ۋچاسكەلىك ينسپەكتوردىڭ ءبىر كۇنى قالاي وتەدى؟
ىشكى ىستەر جۇيەسىندە پوليسيا قىزمەتىندەگى حالىققا ەڭ جاقىن بۋىن – ۋچاسكەلىك ينسپەكتورلار. بۇل ينستيتۋت ەڭ كونە ءارى كوپفۋنكسيالى قىزمەت ءتۇرى. اكىمشىلىك قۇقىقبۇزۋشىلىقتان باستاپ، اسا اۋىر قىلمىسقا دەيىن انىقتاپ، پروفيلاكتيكالىق ءىس-شارالار جۇرگىزەدى. ءتارتىپ ساقشىسى جۇمىسىنىڭ باستى كورسەتكىشى – تۇرعىنداردىڭ سەنىمى. حالىق ءوزىنىڭ ۋچاسكەلىك ينسپەكتورىن تاني ما؟ بالكىم، ءبىز قىزمەتكەرلەردى دۇرىس تاني الماي جۇرگەن بولارمىز؟ ولاردىڭ جۇمىسىنا تۇرعىنداردىڭ كوڭىلى تولا ما؟ وسى سۇراقتارعا جاۋاپ ىزدەپ، پوليسەيلەردىڭ جۇمىس ورنىنا باردىق. ينسپەكتورلاردىڭ ءبىر كۇنى قالاي وتەتىنىن ءبىلىپ قايتتىق.
قاۋىپسىزدىك تىرەگى
اكىمشىلىك ۋچاسكەگە كەلگەن تۇرعىنداردىڭ ماسەلەسىن شەشىپ، پروفيلاكتيكالىق ەسەپتە تۇرعان ازاماتتاردى جانە ءوزىنىڭ باقىلاۋىنداعى ايماقتى كۇنى-تۇنى تەكسەرۋ – ينسپەكتور جۇمىسىنىڭ از عانا بولىگى. اۋدانداعى قۇقىق بۇزۋعا بەيىم ادامدارمەن الدىن الۋ جۇمىسىن جۇرگىزۋ شاراسى تاعى بار.
وسى جولى قالانىڭ تاۋلى ايماعى، حالىق ەڭ كوپ باراتىن، تۋريستەر شوعىرلانعان، كۇندىز-تۇنى ادام اياعى ۇزىلمەيتىن – مەدەۋ اۋدانىنداعى پوليسيا بولىمىنە باردىق. ءبىز بارساق ءتارتىپ ساقشىلارى جۇمىسقا كىرىسۋگە دايىن وتىر ەكەن. الماتى قالاسى پوليسيا دەپارتامەنتى مەدەۋ اۋداندىق پوليسيا باسقارماسىنىڭ جەرگىلىكتى پوليسيا قىزمەتى ءبولىمىنىڭ جاۋاپتى ۋچاسكەلىك پوليسيا ينسپەكتورى، پوليسيا مايورى دارحان سارييەۆ كۇتىپ الىپ، ۋچاسكەلىك بولىمشەنىڭ ءىشىن تانىستىردى. ودان كەيىن ارىپتەستەرىنە تاپسىرمانى ءبولىپ بەردى. ينسپەكتورلاردىڭ كۇندەلىكتى جۇمىسىن كوزبەن كورۋ ءۇشىن ءبىز دە بىرگە رەيدكە شىقتىق.
