قاي قوعامنىڭ بولسىن شىن مانىندەگى قۋاتى ونىڭ ەكونوميكاسىمەن نەمەسە تەحنولوگيالىق جەتىستىگىمەن عانا ولشەنبەيدى. ۇلتتىڭ ناعىز بەرىكتىگى – رۋحاني تۇتاستىعىندا. ال سول رۋحاني تۇتاستىقتى قالىپتاستىراتىن، ۇرپاق ساناسىنا ءۇنسىز سىڭەتىن ەڭ پارمەندى قۇرالداردىڭ ءبىرى – مۋزىكا.
مۋزىكاسىز تاربيە – قانشا جەردەن ءبىلىمدى بولعانىمەن، جانى جۇتاڭ ۇرپاق قالىپتاستىرۋعا الىپ كەلەتىنى بۇگىن ايقىن سەزىلە باستادى. عىلىم مەن جاڭا تەحنولوگيادا الەمگە ۇلگى بولىپ وتىرعان جاپونيا بۇل اقيقاتتى الدەقاشان تۇسىنگەن. سوندىقتان دا كۇنشىعىس ەلىنىڭ جالپى ءبىلىم بەرەتىن مەكتەپتەرىندە مۋزىكا ءپانى قوسىمشا تاڭداۋ ەمەس، مىندەتتى باعدارلاما سانالادى. ءاربىر بالا ەڭ كەمى ءبىر مۋزىكالىق اسپاپتا ويناۋدى مەڭگەرۋگە ءتيىس. بۇل – رومانتيكا ءۇشىن ەمەس، بولاشاق قوعامنىڭ پسيحولوگيالىق جانە رۋحاني ساۋلىعىن قامتاماسىز ەتۋ ءۇشىن جاسالعان سانالى شەشىم.
جاپون ماماندارىنىڭ پايىمىنشا، مۋزىكالىق اسپاپتا ويناۋ بالانى تارتىپكە، شىدامدىلىققا، ءوز-وزىن باقىلاۋعا باۋليدى. اۋەندى ءدال كەلتىرىپ ورىنداۋ ءۇشىن بالا ءوز سەزىمىن دە، ويىن دا ءبىر ارناعا توعىستىرۋى كەرەك. بۇل – كەز كەلگەن كۇيزەلىس پەن سترەسس جاعدايىنا قارسى تۇرا الاتىن ىشكى تۇراقتىلىقتىڭ نەگىزى. ءتىپتى مۋزىكا بالا جاندۇنيەسىندەگى بايقالمايتىن پسيحولوگيالىق جاراقاتتاردى جۇمسارتىپ، جان تەپە-تەڭدىگىن قالپىنا كەلتىرۋگە قابىلەتتى ەكەنى دە عىلىمي تۇرعىدا دالەلدەنىپ وتىر.
ال ءبىز مۋزىكانى ءالى كۇنگە دەيىن «قوسىمشا ءپان»، «ەرمەك» رەتىندە قابىلدايمىز. بالانىڭ جانىنا ەمەس، تەك كۇندەلىگىنە ۇڭىلەمىز. باعاسى جوعارى بولسا – جاقسى وقۋشى، ەسەپتى تەز شىعارسا – قابىلەتتى بالا دەپ تانيمىز. ءبىراق سول بالانىڭ نە تىڭدايتىنىن، نەنى سەزىنەتىنىن، سۇلۋلىقتى اجىراتا الا ما، جوق پا – وعان كەلگەندە ءۇنسىز قالامىز. سەزىم مەن تالعام قالىپتاسپاي قالعان جەردە رۋحاني بوس كەڭىستىك پايدا بولاتىنىن ەسكەرە بەرمەيمىز.
