الداعى كۇندەرى بولجانعان جاۋىن-شاشىن مەن كوكتايعاققا بايلانىستى الماتى قالاسىنىڭ كوممۋنالدىق قىزمەتتەرى كۇشەيتىلگەن رەجيمىنە اۋىستىرىلدى، دەپ حابارلايدى aqshamnews.kz
قالالىق ينفراقۇرىلىمنىڭ ءقاۋىپسىز ءارى ۇزدىكسىز قىزمەتىن قامتاماسىز ەتۋ ءۇشىن ارنايى مەكەمەلەر تاۋلىك بويى كەزەكشىلىككە قويىلدى. بۇل تۋرالى الماتى قالالىق كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسى حابارلادى.
«قازگيدرومەت» رمك دەرەگىنشە، 4 قاراشا كۇنى ساعات 3:00-تەن 20:00-گە دەيىن جالپى 5-6 مم كولەمىندە جاڭبىر جاۋادى. اۋا تەمپەراتۋراسى تۇندە جانە كۇندىز +5…+7 °س، دەيىن تومەندەيدى. 5 قاراشادا – اۋىسپالى بۇلتتى، كەي جەرلەردە جاڭبىر مەن قار تۇرىندەگى جاۋىن-شاشىن (قالىڭدىعى 10 مم-گە دەيىن)، كوكتايعاق بولادى. اۋا تەمپەراتۋراسى تۇندە -3…-5 °س، كۇندىز +1…+3 °س شاماسىندا.
«الماتى تازالىق» كاسىپورىندارىنىڭ بازالارىندا جۇرگىزۋشىلەر، مەحانيزاتورلار مەن جۇمىسشىلار تاۋلىك بويى كەزەكشىلىك اتقارادى. قار تۇسپەي تۇرىپ، ماگيسترالدىق كوشەلەرگە الدىن الا سۇيىق رەاگەنتتەر سەبىلەدى. قازىرگى تاڭدا قالا اۋماعىندا 204 قۇم شاشقىش تەحنيكا دايىن تۇر.
جالپى، تاۋلىك بويعى جۇمىسقا 580 ارنايى تەحنيكا مەن 2500-دەن استام جۇمىسشى جۇمىلدىرىلعان. اۋلا ىشىندەگى اۋماقتاردى تازالاۋعا 307 تەحنيكا جانە 1500 جۇمىسشى، ال ساياباقتار مەن سكۆەرلەردى كۇتىپ ۇستاۋعا 550 تەحنيكا مەن 1900 قىزمەتكەر قاتىسادى. قالانىڭ كوشە-جول جەلىسىن باقىلاۋ جانە كوكتايعاقتى دەر كەزىندە جويۋ ءۇشىن 75 پاترۋلدىك بريگادا كەزەكشىلىك ەتەدى.
سونىمەن قاتار، الماتى قالاسىنىڭ قۇتقارۋ قىزمەتى دە كۇشەيتىلگەن رەجيمدە جۇمىس ىستەپ تۇر. قىزمەت قۇرامىندا 1 اسسەنيزاتور كولىگى، 15 موتوپومپا جانە 50 قۇتقارۋشى بار.
اۋدان اكىمدىكتەرىندە كوممۋنالدىق جۇمىستاردىڭ بارىسىن باقىلاۋ جانە قىزمەتتەردىڭ ءوزارا ءىس-قيمىلىن ۇيلەستىرۋ ماقساتىندا تاۋلىك بويعى كەزەكشىلىك ۇيىمداستىرىلعان.
قار تازالاۋ كەزەڭىندە جول بويىنا نەمەسە جيەگىنە قويىلعان كولىكتەردى ۋاقىتشا كوشىرۋ ءۇشىن 63 ەۆاكۋاتور مەن مانيپۋلياتور (پوليسيا دەپارتامەنتىنەن – 13، قۇتقارۋ قىزمەتىنەن – 20، «الماتى پاركينگتەن» – 30) جۇمىلدىرىلادى.
تۇرعىندارعا ارنالعان ەسكەرتپەلەر
جول مەن تروتۋاردا كوكتايعاقتىڭ تۇزىلۋىنە بايلانىستى قالا تۇرعىندارىنان بارىنشا ساقتىق شارالارىن ساقتاۋدى سۇرايمىز.
كولىك جۇرگىزۋشىلەرىنە قوزعالىس جىلدامدىعىن تومەندەتىپ، ءقاۋىپسىز اراقاشىقتىقتى ساقتاۋ، كۇرت بۇرىلىس پەن تەجەۋدەن اۋلاق بولۋ، تەجەۋ جولىنىڭ ۇزاراتىنىن ەسكەرۋ، قىسقى دوڭگەلەكتەردى دەر كەزىندە اۋىستىرۋ قاجەت.
جۇرگىزۋشىلىك تاجىريبەسى از ازاماتتارعا جەكە كولىكتى ۋاقىتشا پايدالانباۋعا جانە قوعامدىق كولىككە باسىمدىق بەرۋگە كەڭەس بەرەمىز. سونىمەن بىرگە كولىكتى قىسقى دوڭگەلەككە ۋاقىتىلى اۋىستىرماعان جاعدايدا اكىمشىلىك جاۋاپكەرشىلىك قاراستىرىلاتىنىن ەسكە سالامىز.
جۇرگىنشىلەرگە تروتۋارلار مەن جۇرگىنشىلەر وتكەلدەرىندە اباي بولۋ، تابانى تايمايتىن اياق كيىم كيۋ، ەڭىس، ءور جانە باسپالداقتا ساقتىق تانىتۋ قاجەت. قاۋىپسىزدىك ساقتاڭىز.