2025 جىلعى 20 اقپان مەن 2 ناۋرىز ارالىعىندا الماتى قالاسىندا ورنالاسقان ADD ارەنا سپورت كەشەنىندە (نۇركەنت شاعىن اۋدانى، 14ب) قازاقستان رەسپۋبليكاسىنىڭ جاسوسپىرىمدەر مەن جاستار اراسىنداعى U17 جانە U20 ساناتىنداعى گرەك-ريم، ەركىن جانە ايەلدەر كۇرەسى بويىنشا چەمپيونات وتەدى، دەپ حابارلايدى aqshamnews.kz
اتالعان بىرىنشىلىككە ەلىمىزدىڭ 17 وبلىسىنان، سونداي-اق استانا، الماتى جانە شىمكەنت قالالارىنان ەڭ ۇزدىك جاس بالۋاندار قاتىسادى. ولار قازاقستان چەمپيونى اتاعى ءۇشىن جانە بيىلعى كۇنتىزبەلىك جىلعا جوسپارلانعان حالىقارالىق جارىستاردا – ازيا جانە الەم چەمپيوناتتارىندا ۇلتتىق قۇراما ساپىندا ەل نامىسىن قورعاۋ مۇمكىندىگى ءۇشىن كۇرەسەدى.
20 اقپاندا ساعات 16:30-دا U17 جانە U20 جاس ساناتتارىنداعى گرەك-ريم، ەركىن جانە ايەلدەر كۇرەسى بويىنشا قازاقستان رەسپۋبليكاسىنىڭ چەمپيوناتىنىڭ سالتاناتتى اشىلۋ ءراسىمى وتەدى. بۇل شاراعا ەلىمىزدىڭ داڭقتى بالۋاندارى – وليمپيادا ويىندارىنىڭ جۇلدەگەرلەرى، الەم جانە ازيا چەمپيوندارى قاتىسىپ، كۇرەس سپورتىنىڭ ءۇش ءستيلىنىڭ دامۋىنا قوسقان ۇلەستەرىن اتاپ وتەدى.
ءتۋرنيردىڭ ماڭىزدىلىعى جايلى الماتى قالاسىنىڭ كۇرەس فەدەراسياسىنىڭ پرەزيدەنتى ومار الييەۆ:
"قازاقستان رەسپۋبليكاسىنىڭ گرەك-ريم، ەركىن جانە ايەلدەر كۇرەسى فەدەراسياسىنىڭ باسشىلىعىنا وسىنداي اۋقىمدى جارىستى وتكىزۋگە سەنىم ءبىلدىرىپ، الماتىدا ۇيىمداستىرۋ مۇمكىندىگىن بەرگەنى ءۇشىن العىسىمدى بىلدىرەمىن. بۇل جارىس – ەلىمىزدەگى رەسمي جارىستار كۇنتىزبەسىنىڭ اشىلۋى ىسپەتتەس. سونىمەن قاتار، الماتى قالاسىنىڭ سپورت باسقارماسىنا ءتۋرنيردى ۇيىمداستىرۋداعى قولداۋى ءۇشىن ەرەكشە العىس ايتقىم كەلەدى. الماتىدا كۇرەس سپورتىن دامىتۋدا وڭ وزگەرىستەر بولدى، بۇل چەمپيونات جاس بالۋاندارىمىزعا ءوز شەبەرلىكتەرىن جوعارى دەڭگەيدە كورسەتۋگە تاماشا مۇمكىندىك بەرەدى."