە 228 جاپىراقتى اعاش، قوسىمشا 469 قىلقانجاپىراقتى جانە 384 جاپىراقتى بۇتا.
جاياۋ جانە جۇگىرۋ جولدارى توسەلگەن، اۆتوسۋارۋ جانە جارىقتاندىرۋ جۇيەلەرى ورناتىلعان.
ءتىپتى دەمالىپ وتىراتىن ورىندىقتار دا ەرەكشە ۇلگىدە جاسالعان.
ساياباق قالانىڭ ورتاسىندا ورنالاسقان سوڭ، تەك دەمالىستا ەمەس، جۇمىس كۇندەرىندە دە، ءتىپتى تۇستە دە ادام كوپ.
مۇندا وتباسىمەن كەلىپ، دەمالىپ جۇرگەندەر كوپ.
ەسكە سالايىق، 2022 جىلعى 5 قاڭتاردا ءبىر توپ ادام عيماراتتى قيراتىپ ەدى، ءتىپتى مۇندا كولىك ورتەندى.
كەيىن قاسىم-جومارت توقايەۆتىڭ شەشىمىمەن رەزيدەنسيا ءسۇرىلىپ، ونىڭ ورنىنا قالا تۇرعىندارى ءۇشىن اشىق ساياباق سالۋ ۇيعارىلدى.
عيمارات تاريحى
عيمارات تاريحى 1979 جىلدان باستالادى، سول كەزدە قازاقستان كومپارتياسى وك-نىڭ ءبىرىنشى حاتشىسى دىنمۇحامەد قونايەۆ الماتىدا لەنين اتىنداعى مۋزەيدى سالۋدى تاپسىردى. وسىلايشا عيمارات باستاپقىدا مۋزەي كەشەنى رەتىندە جوبالانعان. قۇرىلىس 1983 جىلى باستالدى. الايدا 1986 جىلعى جەلتوقسان وقيعالارىنا بايلانىستى جۇمىس توقتاپ قالدى دا، 1993 جىلعا دەيىن نىسان اياقتالماي تۇردى. سول كەزدە قۇرىلىس 90 پايىزعا ورىندالعان ەدى.
تاۋەلسىزدىك العاننان كەيىن جوبا قايتا جاندانىپ، جاڭا ماقساتقا يە بولدى. ول ەل پرەزيدەنتىنىڭ رەزيدەنسياسىنا اينالۋعا ءتيىس ەدى.