ءار قازاقتىڭ ءۇي شارۋاسى ءۇشىن تاپتىرماس قۇرالىنا اينالعان كىر سابىندى راسىمەن كوپشىلىك ءتۇرلى جاعدايلار ءۇشىن پايدالانادى. كەز كەلگەن قازاقتىڭ ۇيىنەن تابىلاتىن ءدال سول سابىندى قاراپايىم اۋىل وتباسى وندىرەدى دەسەم سەنەر مە ەدىڭىز؟ اqshamnews.kz ءتىلشىسى الماتىعا جاقىن اۋىلدا قولدان سابىن جاساپ، كاسىبىن دوڭگەلەتىپ وتىرعان قازاق وتباسىمەن تىلدەسىپ قايتتى.
كاسىپ قالاي باستالدى؟
قاسەن مەن اينۇر تۋندەبايەۆتار - الماتى وبلىسى، بەساعاش اۋىلىنىڭ تۇرعىندارى. اينۇر حانىم مەكتەپتە قاراپايىم اسپاز بولىپ قىزمەت اتقارادى. ال قاسەن اعا - تەمىردەن ءتۇيىن تۇيگەن دانەكەرلەۋشى شەبەر. ولار بىلتىردان بەرى ءوز اۋىلىندا كىر سابىن ءوندىرىپ كاسىپ قىلىپ وتىر.
"وسىدان ءبىر جىل بۇرىن جولداسىم كىر سابىن جاساپ، ساتىپ كورەيىك دەپ ۇسىنىس تاستادى. ول كىسى ءوزى سونداي ەڭبەكقور ادام. جازدىگۇندەرى دانەكەرلەۋمەن اينالىسسا، قىستا بوس جاتقىسى كەلمەيدى. سولايشا وسى كاسىپتى باستاپ كورەيىك دەدى. شىنى كەرەك، باسىندا سەنبەگەن ەدىم. "قالاي جاسايمىز؟"، "كىم الادى؟" دەگەن سۇراقتار بولدى. ءبىراق كەيىن تاۋەكەل ەتىپ، سابىن جاساۋدىڭ قۇپياسىن وقىپ، جولداسىم ءوزى اپپاراتتار ساتىپ الىپ، باستاپ كەتتىك"، - دەيدى اينۇر تۋندەبايەۆا.
ءقازىر قاراپايىم اۋىل جانۇياسىنىڭ ونىمىنە سۇرانىس تا، قىزىعۋشىلىق تا ارتىپ كەلەدى. اينۇر حانىمنىڭ ايتۋىنشا، ونىڭ كىر سابىنىنىڭ ەرەكشەلىگى ساپاسىندا ەكەن.
توڭماي قالاي كىر سابىنعا اينالادى؟
اينۇر حانىم "ەرەكشە ساپاداعى" كىر سابىننىڭ نەدەن، قالاي جاسالاتىنىن اڭگىمەلەپ بەردى. ونىڭ جۇيەلى تۇردە جاسالاتىن قۇپيا قۇرامى دا بار ەكەن.
"ەڭ ءبىرىنشى كادىمگى مالدىڭ ءىشمايىن الىپ قازاندا قايناتامىز. قايناتىلعان مايدى بوشكەگە قۇيىپ، ءتۇرلى حيميكاتتار ارالاستىرىپ، حوش يىستەندىرىپ كەسۋگە دايىندايمىز. ارتىنشا اپپاراتقا سالىپ، ونى قالىپقا كەلتىرەمىز. كەپكەنىن كۇتەمىز دە، ارى قاراي قوراپتارعا سالىپ جيناي بەرەمىز"، - دەيدى ول.
اينۇر تۋندەبايەۆانىڭ سوزىنشە، كوپشىلىك سابىندى قانداي مايدان جاسايتىنىن سۇرايتىن كورىنەدى.
"مەنەن كوبى "نەنىڭ مايىنان جاسايسىزدار، شوشقا ەمەس پە؟" دەپ سۇرايدى. ءبىز مۇسىلمانبىز. ەشقانداي دا شوشقا ەمەس، كادىمگى سيىردىڭ، قويدىڭ توڭمايىنان وسىنداي دۇنيە شىعارىپ وتىرمىز"، - دەيدى كاسىپ يەسى.
Nakoni، Bakoni: سابىندار نەگە ەرەكشە اتالعان؟
اينۇر حانىم حوش ءيىستى كىر سابىندارعا Nakoni، Bakoni دەگەن اتاۋ بەرگەن. ول ونى ەگىز ۇلدارى نۇرداۋلەت پەن باقداۋلەتتىڭ ەسىمدەرىمەن اتاعان.
"بۇل ءونىم بولعاندىقتان وعان اتاۋ بەرۋ كەرەك بولدى. باسىندا اعىلشىنشا soap-سابىن دەپ قويعانبىز. كەيىن ءبىر تۋىسىمىز اعىلشىنشا ەمەس، قازاقشا قويساڭدارشى دەگەن سوڭ، ۇلدارىمنىڭ ەسىمىمەن اتادىم. نۇرداۋلەتتى ناكوني، باقداۋلەتتى باكوني دەپ ەركەلەتەمىز. قازىرگى كاسىپ تە سول ۇلدارىمنىڭ نەسىبەسى" ، - دەيدى اينۇر تۋندەبايەۆا.
ەكى ءتۇرلى اتاۋمەن شىعاتىن Nakoni مەن Bakoni بىر-بىرىنەن قۇرامى بويىنشا ءسال عانا وزگەشە. بىرەۋى جۇپار ءيىستى بولسا، ەندى ءبىرى تازا تۇرمىستىق شارۋاعا ارنالعان.
"ءبىز ءوزىمىز وسى كىر سابىندى بارىنە پايدالانامىز. شومىلساڭ دا، باس جۋساڭ دا، ىدىس تازالاساڭ دا ايناداي قىلىپ بەرەدى. ءوزىمىز ساپاسىنا كەپىلدىك بەرگەندىكتەن عانا ساۋدالاپ وتىرمىز"، - دەيدى كاسىپ يەسى.
"كەلەشەكتە ۇلكەن سەحقا اينالساق دەيمىز..."
اۋىل كاسىپكەرلەرى كەلەشەكتە ءوز ءوندىرىسىن ۇلعايتۋدى جوسپارلاپ وتىر. ءقازىر قولمەن جاسالىپ جاتقان كىر سابىن ءوندىرىسىن جۇيەلى جولعا قويۋ ءۇشىن ارنايى سەح اشۋ جوسپاردا بار.
"بولاشاقتا وسى كاسىبىمىزدى ۇلكەن سەحقا اينالدىرعىمىز كەلەدى. ءقازىردىڭ وزىندە سۇرانىس كوبەيىپ كەلەدى، تۇراقتى كليەنتتەرىمىز بار. ەگەر كەڭىرەك عيمارات بولسا، قوسىمشا ادامداردى دا جۇمىسقا الىپ، ءونىم تۇرلەرىن كوبەيتۋدى كوزدەپ وتىرمىز. بۇل – مەنىڭ عانا ەمەس، وتباسىمنىڭ ورتاق ەڭبەگى مەن ارمانى"، – دەيدى اينۇر تۋندەبايەۆا.