دارحان مەدەۋ اۋدانىنداعى №83-پوليسيالىق تىرەكتە ۋچاسكەلىك ينسپەكتور بولىپ 2016 جىلدان بەرى قىزمەت اتقارىپ كەلەدى. ول 2024 جىلى پوليسەيلەرگە ارنالعان بايقاۋدا جەڭىسكە جەتىپ، الماتى قالاسىنىڭ ەڭ ۇزدىك ۋچاسكەلىك ينسپەكتورى اتانعان. ودان بۇرىن 2023 جىلى «شىمبۇلاق» دەمالىس ايماعىندا تاۋدان قۇلاپ كەتكەن ادامدى قۇتقارىپ قالعانى ءۇشىن «ەرەن ەڭبەگى ءۇشىن» توسبەلگىسىن العان. جۇمىسىنا جاۋاپتى مامان ءوز سالاسىندا ابىرويلى قىزمەت اتقارىپ، بىرنەشە رەت ماراپات بيىگىنەن كورىنەدى. ونىڭ مىندەتى – وزىنە سەنىپ تاپسىرىلعان «مەدەۋ» مۇز ايدىنى، «شىمبۇلاق» تاۋ-شاڭعى كۋرورتى، ت.ب. وڭىرلەردە قوعامدىق ءتارتىپ پەن ازاماتتاردىڭ قاۋىپسىزدىگىن قورعاۋ.
«مەدەۋ اۋداندىق پوليسيا باسقارماسىندا جەتى ۋچاسكەلىك پۋنكت بار. ودان بولەك، مەدەۋ اۋداندىق پوليسيا باسقارماسىندا التى بولىمشە بار. جالپى اۋدان بويىنشا 13 پوليسيالىق تىرەك جۇمىس ىستەيدى. ءبىزدىڭ پوليسيالىق تىرەكتە مەنى قوسقاندا، ءتورت ينسپەكتور بار. قاۋىرت قىزمەت تاڭعى ساعات 08.00-دە باستالادى. ءار كۇنىمىز ءارتۇرلى وتەدى. ويتكەنى، ءبىز ەرتەڭ نە كۇتىپ تۇرعانىن، قانداي حابارلاما تۇسەتىنىن بىلمەيمىز. بۇگىن وتباسىلىق جانجالعا قاتىستى شاقىرتۋ بولسا، ەرتەسىنە باسقا ماسەلە تۋىندايدى. ءبىراق 24 ساعات بويى كەز كەلگەن جاعدايعا ساقاداي ساي بولىپ، ءتارتىپتى قاداعالايمىز»، – دەيدى دارحان وتانعازى ۇلى.
ينسپەكتورلاردىڭ باقىلاۋىنداعى اكىمشىلىك اۋماقتا ءقازىر قىسقى دەمالىس ماۋسىمى ءجۇرىپ جاتىر. الماتىنىڭ سيمۆولى سانالاتىن «مەدەۋ» مەن «شىمبۇلاقتا» تۇرعىنداردان بولەك، قالا قوناقتارى مەن شەتەلدىك تۋريستەردىڭ دە قاراسى كوپ. ال دەمالۋشىلاردىڭ كەز كەلگەنىنىڭ باسىنا ءىس تۇسسە، ومىرىنە ءقاۋىپ تونسە، ەڭ الدىمەن، كىمگە جۇگىنەدى؟!
«ءقازىر وسى ەكى دەمالىس ايماعىندا ادام وتە كوپ. سەبەبى دە تۇسىنىكتى. قازاقستاننىڭ قاي وڭىرىنەن بولسىن الماتىعا قىدىرىپ كەلگەن قوناقتار وسى جەرلەردى كورۋگە كەلەدى. باستى ماقساتىمىز – ازاماتتاردىڭ قاۋىپسىزدىگىنە جاۋاپ بەرۋ. اكىمشىلىك نەمەسە باسقا قۇقىقبۇزۋشىلىققا قاتىستى حابارلاما تۇسسە، بىردەن ارەكەتكە كوشەمىز. قوعامدىق كولىكتەر مەن ادامدار كوپ شوعىرلانعان ورىنداردا قالتا ۇرلىعى ءجيى بولادى. سوندىقتان ونىڭ الدىن الۋ ءۇشىن پروفيلاكتيكالىق ءىس-شارالار جۇرگىزىلەدى. ەسكەرتۋ جاساپ، حابارلاندىرۋ دىبىستارى مەن جازبالار جاريالايمىز».
