ءىىم، باس پروكۋراتۋرا، قما جانە ۇقك-نىڭ بىرلەسكەن بۇيرىعىمەن ءۇيقاماق تۇرىندەگى بۇلتارتپاۋ شاراسىن ورىنداۋ قاعيدالارىنا وزگەرىستەر ەنگىزىلدى، دەپ حابارلايدى aqshamnews.kz
ءۇيقاماق – قىلمىستىق ءىس جۇرگىزۋ كودەكسىنىڭ 147-بابىندا كوزدەلگەن نەگىزدەر مەن تارتىپكە سايكەس، كۇدىكتىنى، ايىپتالۋشىنى نەمەسە سوتتالۋشىنى قاماۋدا ۇستاماي-اق، ءبىراق سۋديا (سوت) بەلگىلەگەن شەكتەۋلەردى قولدانۋ ارقىلى قوعامنان وقشاۋلاۋ شاراسى بولىپ تابىلادى.
اتاپ ايتقاندا، كۇدىكتىنىڭ، ايىپتالۋشىنىڭ نەمەسە سوتتالۋشىنىڭ مىنەز-قۇلقىنا تىكەلەي باقىلاۋ جۇرگىزۋ جۇكتەلگەن قۇرىلىمدىق بولىمشە قىزمەتكەرىنىڭ مىندەتتەرى ناقتىلاندى.
ول:
تاڭدالعان بۇلتارتپاۋ شاراسىنىڭ ءمانىن، سونداي-اق تەرگەۋ سۋدياسىنىڭ (سوتتىڭ) قاۋلىسىندا كورسەتىلگەن شەكتەۋلەر مەن مىندەتتەردى تۇسىندىرەدى. كۇدىكتىگە (ايىپتالۋشىعا، سوتتالۋشىعا) قاتىستى بۇلتارتپاۋ شاراسىن تاڭداۋ تۋرالى تەرگەۋ سۋدياسىنىڭ (سوتتىڭ) قاۋلىسى جاريالانعانى جانە ونىڭ كوشىرمەسى تاپسىرىلعانى جونىندە حاتتاما جاسايدى. بۇل حاتتاما تەرگەۋشىگە، انىقتاۋشىعا، پروكۋرورعا نەمەسە ەگەر بۇلتارتپاۋ شاراسى سوت تالقىلاۋى كەزىندە قولدانىلسا، سوتقا جولدانادى. حاتتامانىڭ كوشىرمەسى باقىلاۋ-قاداعالاۋ ىسىنە قوسا تىركەلەدى.
سونداي-اق قۇرىلىمدىق بولىمشە قىزمەتكەرى كۇدىكتىنى، ايىپتالۋشىنى نەمەسە سوتتالۋشىنى تومەندەگى مىندەتتەر تۋرالى جازباشا تۇردە ەسكەرتەدى، ياعني ول:
قىلمىستىق پروسەستى جۇرگىزىپ وتىرعان ورگاننىڭ رۇقساتىمەن نەمەسە شۇعىل جاعدايلار مەن توتەنشە جاعدايلارعا بايلانىستى تۇرعىن ۇيدەن تولىقتاي نەمەسە بەلگىلى ءبىر ۋاقىتتا شىعۋ نيەتى تۋرالى؛
سوت تىيىم سالعان بەلگىلى ءبىر تۇلعالارمەن بايلانىس جاساۋ نەمەسە قىلمىستىق پروسەستى جۇرگىزەتىن ورگاننىڭ رۇقساتىمەن ءوز ۇيىنە قانداي دا ءبىر ادامداردى قابىلداۋ تۋرالى (ونىمەن بىرگە تۇراتىن وتباسى مۇشەلەرىمەن، قورعاۋشىمەن بايلانىس جانە قىجك-نىڭ 146-بابىنىڭ ءۇشىنشى بولىگىندە كوزدەلگەن وزگە جاعدايلاردان باسقا)؛
قىلمىستىق پروسەستى جۇرگىزەتىن ورگاننىڭ رۇقساتىمەن تەلەفون ارقىلى سويلەسۋ جانە حات-حابار جىبەرۋ تۋرالى (قىجك-نىڭ 146-بابى ەكىنشى بولىگىنىڭ 5-تارماعىندا جانە ءۇشىنشى بولىگىندە كوزدەلگەن جاعدايلاردى قوسپاعاندا)؛
بايلانىس قۇرالدارىن پايدالانۋدىڭ ءاربىر فاكتىسى تۋرالى كەزەكشى بولىمگە جانە ونىڭ مىنەز-قۇلقىنا تىكەلەي باقىلاۋ جۇرگىزىپ وتىرعان قۇرىلىمدىق بولىمشە قىزمەتكەرىنە حابارلاۋعا مىندەتتى.
سونىمەن قاتار قىزمەتكەر:
جۇكتەلگەن شەكتەۋلەر ورىندالماعان جاعدايدا، قىجك-نىڭ 153-بابىنا سايكەس پروكۋرور، تەرگەۋشى (انىقتاۋشى) پروكۋرورمەن كەلىسۋ ارقىلى بۇلتارتپاۋ شاراسىن قاماۋدا ۇستاۋعا اۋىستىرۋ نەمەسە قوسىمشا مىندەتتەر جۇكتەۋ تۋرالى تەرگەۋ سۋدياسىنا (سوتقا) ءوتىنىشحات بەرۋگە قۇقىلى ەكەنىن تۇسىندىرەدى.
بۇيرىق 2026 جىلعى 14 اقپاننان باستاپ قولدانىسقا ەنگىزىلەدى.