جەتىستىك – كەزدەيسوق كەلەتىن نارسە ەمەس. ول كۇن سايىن قايتالاناتىن ارەكەتتەردەن، قالىپتاسقان ادەتتەردەن تۇرادى. تابىستى ادامداردى وزگەلەردەن ەرەكشەلەندىرەتىن دە – ءدال وسى ۇساق كورىنەتىن، ءبىراق تۇراقتى ورىندالاتىن ادەتتەر. ءبىراق كوپ ادام جەڭىل جول ىزدەيدى، تەزىرەك ناتيجەگ جەتكىسى كەلەدى. مىسالى، سپورتپەن شۇعىلدانىپ، دۇرىس تاماقتانعاننان گورى «سيقىرلى تابلەتكا» ءىشىپ ارىقتاۋدى قالايدى. نەمەسە ۇزاق ەمدەلگەنشە، بىردەن جازىلىپ كەتۋدى ارماندايدى. الايدا ومىردە ءبارى بۇلاي وڭاي بولا قالمايدى. مۇنى تابىستى ءارى باي ادامدار جاقسى تۇسىنەدى. ولار «سيقىرلى تاياقتىڭ» جوق ەكەنىن، جەتىستىككە اپاراتىن قاراپايىم ءارى تۇراقتى ادەتتەر ەكەنىن بىلەدى.
جايلى ورىننان جىلجۋ
«وزىڭىزدە جوق نارسەگە قول جەتكىزگىڭىز كەلسە، بۇرىن ىستەمەگەن نارسەنى ىستەۋدى باستاڭىز» دەگەن ءسوزدى ريچارد باحقا تەليدى. ايتۋ وڭاي، ىستەۋ قيىن. سەبەبى كەز كەلگەن قۇشتارلىق ادامدى جىلى ورنىنان جىلجۋعا ءماجبۇر ەتەدى. ەڭ ءقاۋىپتىسى – جايلى ورىن دەگەن كەيدە كەدەيلىك تە بولۋى مۇمكىن. زەرتتەۋلەرگە سۇيەنسەك، ادامداردىڭ 80%-ى تابىسىنا كوڭىلى تولماسا دا، ونى ارتتىرۋعا ارەكەت جاسامايدى. ولار ءومىر سالتىن تابىسىنا بەيىمدەيدى: از ساياحاتتايدى، ارزان كيىم كيەدى، ساپاسىز تاماقتانادى. ەگەر تەك ۇيرەنشىكتى، ىڭعايلى نارسەلەردى عانا ىستەي بەرسەڭىز، سول دەڭگەيدە قالىپ قوياسىز. سوندىقتان ءوزىڭىزدى جايلىلىق ورىننان جىلجۋعا ۇيرەتۋ وتە ماڭىزدى.
بۇل ءۇشىن نە ىستەۋ كەرەك؟
جايلى ورىندا وتىرعانىڭدى مويىنداۋ
ول ورىننان جىلجۋدىڭ ناتيجە اكەلەتىنىن ءتۇسىنۋ
ەرىك-جىگەردى شىڭداۋ
جاڭا، دامۋعا يتەرمەلەيتىن ماقسات قويۋ
تاڭەرتەڭ ەرتە تۇرۋ
تابىستى ادامداردىڭ كوپشىلىگى تاڭعى 5–6 ارالىعىندا ويانادى. بۇل ولارعا اسىقپاي جينالىپ، كۇندى جوسپارلاۋعا، سپورتپەن اينالىسۋعا مۇمكىندىك بەرەدى. ولار جۇمىسقا سەرگەك كەلەدى.
مىسالى:
• Disney كومپانياسىنىڭ باسشىسى روبەرت ايگەر – 4:30-دا تۇرادى
• Apple CEO تيم كۋك – تاڭعى 5-تە سپورتزالعا بارادى
• كوپتەگەن اقش پرەزيدەنتتەرى دە ەرتە تۇرعان
ال كوپ ادام جۇمىسقا ارەڭ ۇلگەرىپ، ۇيىقتاپ قالىپ جۇرەدى، بۇل جۇمىس كۇننىڭ ونىمدىلىگىنە كەسىرىن تيگىزەدى.
ەرتە ۇيىقتاۋ
تابىستى ادامدار ءتۇن ورتاسىنا دەيىن تەلەديدار قاراپ وتىرمايدى. زەرتتەۋلەرگە سايكەس، باي ادامداردىڭ 67%-ى تەلەديداردى مۇلدە كورمەيدى. بۇل ولاردىڭ ەرتە جاتىپ، ەرتە تۇرۋىنا مۇمكىندىك بەرەدى. ەگەر سەريال كورىپ نەمەسە تەلەفونعا ءۇڭىلىپ ءتۇن جارىمعا دەيىن وتىرساڭىز، ەرتە تۇرۋ مۇمكىن ەمەس.
سپورتپەن اينالىسۋ
«ۋاقىت جوق» – ەڭ ءجيى ايتىلاتىن سىلتاۋ. ءبىراق جۇمىس كەستەسى تىعىز ادامداردىڭ ءوزى سپورتقا ۋاقىت تابادى.
مىسالى:
• مادوننا – جەكە يوگا نۇسقاۋشىمەن جۇرەدى
• كوپتەگەن انشىلەر گاسترول كەزىندە دە جاتتىعۋ جاسايدى
كىتاپ وقۋ جانە ءبىلىم الۋ
زەرتتەۋلەرگە سايكەس، تابىستى ادامداردىڭ 88%-ى كۇن سايىن كەمىندە 30 مينۋت كىتاپ وقيدى. ولار سەمينارلارعا، كۋرستارعا، كونفەرەنسيالارعا اقشاسىن ايامايدى. سەبەبى ولار ەڭ ءتيىمدى ينۆەستيسيا – وزىڭە سالىنعان ينۆەستيسيا ەكەنىن جاقسى بىلەدى.
ۋاقىتتى جوسپارلاۋ
تابىستى ادامدار كۇنىن، اپتاسىن، ءتىپتى جىلىن الدىن الا جوسپارلايدى. تايم-مەنەدجمەنتسىز قارقىندى ءومىر سالتىن باسقارۋ مۇمكىن ەمەس. قاعاز كۇندەلىككە جازاسىز با، ءموبيلدى قوسىمشا قولداناسىز با، ماڭىزدى ەمەس. ەڭ باستىسى، ۋاقىتتى باقىلاۋ. جوسپارلاي باستاعاندا، ۋاقىتتىڭ كوبەيگەنىن بايقايسىز.
ماقسات قويۋ
ءار ءىستىڭ ناقتى ماقساتى بولۋى كەرەك. ۇلكەن ماقساتتى كىشى، ناقتى تاپسىرمالارعا ءبولىڭىز.
دۇرىس قويىلعان ماقسات مىنا كريتەرييلەرگە ساي كەلۋى ءتيىس:
• ولشەمى بار
• قولجەتىمدى
• مەرزىمى بەلگىلى
• ناقتى جانە وزگەرمەيتىن
• كەزەڭ-كەزەڭىمەن ورىندالاتىن