وتباسىلىق-تۇرمىستىق جانجالدار
ازايعان
«تاڭعى ساعات 08:00-دەن باستاپ پوليسيا بولىمشەسىندە جينالىس وتەدى. وتكەن تاۋلىكتەگى جاعدايلاردى تالداپ، جاڭا تاپسىرمالار الامىز. اكىمشىلىك ايماقتاعى قىلمىستىق احۋالدى تەكسەرىپ، تۇسكەن ارىز-شاعىمداردى زەردەلەيمىز. جۇمىس كەشكى 21.00-گە دەيىن جالعاسادى. ەكى ۋچاسكەلىك ينسپەكتور بولىمشەدە قالسا، ەكەۋى شاقىرتۋ مەن تەكسەرىس بويىنشا جۇرەدى. بىزدە ءقازىر وتباسىلىق-تۇرمىستىق جانجالدار قاتاڭ باقىلاۋدا. وسى ماسەلەمەن تۇسكەن ارىز-شاعىمداردى كۇندەلىكتى قاراپ وتىرامىز. تۇرعىندارعا كومەك كەرەك بولعاندا ۋاقىتقا قاراماي، قىزمەت كورسەتۋگە تىرىسامىز. قىسقا ۋاقىتتىڭ ىشىندە قاراپ، ءتيىستى شەشىم شىعارۋىمىز كەرەك. اكىمشىلىك حاتتاما تولتىرىپ، ۋشىققان ىستەردى سوتقا جولدايمىز»، – دەدى ينسپەكتور.
دارحاننىڭ باقىلاۋىنداعى اكىمشىلىك اۋماقتا 3 مەكتەپ، 2 بالاباقشا، 35 كوپقاباتتى ءۇي، بىرنەشە جەر ءۇي جانە 13 مىڭعا جۋىق تۇرعىن بار. تاۋلى ايماق بولعاندىقتان، بۇل جاقتا جەر ۇيلەر كوپ. سونىمەن قاتار، «كامەنسكوە پلاتو»، «يۋبيلەينىي» ىقشاماۋداندارى مەن «كولساي»، «مۇزتاۋ» كەنتتەرىنىڭ تۇرعىندارىنا جاۋاپتى. اۋدان حالقىنىڭ كوبى وسى وڭىرلەردە تۇرادى.
كەيىپكەرىمىزدىڭ ايتۋىنشا، وتباسىنداعى زورلىق-زومبىلىققا قارسى زاڭ كۇشەيگەلى، جانۇياداعى ۇرىس-كەرىستەر ازايعان. بۇرىن ارىز-شاعىمدار كوپ بولسا، ءقازىر اپتاسىنا بىر-ەكى شاقىرتۋ عانا بولىپ تۇرادى.
«ۋچاسكەلىك ينسپەكتور پوليسيا ءبولىمىنىڭ قىزمەتىن ايعاقتايتىن №1095 بۇيرىق بار. سوعان سايكەس، حالىققا جاقىن بولىپ، ولارمەن تىعىز قارىم-قاتىناستا بولۋىمىز كەرەك. اكىمشىلىك اۋماقتاعى دۇكەندەردە، ۇيلەردىڭ كىرەبەرىسىندە ءبىزدىڭ سۋرەتتەرىمىز بەن دەرەكتەر، قاجەت بولعان جاعدايدا تۇرعىندار حابارلاسا الاتىن تەلەفون ءنومىرىمىز جازىلعان تاقتايشالار ورنالاسقان. ءار تۇرعىندى تانۋعا، ءار وتباسىنىڭ جاعدايىن بىلۋگە تىرىسامىز. حالىق ينسپەكتورلاردى ءبىرىنشى كەزەكتە كومەككە جۇگىنەتىن سەنىمدى تۇلعا رەتىندە قابىلدايدى عوي»، – دەيدى ول.
امبەباپ ماماندار
ءيا، ينسپەكتورلاردىڭ ادال قىزمەتى ارقىلى كوشەلەردە ءتارتىپ ساقتالادى، ازاماتتاردىڭ قاۋىپسىزدىگى قامتاماسىز ەتىلەدى. كورشىلەردىڭ ۇرىس-كەرىسى، ايقاي-شۋىنان باستاپ، كىسى ولىمىنە دەيىنگى اۋىر قىلمىستاردىڭ قاق ورتاسىندا جۇرەتىن ولار – امبەباپ ماماندار. سوندىقتان بۇل ماماندىق ۇلكەن جاۋاپكەرشىلىكتى، كاسىبيلىكتى جانە حالىققا دەگەن جاناشىرلىقتى تالاپ ەتەدى.