بۇرىن بۇل ماسەلە بىزدە مۇلدە باسقاشا شەشىلگەنى ءمالىم. مەكتەپتەگى حور، وركەستر، ونەر بايقاۋلارى تەك مەرەكەلىك شارا ءۇشىن ۇيىمداستىرىلمايتىن. ول – تاربيەنىڭ ءبىر تارماعى بولاتىن. بىرگە ءان ايتقان، ءبىر ساحنادا ونەر كورسەتكەن بالا ءوز ورتاسىنان وقشاۋلانبايدى، تۇيىق بولمايدى. ول كوپشىلىكپەن ساناسا ءبىلۋدى، وزگەنى تىڭداۋدى، ءبىر ىرعاققا باعىنۋدى ۇيرەنەدى. بۇل – ادامدى قوعامعا بەيىمدەيتىن ەڭ تابيعي مەكتەپ.
سول ءۇردىستىڭ ءۇزىلىپ قالۋى بۇگىندە ءوز سالدارىن كورسەتىپ وتىر. مۋزىكا ءپانى باستاۋىش سىنىپتان ءارى اسپايدى، ۇيىرمەلەر جۇيەلى ەمەس، ال ونەرمەن شۇعىلدانۋ اتا-انانىڭ مۇمكىندىگىنە عانا تاۋەلدى. ناتيجەسىندە بۇگىنگى جاس ۇرپاق قۇرمانعازى مەن تاتتىمبەتتىڭ، اقان سەرى مەن ءبىرجان سالدىڭ كىم ەكەنىن بىلمەي ءوسىپ كەلەدى. ءتىپتى بەرتىندەگى ءشامشى قالداياقوۆ پەن نۇرعيسا تىلەندييەۆتىڭ مۇراسىنان بەيحابار بالالار كوبەيىپ بارادى. بۇل – تەك ءبىلىم ولقىلىعى ەمەس، ۇلتتىق جادىنىڭ السىرەۋى.
ۇلتتىق يدەيانى قاعاز جۇزىندەگى باعدارلامامەن نەمەسە ۇرانمەن قالىپتاستىرۋ مۇمكىن ەمەس. ۇلتتى ساقتايتىن كۇش – مادەنيەت. ال مادەنيەت سۇلۋلىقتى سەزىنە بىلۋدەن باستالادى. سۇلۋلىقتى تانىماعان ادام وزگەنىڭ داڭعازا دۇنيەسىنە وڭاي ەلىكتەيدى، ءوز بولمىسىنان تەز اجىرايدى. مۋزىكادان قول ۇزگەن ۇرپاقتىڭ رۋحاني يممۋنيتەتى ءالسىز بولادى. مۇنداي قوعام سىرتقى ىقپالعا دا، ىشكى كۇيزەلىسكە دە توتەپ بەرە المايدى.
وسى تۇرعىدان العاندا، جاپونداردىڭ «ماتەماتيكا لوگيكانى دامىتسا، مۋزىكا ادامدى تولىق قالىپتاستىرادى» دەگەن ءسوزى تەرەڭ مانگە يە. مۋزىكا – تەك ونەر ساباعى ەمەس، ول – ۇلتتىڭ جۇيكەسىن، مىنەزىن، تالعامىن قالىپتاستىراتىن تىرەك. ول – قوعامدى ىشتەن ىرىتپەيتىن، كەرىسىنشە بىرىكتىرەتىن كۇش.
قورىتا ايتقاندا، مۋزىكا ماسەلەسىنە جەڭىل قاراۋدى دوعاراتىن كەز كەلدى. مۋزىكانى مەكتەپتەن ىسىرىپ قويۋ – ءبىر پاننەن باس تارتۋ ەمەس، ۇلتتىڭ رۋحاني قورعانىن السىرەتۋ. ەگەر ءبىز ەرتەڭ ويلايتىن، سەزىنەتىن، مادەنيەتى بيىك، ءوز بولمىسىن تانيتىن ۇرپاق كورگىمىز كەلسە، مۋزىكالىق تاربيەنى ءبىلىم جۇيەسىنىڭ شەتىنە ەمەس، وزەگىنە اينالدىرۋىمىز كەرەك. ويتكەنى مۋزىكا – ءپان ەمەس. ول – ۇلتتىڭ يممۋنيتەتى.