«التىن كۇز» ايشىقتارى

بوستاندىق اۋدانىنداعى №90 بوبەكجاي-بالاباقشادا بولمىسى دا، مازمۇنى دا ەرەكشە، اشىق اسپان استىندا وتكەن مەرەكەلىك باعدارلاما رەسپۋبليكا كۇنى مەن التىن كۇز مەرەكەسىنە ورايلاستىرىلىپ، ەرەكشە فورماتتا ۇيىمداستىرىلدى. 
سارى كۇزدىڭ بەرەكەسىن بەينەلەگەن ساحنالىق كورىنىستەر، جومارت كۇزدىڭ ونىمدەرىن جارنامالاعان جارمەڭكە دەيسىز بە، ايتەۋىر ناعىز مەرەكە كورىگىن قىزدىرعان كەش وتانشىلدىق رۋح پەن جىلۋلىققا، مەيىرىمگە تولى بولدى.
بالاباقشا اۋلاسى كۇزدىڭ التىن تۇسىندەي كەيىپكە ەنگەن. ۇلتتىق كيىم كيگەن كىشكەنتاي بالعىندار قولدارىنا جالاۋشا ۇستاپ، مەرەكەنى كوڭىلدى انمەن باستادى. كۇزگى جاپىراقتار، جەمىستەر مەن كوكونىستەردەن جاسالعان كومپوزيسيالار – بارلىعى جينالعان قاۋىمنىڭ كوڭىلىن كوتەرىپ، مەرەكەلىك كوڭىل كۇي سىيلادى. اسىرەسە، بالاباقشانىڭ كىرەبەرىسىندە قازاقتىڭ ويۋ-ورنەگىمەن كومكەرىلگەن باننەر كوزگە الىستان تۇسەدى. مۇنداعى ايشىقتى ارىپتەرمەن جازىلعان «تاۋەلسىز ەلدىڭ بالالارى – بولاشاقتىڭ ءۇمىتى!» دەگەن جازۋ الىستان كوزگە تۇسەدى. 
اتالمىش ءىس-شارانىڭ نەگىزگى بولىگى رەسپۋبليكا كۇنىنە ارنالعاندىقتان، ءاربىر توپ وزدەرى دايىنداعان شاعىن كونسەرتتىك باعدارلاماسىن ۇسىندى. ماسەلەن، بالاقايلار وتان، ەل مەن جەر تاريحى تۋرالى اندەر شىرقاپ، ەلىمىزدىڭ رامىزدەرىن تانىستىردى. بۇلدىرشىندەردىڭ تۋ، ەلتاڭبا، ءانۇران تۋرالى ساحنالىق قويىلىمى ءساتتى شىقتى. 
–  بالاقايلار وتانعا دەگەن قۇرمەتتەرىن  ولەڭ مەن ويىن ارقىلى قابىلدايدى. ال رەسپۋبليكا كۇنى مەرەكەسى – ەل تاريحى مەن قۇندىلىقتارىن بالانىڭ تىلىمەن جەتكىزۋدىڭ ەڭ اسەرلى ءتاسىلى، – دەدى بالاباقشا مەڭگەرۋشىسى گۇلىمجان جايلاۋبيەۆا .
 مەرەكەنىڭ ەكىنشى بولىگى – ءداستۇرلى «التىن كۇز» كورمەسىنە ارنالدى. بۇل كۇنى ءاربىر توپ وزدەرىنىڭ شىعارماشىلىق بۇرىشتارىن ۇسىندى. كوكونىستەر مەن جەمىستەردەن جاسالعان ەرەكشە كومپوزيسيالار، تابيعي ماتەريالداردان جاسالعان كيىم ۇلگىلەرى، جاپىراقتارمەن بەزەندىرىلگەن قولونەر بۇيىمدارى بالالاردىڭ شەكسىز قيالىن كورسەتتى. «كۇز حانشايىمى» بايقاۋى دا ەرەكشە اسەر قالدىردى. بالالار كۇز تاقىرىبىندا ولەڭ وقىپ، ءان شىرقادى. جەمىس-جيدەكتەر مەن جاپىراقتاردان تىگىلگەن كيىم ۇلگىلەرى كورەرمەندەر تاراپىنان ۇلكەن قوشەمەتكە يە بولدى.