قوعام تىنىشتىعى ءۇشىن ەڭبەك ەتىپ جۇرگەن ۋچاسكەلىك ينسپەكتورلارعا قۇرمەت كورسەتۋ – ءار ازاماتتىڭ مىندەتى. بۇگىندە ءتارتىپتىڭ ساقشىلارىنىڭ مارتەبەسى قانداي؟ حالىق ءوز ينسپەكتورىن تاني ما؟
«كۇندەلىكتى اتقاراتىن جۇمىستارىمىزدان باسقا، بىزدە جىل سايىن «ءسىزدىڭ ۋچاسكەلىك پوليسەي» دەگەن رەسپۋبليكالىق ناۋقاندار ءوتىپ تۇرادى. حالىقتىڭ قۇقىق قورعاۋ ورگاندارىنا، ونىڭ ىشىندە بىزگە دەگەن سەنىمىن ارتتىرۋ ءۇشىن ەڭبەكتەنىپ ءجۇرمىز. مەنىڭشە، ابىرويمەن اتقارۋدامىز دەپ ويلايمىن. قىزمەتىم وزىمە ۇنايدى. توعىز جىلعا جۋىق تاجىريبەمدە تۇرعىندار مەنى، مەن ولاردى تانىپ ۇلگەردىك. اكىمشىلىك اۋماقتىڭ قاي جەرىندە قانداي جاعداي بولاتىنىن ساراپتاي الامىز. ماسەلەن، ىشكىش ادامداردىڭ ءجيى جۇرەتىن جولدارىن، كورشىلەرمەن، جانۇياسىمەن جانجالداردىڭ كوبى قاي ۇيدە بولاتىنىن بىلەمىز. وسىنداي شۋلى جاقتاردى ءجيى تەكسەرىپ تۇرامىز.
ءقازىر كوبى ءوزىنىڭ ۋچاسكەلىك ينسپەكتورلارىن جاقسى تانيدى، ولارعا سەنەدى. ماعان حالىقتىڭ اراسىندا جۇرگەن ۇنايدى. ءار سالانىڭ وزىنە ءتان قيىندىعى بولادى. ءبىزدىڭ جۇمىستىڭ دا اۋىرتپالىعى از ەمەس. قىزمەت بارىسىندا ءتۇرلى كەلەڭسىز وقيعالارعا كۋا بولاسىڭ، ءتىپتى كەيدە ءومىر مەن ءولىمنىڭ ارپالىسىنا تۇسەتىن كەزدەر دە بولادى. ءوزىڭىز كورگەندەي، نەشە ءتۇرلى ادامداردى تەكسەرەمىز. قىزىق تا، قيىن دا ىستەر بولادى. سول جاعدايلاردىڭ ءبارىنىڭ شەشىمىن تاۋىپ، ادامدارعا كومەكتەسە الساق، مەن ءۇشىن ودان اسقان قۇرمەت جوق»، – دەيدى دارحان.
«سيفرلى جۇيە
جۇمىسىمىزدى جەڭىلدەتە ءتۇستى»
قاراپايىم حالىقتىڭ قايناعان تىرشىلىگىنىڭ ورتاسىندا جۇرەتىندىكتەن، ولار ءۇشىن ءاربىر مينۋت قىمبات. سول ءۇشىن دە ءقازىر ەلىمىزدە پوليسيانىڭ ۇلتتىق سەرۆيستىك مودەلىنىڭ نەگىزگى تۇلعاسى – ينسپەكتورلاردىڭ جۇمىسىن جەڭىلدەتىپ، پوليسيا جۇمىسىنىڭ تيىمدىلىگىن ارتتىرۋ ماقساتىندا سيفرلىق جۇيەلەر بەلسەندى ەنگىزىلۋدە. جاڭا تەحنيكالار قىزمەتكەرلەردىڭ جۇمىسىن جەڭىلدەتە ءتۇستى. بۇرىنعىداي قاعاز بەن قالام الىپ، حاتتاما تولتىرۋ ازايعان. ونىڭ ءوزى 20-30 مينۋتتى الاتىن. ءقازىر ساۋساقتىڭ ۇشىمەن-اق پلانشەت ارقىلى قۇقىق بۇزۋشىلىقتى تىركەپ، بەينەكامەرالاردان اقپارات الىپ وتىر.
