الماتى قالالىق پەريناتالدىق ورتالىعىندا ۇشەم ءسابي ومىرگە كەلدى، دەپ حابارلايدى aqshamnews.kz
39 جاستاعى الماتىلىق ايەل بىردەن التى بالانىڭ اناسى اتاندى: بۇعان دەيىن وتباسىندا ءۇش بالا بولعان، ەندى مىنە كەلىنشەك ءتورتىنشى رەت بوسانىپ وتىر.
قوعامدىق دەنساۋلىق ساقتاۋ باسقارماسىنىڭ مالىمەتىنشە، جۇكتىلىك تابيعي جولمەن، قوسالقى رەپرودۋكتيۆتى تەحنولوگيا قولدانىلماي-اق جۇزەگە اسقان. مۇنداي جاعداي اكۋشەرلىك تاجىريبەدە سيرەك كەزدەسەدى.
بوسانۋ جۇكتىلىكتىڭ 32 اپتا 2 كۇنىندە شۇعىل تۇردە كەسار تىلىگى ارقىلى ءوتتى. تۇنگى ساعات ءۇش شاماسىندا اكۋشەر-گينەكولوگتار، انەستەزيولوگتار جانە نەوناتولوگتاردان قۇرالعان كوپسالالى مەديسينالىق كوماندا جەدەل تۇردە جۇمىلدىرىلدى.
سالماعى 1840 گرامم، بويى 42 سم ۇل بالا؛ سالماعى 1680 گرامم، بويى 43 سم تاعى ءبىر ۇل بالا؛ سالماعى 1620 گرامم، بويى 40 سم قىز بالا دۇنيەگە كەلدى. ۇل بالالارعا زاڭعار مەن ايبار، قىز بالاعا اسەل دەگەن ەسىم قويىلدى.
ورتالىق ديرەكتورىنىڭ ۇيىمداستىرۋ-ادىستەمەلىك جۇمىس جونىندەگى ورىنباسارى سالتانات ەربۋلاتوۆانىڭ ايتۋىنشا، مەديسينالىق ۇجىمنىڭ ۇيلەسىمدى ءارى كاسىبي جۇمىسىنىڭ ارقاسىندا بوسانۋ اسقىنۋسىز ءوتتى. شالا تۋعان سابيلەر ءومىرىنىڭ العاشقى مينۋتىنان باستاپ قارقىندى باقىلاۋعا الىنىپ، ارنايى ەم قابىلدادى جانە اپپارات ارقىلى تىنىس الۋعا قولداۋ كورسەتىلدى.
ۇشەمگە جەكە كۇتىم بەكەتى ءبولىنىپ، سابيلەر تاۋلىك بويى دارىگەرلەردىڭ باقىلاۋىندا. قازىرگى تاڭدا بالالار سالماق قوسىپ كەلەدى، جاعدايى تۇراقتى دەپ باعالانىپ وتىر، الداعى ۋاقىتتا اۋرۋحانادان شىعارۋعا دايىندالۋدا.
وتكەن جىلى ورتالىقتا 22،5 مىڭنان استام ناۋقاس قابىلدانىپ، 16،7 مىڭنان اسا انا مەن جاڭا تۋعان نارەستەگە ستاسيونارلىق كومەك كورسەتىلدى. جالپى، 9014 بوسانۋ تىركەلدى، ونىڭ ىشىندە ەكى رەت ۇشەم دۇنيەگە كەلگەن. قالاداعى مەرزىمىنەن بۇرىن بوسانۋ جاعدايىندا مەديسينالىق كومەكتىڭ باسىم بولىگى ءدال وسى ورتالىقتا كورسەتىلەدى.