«تازا قازاقستان» ەكولوگيالىق باعدارلاماسىن ىسكە اسىرۋ اياسىندا الماتى قالاسىنىڭ مامانداندىرىلعان تابيعات قورعاۋ پروكۋراتۋراسى، قالا ەكولوگيا جانە قورشاعان ورتا باسقارماسى جانە «ىلە-الاتاۋ» مەملەكەتتىك ۇلتتىق تابيعي پاركى بىرلەسىپ ايۋساي شاتقالىندا سەنبىلىك ۇيىمداستىردى، دەپ حابارلايدى aqshamnews.kz
ءىس-شارانىڭ ماقساتى – تابيعي اۋماقتاردى تازارتۋ، ۇلتتىق پاركتىڭ ەكوجۇيەسىن ساقتاۋ جانە تۇرعىندار اراسىندا ەكولوگيالىق مادەنيەتتى ارتتىرۋ.
اكسياعا قاتىسۋشىلار شاتقال اۋماعىن تۇرمىستىق قالدىقتان تازارتىپ، جاپىراقتىلار، قىلقانجاپىراقتىلار مەن جەمىس اعاشتارىنىڭ 100 كوشەتىن وتىرعىزدى. بۇل الماتىنىڭ جاسىل بەلدەۋىن كەڭەيتۋگە جانە تابيعي ورتاعا وڭ اسەر ەتۋگە مۇمكىندىك بەرەدى.
«ECO Network» ەكولوگيالىق قوزعالىسى قالا اكىمدىگىنىڭ «ەكو-حاب» جوبالىق كەڭسەسىمەن بىرلەسىپ ينتەراكتيۆتى ەكوايماق ۇيىمداستىردى. قوناقتارعا پلاستيكتى قايتا وڭدەيتىن ۆەلوسيپەد-شرەدەردىڭ جۇمىسى كورسەتىلدى، قايتا وڭدەلگەن شيكىزاتتان جاسالعان بۇيىمدار ۇسىنىلدى، سونداي-اق قالدىقتاردى بولەك جيناۋعا ارنالعان ەكوبوكستار ورناتىلدى. سەنبىلىك بارىسىندا 1000-نان استام پلاستيك بوتەلكە مەن اليۋمينيي قۇتىلارى جينالىپ، قايتا وڭدەۋگە جىبەرىلدى.
يگى ىسكە 500-دەن استام ادام قاتىستى: مەملەكەتتىك ورگانداردىڭ وكىلدەرى، ۇلتتىق پارك قىزمەتكەرلەرى، پوليسيا دەپارتامەنتى، جوعارى وقۋ ورىندارى، ەكولوگيالىق جانە قوعامدىق ۇيىمدار، بيزنەس-قوعامداستىق، سونداي-اق قالا تۇرعىندارى بار.