«2016 جىلى وسى قىزمەتكە العاش كەلگەن كەزىمدە ءبارىن قاعازعا جازاتىنبىز. حاتتاماعا ازاماتتىڭ ءتولقۇجات ءنومىرىن، جسن، ءاتى-جونى دەگەن وزگە دە قوسىمشا اقپاراتتاردى قولمەن تولتىرىپ كەلدىك. ءقازىر جۇمىسىمىز ەداۋىر جەڭىلدەپ، ۋاقىتتى ۇنەمدەدى. وسى پلانشەت ارقىلى ءوزىمنىڭ اۋماعىمدا نە بولىپ جاتقانىن «سەرگەك» بەينەباقىلاۋ جۇيەسىنەن كورىپ وتىرامىز. كامەرالار پوليسيا بولىمشەلەرىنە ناقتى ۋاقىت رەجيمىندە اقپارات جىبەرەدى. بۇل حالىققا دا ىڭعايلى ءارى اشىق جۇيە. ءبىز ءۇشىن وتە قولايلى. قۇقىقبۇزۋشىلىقتاردىڭ الدىن الۋ مۇمكىندىگىن ارتتىرادى»، – دەدى پوليسيا مايورى.
· رەيد قالاي ءوتتى؟
ۋچاسكەلىك پوليسەيلەر – دارحان سارييەۆ پەن بازاربەك جانىبەكۇلىمەن بىرگە الدىمەن كوشە قاڭعىباستارى پانالايتىن مەكەنگە باردىق. ينسپەكتورلاردىڭ ايتۋىنشا، ىشكىلىككە سالىنعان، قۇقىق بۇزۋعا بەيىم ازاماتتار وسى جەردە تۇرادى. جاقىن ماڭدا تۇراتىن تۇرعىندار اراققا سالىنعان قاڭعىباستارعا شاعىم تۇسىرەدى.
پوليسەيلەر كولىككە وتىرا سالا بىزگە رەيد بارىسىندا قىزىقتى ساتتەر دە بولاتىنىن ايتىپ، قانداي جۇمىستار اتقارىلاتىنىن ءتۇسىندىردى.
ارىز بەن شاعىمنىڭ اراسىندا جۇرەتىن ماماندار كەز كەلگەن جاعدايعا ەتى ۇيرەنگەن. تۇرعىندار ايتقان تۇيتكىلدەردى تارقاتۋ ءۇشىن تاڭ اتقاننان كەش باتقانعا دەيىن تىك تۇرىپ، قىزمەت ەتەدى. ولاردىڭ وسىلاي رەيدتەرگە شىعۋى – زاڭ بۇزۋشىلىقتىڭ الدىن الىپ، قوعامدىق ءتارتىپتى ساقتاۋعا سەپتىگىن تيگىزەدى.
بۇرىن قۇقىق بۇزعان نەمەسە باقىلاۋدا تۇرعان ازاماتتاردى تەكسەرۋدى جوسپارلايدى. كوشە كەزىپ، ەلدىڭ تىنىشتىعىن كۇزەتەدى.
كەلەسى باعىت – ازىق-تۇلىك دۇكەنى. ايماقتى ارالاپ ءجۇرىپ تاعى ءبىر وقيعاعا تاپ بولدىق. ءبىز بارعانىمىز سول ەدى، دۇكەننىڭ الدىندا قولىندا بوتەلكەسى بار، ماس ادامدى جولىقتىردىق. ينسپەكتورلار قوعامدىق ورىندا ماس كۇيدە ءجۇرىپ، ءتارتىپ بۇزعان ازاماتپەن جەكە سويلەستى. اكىمشىلىك شارا قولداندى.
