جاتىر موينىنىڭ قاتەرلى ىسىگى - ايەلدەر اراسىندا ەڭ كوپ تارالعان ونكولوگيالىق اۋرۋدىڭ ءبىرى. سوڭعى جىلدارى دارىگەرلەر 45 جاستان اسقان ايەلدەرمەن قاتار، جاس پاسيەنتتەر اراسىندا دا اۋرۋ كورسەتكىشىنىڭ ارتقانىن اتاپ ءوتىپ جاتىر. ماماندار مۇنى حالىقتىڭ اۋرۋدىڭ الدىن الۋعا دەگەن جوعارى جاۋاپكەرشىلىگىمەن جانە پروفيلاكتيكالىق تەكسەرۋ، سكرينينگتىك باعدارلاماعا بەلسەندى قاتىسۋىمەن بايلانىستىرادى.
الماتى №36 قالالىق ەمحاناسىنىڭ ونكولوگى زارينا تويلىبايەۆانىڭ ايتۋىنشا، ەمنىڭ ناتيجەسى اۋرۋدى ۋاقىتىلى انىقتاۋعا تىكەلەي بايلانىستى. ەندومەترييدىڭ قاتەرلى ىسىگى ەرتە كەزەڭدە جاقسى ەمدەلەدى، ەمدەۋ بارىسى جەڭىل وتەدى جانە ءومىر ساپاسىن ساقتاۋعا مۇمكىندىك بەرەدى. اۋرۋ ادەتتە باياۋ داميدى - كوبىنە گورموندىق بۇزىلىس، ارتىق سالماق، قانت ديابەتى، ارتەريالىق گيپەرتەنزيا، از قيمىلداۋ جانە تۇقىم قۋالاۋشىلىققا بەيىمدىلىك اياسىندا پايدا بولادى.
ونكولوگ گينەكولوگقا تۇراقتى تۇردە قارالۋ قاجەت ەكەنىن اتاپ ءوتتى. ءدال وسى پروفيلاكتيكالىق تەكسەرۋ مەن كىشى جامباس اعزالارىنىڭ ۋلترادىبىستىق زەرتتەۋى پاتولوگيالىق وزگەرىستى ەرتە كەزەڭدە انىقتاۋعا مۇمكىندىك بەرەدى.
«ايەلدەر دەنساۋلىعىنا مۇقيات بولۋى كەرەك: ەتەككىردىڭ بۇزىلۋى، ەتەككىر ارالىعىنداعى نەمەسە مەنوپاۋزادان كەيىنگى قان كەتۋ، ءىشتىڭ تومەنگى بولىگىندەگى اۋىرسىنۋ بايقالسا، مىندەتتى تۇردە مامانعا قارالۋ قاجەت»، - دەيدى زارينا تويلىبايەۆا.
ونىڭ ايتۋىنشا، قازاقستاندا ونكوسكرينينگتىك باعدارلاماعا قاتىسۋدىڭ جاس دياپازونى كەڭەيتىلدى. ەندى تەكسەرۋ تەگىن مەديسينالىق كومەكتىڭ كەپىلدەندىرىلگەن كولەمى اياسىندا تەگىن جۇرگىزىلەدى جانە سكرينينگتەن ءوتۋ ءۇشىن مىندەتتى الەۋمەتتىك مەديسينالىق ساقتاندىرۋ ءپوليسىنىڭ بولۋى تالاپ ەتىلمەيدى.
«30 جاستان 74 جاسقا دەيىنگى ايەلدەر جاتىر موينى وبىرىنا، 40 پەن 76 جاس ارالىعىنداعى ايەلدەر ءسۇت بەزى وبىرىنا، ال 50 مەن 76 جاس ارالىعىنداعى ەرلەر مەن ايەلدەر توق ىشەك وبىرىنا سكرينينگتەن وتە الادى»، - دەپ ناقتىلادى مامان.
پروفيلاكتيكالىق تەكسەرۋ تىركەلگەن ەمحانادا وتكىزىلەدى. قاتىسۋ ءۇشىن ۋچاسكەلىك دارىگەرگە نەمەسە پروفيلاكتيكالىق بولىمگە جۇگىنۋ جەتكىلىكتى.
ونكولوگ ەرتە دياگنوستيكا ءومىردى ساقتايتىنىن اتاپ ءوتتى: «ۋاقىتىلى پروفيلاكتيكالىق تەكسەرۋ اۋرۋ بەلگىلەرى پايدا بولماي تۇرىپ انىقتاۋعا جانە ەمنىڭ تيىمدىگىن ايتارلىقتاي ارتتىرۋعا مۇمكىندىك بەرەدى. وزىڭە دەگەن قامقورلىق - ءوز دەنساۋلىعىڭا نازار اۋدارۋدان باستالادى»، - دەپ ءسوزىن تۇيىندەدى ول.