جاقىندا ۇلتتىق بانك قازاقستان رەسپۋبليكاسى ۇلتتىق قورىنىڭ 2030 جىلعا دەيىنگى اكتيۆتەرىن باسقارۋ تۇجىرىمداماسىن جاريالادى، دەپ حابارلايدى Almaty-akshamy.kz.
جوبا «اشىق نقا» پورتالىندا شىقتى. تۇجىرىمدامانى جۇزەگە اسىرۋ، ياعني وندا بەلگىلەنگەن شەكتەۋلەردى، قاعيداتتار مەن تاسىلدەردى ساقتاۋ، ۇب-نىڭ پىكىرىنشە، 2030 جىلعا قاراي 100 ملرد دوللار جيناقتاۋعا جانە «ۇلتتىق قور – بالالارعا» باعدارلاماسىنىڭ تابىستى جۇمىس ىستەۋىنە ىقپال ەتەدى.
الايدا Ranking ساراپشىلارى جاعدايدىڭ شىنايىلىقتان ءبىرشاما الشاق ەكەنىن ايتادى. 2023 جىلدىڭ ناۋرىز ايىنىڭ سوڭىنا قاراي ۇلتتىق قور اكتيۆى 58،4 ملرد دوللاردى قۇراعان. ياعني 7 جىلدان از ۋاقىتتا ۇلتتىق قوردىڭ اكتيۆتەرى 71% نەمەسە 41،6 ملرد دوللارعا ءوسۋى كەرەك دەپ بولجانىپ وتىر. ەگەر 2014 جىلدان بەرگى جەتى جىلدا ۇلتتىق قور اكتيۆتەرى وسپەك تۇگىلى ازايىپ كەتكەنىن ەسكەرمەسەڭىز، جوسپار ورىنداۋعا وڭاي سەكىلدى كورىنەدى. ناقتىراق ايتقاندا، 2014 جىلعى تامىزدا (ەڭ جوعارى وسكەن كەزى) ۇلتتىق قوردىڭ اكتيۆى تۇراقتى ءوسىم كورسەتىپ، 77،2 ملرد دوللارعا جەتتى، ءبىراق ودان كەيىن ايتارلىقتاي قۇلدىراۋ بايقالدى. بۇگىندە ۇلتتىق قوردىڭ اكتيۆتەرى سول كەزدەگىمەن سالىستىرعاندا 24،4% نەمەسە 18،8 ملرد دوللارعا تومەندەپ كەتكەن، دەپ جازدى egemen.kz/.
«تاعى ءبىر قىزىقتى دەرەك: جاڭا تۇجىرىمدامادا اتاپ وتىلگەندەي، 2016 جىلدىڭ وزىندە ۇلتتىق قور اكتيۆتەرىن باسقارۋ تاسىلدەرىن جەتىلدىرۋ بويىنشا جۇمىس جۇرگىزىلدى. ۇلتتىق قور قاراجاتىن قالىپتاستىرۋ مەن پايدالانۋدىڭ جاڭا تۇجىرىمداماسى ازىرلەندى جانە بەكىءتىلدى. تۇراقتاندىرۋ پورتفەلىءنىڭ ماكسيمالدى كولەمىنە 10 ملرد دوللار شەگىندە شەكتەۋ قويىلدى. 2019 جىلى ۇلتتىق قوردىڭ جيناق پورتفەلىنىڭ اكتيۆىن كونسەرۆاتيۆتى بولۋدەن تەڭگەرىمدى بولۋگە كوشۋ باستالدى. الايدا بۇل شارالاردىڭ بارلىعى الىس قاشىقتىقتاعى تەرىس ءۇردىستى قالپىنا كەلتىرە المادى. ءيا، كەيدە ءوسۋ بولدى، ءبىراق جالپى كورسەتكىش تومەندەپ جاتىر. تيىسىنشە، جاڭا تۇجىرىمداما قىسقا مەرزىمدە وسىنداي ءورشىل ماقساتتارعا قول جەتكىزە الادى دەۋگە ەشقانداي كەپىلدىك تە، نەگىز دە جوق»، - دەيدى ساراپشىلار.
جاڭا تۇجىرىمدامادا اتاپ وتىلگەندەي، اكتيۆتەردىڭ بۇلايشا قىسقارۋىنىڭ ءبىر سەبەبى – ۇلتتىق قورعا مۇنايدان تۇسەتىن تابىستان گورى رەسپۋبليكالىق بيۋدجەتكە الاتىن قاراجاتتىڭ كوپ بولۋى. ەڭ جوعارى ماندەر 2017 جانە 2020 جىلدارى تىركەلدى: 2017 جىلى 2،1 ترلن تەڭگە ءتۇسىم بولسا، الىنعان اقشا 4،4 ترلن تەڭگەنى قۇرادى، 2020 جىلى 1،4 ترلن تەڭگە ءتۇسىم بولسا، الىنعان اقشا 4،8 ترلن تەڭگەنى قۇرادى. دەگەنمەن بۇل جالعىز سەبەپ ەمەس ەكەنىن اتاپ وتكەن ءجون. ۇلتتىق بانك جۇزەگە اسىرىپ جاتقان ينۆەستيسيالىق قىزمەت تە ماڭىزدى ءرول اتقارادى. سوڭعى 10-15 جىل ىشىندە اكتيۆتەردى باسقارۋدان الىنعان كىرىس الەمدەگى ۇقساس تاۋەلسىز ءال-اۋقات قورلارىنىڭ تابىسىنان تومەن بولدى.
«ۇلتتىق قوردىڭ بۇكىل تاريحىندا (2000-2022 جىلدارى) ونىڭ ورتاشا جىلدىق تابىستىلىعى – 3،02%، شەتەل ۆاليۋتاسىنداعى اكتيۆتەردى باسقارۋدان تۇسكەن ينۆەستيسيالىق كىرىس 15،1 ملرد دوللار بولدى. ايتالىق، نورۆەگيا قورىنىڭ 1998 جىلدان باستاپ 2022 جىلدىڭ سوڭىنا دەيىن ورتاشا جىلدىق جيىنتىق كىرىسى 5،7%-دى قۇرادى. سونىمەن قاتار سوڭعى 10 جىلدا قازاقستاندا ۇلتتىق قوردى باسقارۋدان شىعىن دا بولدى. ونىڭ ەڭ ۇلكەنى 2022 جىلى تىركەلدى. بىلتىر جىل سوڭىندا ۇلتتىق قوردى باسقارۋدان 1،4 ترلن تەڭگە كولەمىندە رەكوردتىق شىعىن پايدا بولدى»، - دەپ مالىمدەيدى Ranking.
وسى جاعدايلاردى ەسكەرسەك جانە باسقارۋدىڭ ءقازىر دە ويداعىداي جۇزەگە اسىپ جاتپاعانىن ەسەپكە الساق، وندا 2030 جىلعا قاراي 100 ملرد دوللارلىق كورسەتكىشكە جەتۋ وڭاي بولمايتىنىن اڭعارامىز.