«زاڭ بويىنشا قوعامدىق ورىندا سىرا نەمەسە باسقا الكوگول ىشكەن ازاماتقا ايىپپۇل سالىنادى. ق ر اكiمشiلiك قۇقىق بۇزۋشىلىق تۋرالى 440-بابىنا سايكەس، قوعامدىق ورىندا الكوگولدىك سۋسىن ىشكەن نەمەسە ماساڭ كۇيدە جۇرگەن بولسا، اكىمشىلىك جاۋاپكەرشىلىككە تارتامىز»، – دەيدى ينسپەكتور.
رەيدكە شىعاتىن ۋچاسكەلىك ينسپەكتورلار الدىمەن ءوز ۋچاسكەلەرى بويىنشا قۇقىقتىق احۋالدى تالدايدى. ولار قىلمىس ءجيى ورىن الاتىن اۋماقتاردى انىقتاپ، تۇرعىنداردان تۇسكەن شاعىمدار مەن ارىزداردى قارايدى. رەيد بارىسىندا قوعامدىق ورىنداردى باقىلاپ، دەمالىس ورىندارى تەكسەرىلەدى. قۇقىق بۇزعان ادامدارعا اكىمشىلىك شارا قولدانادى. تۇرعىندارمەن پروفيلاكتيكالىق اڭگىمە جۇرگىزۋ دە رەيد كەزىندە اتقارىلاتىن جۇمىستىڭ بولىگى.
ودان كەيىن وتباسىلىق-تۇرمىستىق قارىم-قاتىناستى بۇزعانى ءۇشىن اكىمشىلىك سوتتىڭ قاۋلىسىمەن ىشىمدىككە تىيىم سالىنعان تۇرعىننىڭ ۇيىنە باردىق. بۇل كىسى ىشكىلىككە قاتتى سالىنىپ، قالاداعى ناركولوگيالىق ديسپانسەردە ون ءتورت كۇن ەمدەلىپ شىققان.
«وسىنداي تۇرعىنداردى تۇرعىلىقتى جەرى بويىنشا كەلىپ، ماس نە ماس ەمەستىگىن تەكسەرەمىز. ەگەر ماس بولسا، ول سوت قاۋلىسىن بۇزعان بولىپ سانالادى. 669-باپتىڭ 2-بولىمىنە سايكەس قۇقىق بۇزۋشىنىڭ مىنەز-قۇلقىنا سوت بەلگىلەگەن ەرەكشە تالاپتاردى بۇزۋ بويىنشا سوتقا جولدايمىز. ون تاۋلىككە اكىمشىلىك قاماققا الىنادى. ءار اپتانىڭ جۇما كۇنى ءوزى كەلىپ تەكسەرىستەن ءوتۋى كەرەك نەمەسە رەيد كەزىندە ۇيىنە بارىپ تەكسەرە الامىز. ايەلىمەن سويلەسىپ، جولداسىنىڭ مىنەز-قۇلقى قانداي، قايتالاپ ءىشىپ جۇرگەن جوقپا، جانجال شىعارماي ما، انىقتايمىز».
زاڭ بۇزعان ازاماتتارعا ەسكەرتۋ جاساپ، كەيبىرىن اكىمشىلىك جاۋاپكەرشىلىككە تارتتى. وسىلايشا، تارتىپكە باعىنباعان تالايدى تاۋبەسىنە تۇسىرەدى. ۋچاسكەلىك ينسپەكتورلاردىڭ جۇمىسى وڭاي ەمەس. تالاي تاعدىرعا كۋا بولادى، ءتۇرلى ادامعا جولىعادى.
