ءال-فارابي اتىنداعى قازۇۋ-عا تۇركيانىڭ ەكس پرەمەر-مينيسترى، تۇركيانىڭ مەملەكەت جانە ساياسي قايراتكەرى ءبينالى يىلدىرىم ىس-ساپارمەن كەلىپ، ۋنيۆەرسيتەت باسشىلىعىمەن كەزدەسىپ، ستۋدەنتتەرگە كوشباسشىلىق ءدارىس وقىدى.
جيىندا ءال-فارابي اتىنداعى قازۇۋ-دىڭ باسقارما توراعاسى-رەكتورى جانسەيىت تۇيمەبايەۆ ءوز سوزىندە تۇركيانىڭ ەكس پرەمەر-مينيسترى، تۇركيا رەسپۋبليكاسىنىڭ مەملەكەتتىك قۇرمەت مەدالىنىڭ يەگەرى، تۇركى مەملەكەتتەرى ۇيىمىنىڭ اقساقالدار كەڭەسىنىڭ مۇشەسى، ساياساتقا، ەكونوميكاعا جانە ءبىلىم بەرۋدى دامىتۋعا ەلەۋلى ىقپال ەتكەن كورنەكتى قايراتكەردىڭ ەلەۋلى ەڭبەكتەرىن اتاپ ءوتتى.
قازۇۋ بۇگىندە تۇركيانىڭ 46 جوعارى وقۋ ورنى جانە ۇيىمدارىمەن، سونىڭ ىشىندە ستامبۋل ۋنيۆەرسيتەتى، اقدەنيز ءبىلىم ورداسى، انكارا الەۋمەتتىك عىلىمدار ۋنيۆەرسيتەتى، ىستامبۇل تەحنيكالىق ۋنيۆەرسيتەتى سياقتى بەدەلدى وقۋ ورىندارىمەن تىعىز قارىم-قاتىناس جاساي وتىرىپ، حالىقارالىق ىنتىماقتاستىقتى بەلسەندى دامىتۋدا.
«ءبىز قازاقستان پرەزيدەنتىنىڭ 2022 جىلعى 11 مامىرداعى رەسمي ساپارى اياسىندا قازۇۋ-دىڭ ىستامبۇلداعى فيليالىنىڭ اشىلۋىن ەرەكشە ماقتان تۇتامىز. بۇل جوعارى ءبىلىم بەرۋ باعدارلامالارىن بەلسەندى دامىتۋعا، عىلىم مەن ءبىلىمنىڭ حالىقارالىق ءبىلىم بەرۋ كەڭىستىگىنە ينتەگراسيالانۋىنا ىقپال ەتەدى. باۋىرلاس ەلدەر اراسىنداعى قارىم-قاتىناستاردى جانداندىرۋعا جانە ءبىلىم بەرۋ مەن عىلىمي بايلانىستاردى نىعايتۋعا قوسقان ۇلەستەرىڭىز ءبىز ءۇشىن اسا ماڭىزدى. ءسىزدىڭ ءبىلىمىڭىز بەن تاجىريبەڭىز ستۋدەنتتەر مەن عالىمداردى شابىتتاندىرادى، سونىمەن قاتار ءوز حالقى مەن قوعامعا قىزمەت ەتۋدىڭ ۇلگىسى بولىپ تابىلادى»، –دەدى جانسەيىت قانسەيىت ۇلى.
ءبينالى يىلدىرىم كوشباسشىلىق دارىستە قازاقستان مەن تۇركيانىڭ ەكونوميكا، ساۋدا، ءبىلىم بەرۋ، ونەركاسىپ سالالارىنداعى تىعىز دوستىق قارىم-قاتىناستاردىڭ قالىپتاسقانى جايلى ايتتى. «ءبىز تۇركى مەملەكەتتەرى ۇيىمدارى اياسىندا ساۋدا-ەكونوميكالىق بايلانىستاردى دامىتۋدىڭ زور الەۋەتىن كورىپ وتىرمىز. مىسال رەتىندە تۇركى مەملەكەتتەرىنىڭ سىرتقى ساۋدا قاتىناستارىن كەلتىرۋگە بولادى. بۇل ەكونوميكالىق ىنتىماقتاستىقتى دامىتۋدى قانشالىقتى ىنتالاندىراتىنىن كورسەتەدى. ءبىراق ەكونوميكا – بۇل كورىنىستىڭ ءبىر بولىگى عانا. بايلانىستاردى شىنايى نىعايتۋ ءۇشىن ءبىز ءبىر-بىرىمىزدى جاقسى تانۋىمىز كەرەك. بۇل دەگەنىمىز ءبىز ورتاق قۇندىلىقتارىمىزدى، ەڭ الدىمەن ءتىلدى، عىلىمدى جانە ءبىلىم بەرۋدى دامىتۋىمىز كەرەك» – دەپ اتاپ ءوتتى ءبينالى يىلدىرىم.
دارىستەن سوڭى ءوزارا پىكىر الاماسۋعا ۇلاسىپ، قاتىسۋشىلار مەن ستۋدەنتتەر وزدەرىن قىزىقتىرعان سۇراقتارعا جاۋاپ الدى.
