8 اقپان كۇنى الماتى ۋاقىتىمەن ساعات 14:00-دە رەسەيدىڭ «پەرۆىي كانال» تەلەارناسىنان الماتىدا تۇسىرىلگەن تانىمال «پوۆارا نا كولەساح» گاسترونوميالىق رەاليتي-شوۋىنىڭ جاڭا شىعارىلىمى ەفيرگە شىعادى، دەپ حابارلايدى aqshamnews.kz
ءتۇسىرىلىم 2025 جىلى 2-5 قازان ارالىعىندا ءوتتى. بىرنەشە كۇن بويى ماسكەۋدەن كەلگەن تانىمال باس اسپازدار قالانىڭ گاسترونوميالىق مادەنيەتىمەن، تاريحىمەن جانە ەرەكشە اتموسفەراسىمەن تانىسىپ، سونداي-اق الماتىنىڭ كورنەكتى ورىندارىن ارالادى. باعدارلاماعا AUYL ۇلتتىق تاعامدار مەيرامحاناسى، الما-اراسان كۋرورتتىق ايماعى، جۇرگىنشىلەرگە ارنالعان اربات كوشەسى جانە Gorilla Energy Paaark ەندى. بايقاۋ تاعامدارىنا قاجەتتى ونىمدەردى جوبا قاتىسۋشىلارى كوك بازاردان ساتىپ العان.
جوبا فورماتىنا سايكەس، تانىمال باس-اسپازدار ءارتۇرلى قالالاردى ارالاپ، جەرگىلىكتى اسحانا مەن ءداستۇردى زەرتتەيدى. كەيىن اۆتورلىق تاعامدار ازىرلەپ، اسپازدىق سايىس ۇيىمداستىرادى. جەڭىمپازدى قالا تۇرعىندارى انىقتايدى.
ءتۇسىرىلىم توبىنا Almaty Tourism Bureau كومانداسى ۇيىمداستىرۋشىلىق قولداۋ كورسەتتى. سونداي-اق، تۇسىرىلىمگە AUYL مەيرامحاناسىنىڭ قازاقستاندىق باس اسپازى اڭسات بيسەنبايەۆ قاتىسىپ، ۇلتتىق اسحانا مەن جەرگىلىكتى ونىمدەردىڭ ەرەكشەلىگىن تانىستىردى.