دارحان سارييەۆتىڭ اكىمشىلىك اۋماعىندا ەسەپتە تۇرعان، شارتتى تۇردە بوساعان جيىرماعا جۋىق ادام بار. ونىڭ ىشىندە، تۇرمىستىق قارىم-قاتىناستى بۇزعانى بويىنشا ەسەپكە الىنعاندار دا بار. رەيد كەزىندە پروفيلاكتيكالىق ەسەپتە تۇرعاندار دا تەكسەرىلدى.
«شارتتى مەرزىمىنەن بۇرىن بوساعان ادامداردى ون كۇن سايىن تەكسەرىپ تۇرامىز. №1095 بۇيرىق بويىنشا ولار ايىنا ءۇش رەت تەكسەرىلۋى كەرەك. ودان بولەك، اڭشى قارۋ يەلەرى دە ەرەكشە باقىلاۋدا بولادى. قارۋ ساقتاۋ ەرەجەسىن ەسكەرۋ كەرەك. شەت ەل ازاماتتارىن تۇرعىلىقتى مەكەنجايى بويىنشا تەكسەرىپ تۇرۋ دا ءبىزدىڭ مىندەتىمىزگە كىرەدى».
«فورماڭدى شەش، پوگونىڭا سەنىپ تۇرسىڭ با؟»
وسىلاي دەپ قارسىلىق كورسەتىپ، توبەلەسكە شاقىراتىن ادامدار دا بولادى دەيدى پوليسەي. ءبارى بىردەي وڭايلىقپەن زاڭ مەن تارتىپكە باعىنعىسى كەلمەيدى. ءبىرى «ماس ەمەسپىن» دەپ اقتالىپ باقسا، ەندى ءبىرى ءتارتىپ ساقشىلارىنا بالاعات ءسوز ايتىپ، قول كوتەرۋگە دەيىن بارادى.
«ونداي جاعدايلار كوپ بولادى. كوبىنە قۇجاتتارىن كورسەتپەي، ءاتى-جونىن ايتپاي، زاڭدى تالاپتارىمىزعا باعىنۋدان باس تارتادى. زاڭ الدىندا ادامنىڭ ءبارى بىردەي بولعاندىقتان، تالاپتارىمىزعا باعىنباعاندارعا 667-باپ (قۇقىق قورعاۋ ورگانى قىزمەتكەرىنىڭ زاڭدى وكىمىنە نەمەسە تالابىنا باعىنباۋ) بويىنشا اكىمشىلىك جاۋاپكەرشىلىككە تارتامىز»، – دەدى ءتارتىپ ساقشىسى.
ارىز-شاعىم تۇسسە، وقيعا ورنىنان ءبىرىنشى ۋچاسكەلىك ينسپەكتورلار تابىلادى. ماسەلەنى قاراپ، شەشۋ جولدارىن ىزدەيدى. ءبىز بۇگىن سونىڭ بىرنەشەۋىنە كۋا بولدىق. تۇرعىنداردىڭ مازاسىن العان ماسكۇنەمدەردى ۇستاپ، ءتيىستى شارا قولداندى. رەيد سوڭىندا ينسپەكتورلار جينالعان اقپاراتتى تالداپ، قۇقىق بۇزۋشىلىقتار بويىنشا ەسەپ دايىندايدى. قاجەت بولعان جاعدايدا، كۇدىكتى ازاماتتاردى پوليسيا بولىمشەسىنە جەتكىزەدى.
P.S
مىنە، قۇرمەتتى وقىرمان! ءبىز بۇگىن ۋچاسكەلىك ينسپەكتورلاردىڭ ءبىر كۇنىمەن عانا تانىستىق. شىنىمەن دە، بارلىعى ءبىز ويلاعانداي وڭاي جۇمىس ەمەس ەكەن. حالىقپەن سويلەسە ءبىلۋى، ءارتۇرلى جاعدايدا جەدەل شەشىم شىعارا الۋى وتە ماڭىزدى ەكەنىن تۇسىندىك. ينسپەكتور بولۋ ءۇشىن شىدامدىلىق پەن تاباندىلىق قاجەت. وسىنداي ساقشىلار باردا تۇرعىندار قاۋىپسىزدىگى ءارقاشان نازاردا دەپ توپشىلادىق.