ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءقاۋىپسىز ەڭبەك جاعدايلارىن جەتىلدىرۋ جانە جۇمىسكەرلەردىڭ ەڭبەك قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا ماقۇلداندى، دەپ حابارلايدى aqshamnews.kz
زاڭ جوباسى 2025 جىلعى 19 قازاندا ءماجىلىستىڭ جالپى وتىرىسىندا ءبىرىنشى وقىلىمدا ماقۇلدانعان.
زاڭ جوباسى جۇمىسكەرلەردىڭ ەڭبەك قۇقىقتارىن قورعاۋ سالاسىنداعى ۇلتتىق زاڭنامانى جەتىلدىرۋ ماقساتىندا ازىرلەنگەن جانە ەڭبەكتى قورعاۋدى باسقارۋ جۇيەسىنىڭ تيىمدىلىگىن ارتتىرۋعا باعىتتالعان.
زاڭ جوباسىندا جۇمىسكەرلەرگە ديەتالىق جانە ەمدىك-پروفيلاكتيكالىق تاماقتانۋعا ارنالعان ونىمدەردى بەرۋ ءتارتىبىن بەكىتۋ بولىگىندە ەڭبەك جونىندەگى ۋاكىلەتتى مەملەكەتتىك ورگاننىڭ قۇزىرەتىن كەڭەيتۋ؛ ۇجىمدىق شارتتاردا ءتيىستى كاسىپ نەمەسە ۇيىمداعى لاۋازىم بويىنشا جالاقىنىڭ ەڭ جوعارى جانە ەڭ تومەنگى مولشەرى اراسىنداعى جول بەرىلەتىن اراقاتىناستى بەلگىلەۋ؛ كەلىسۋ كوميسسياسىنىڭ جۇمىسىنا دەلدال تارتۋ مۇمكىندىگىن ەنگىزۋ؛ ەڭبەك قىزمەتىنىڭ كەمىندە ءبىر بەلگىسى بولعان جاعدايدا جەكە تۇلعامەن ازاماتتىق-قۇقىقتىق سيپاتتاعى شارت جاساسۋعا تىيىم سالۋ نورمالارى كوزدەلگەن.
سونىمەن قاتار، «حالىق دەنساۋلىعى جانە دەنساۋلىق ساقتاۋ جۇيەسى تۋرالى» قازاقستان رەسپۋبليكاسىنىڭ كودەكسىنە وندىرىستىك جاراقاتتىڭ اۋىرلىق دارەجەسىن ايقىنداۋ قاعيدالارىن بەكىتۋگە قاتىستى ۋاكىلەتتىكتەر ەنگىزىلەدى.
زاڭ جوباسىن تالقىلاۋ بارىسىندا دەپۋتاتتار تاراپىنان ءبىرقاتار تۇزەتۋلەر قابىلداندى، اتاپ ايتقاندا ۇجىمدىق شارتتارعا ەڭبەك قىزمەتىنە بايلانىستى جازاتايىم وقيعالار جاعدايىندا جاردەماقىلار مەن وتەماقىلار تولەۋ ءتارتىبىن كوزدەيتىن نورمالار ەنگىزىلدى؛ ەڭبەك قاۋىپسىزدىگى جانە ەڭبەكتى قورعاۋ جونىندەگى ماماننىڭ ۇيىمنىڭ ءبىرىنشى باسشىسىنا تىكەلەي باعىنىستىلىعى بەلگىلەنىپ، ءقاۋىپسىز ەڭبەك جاعدايلارىن قامتاماسىز ەتۋ جاۋاپكەرشىلىگى ۇيىم باسشىسىنا جۇكتەلەتىنى ناقتى ايقىندالدى.
بۇدان بولەك، قازاقستان رەسپۋبليكاسى ۇكىمەتىنىڭ باستاماسىمەن زاڭ جوباسى شەڭبەرىندە: «رۇقساتتار مەن حابارلامالار تۋرالى» قازاقستان رەسپۋبليكاسىنىڭ زاڭىنا الەۋمەتتىك قورعاۋ سالاسىندا ارناۋلى الەۋمەتتىك قىزمەتتەر كورسەتۋ جونىندەگى قىزمەتتى ليسەنزيالاۋ ماسەلەلەرى بويىنشا وزگەرىستەر ەنگىزۋ؛ «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-وزى باسقارۋ تۋرالى» قازاقستان رەسپۋبليكاسىنىڭ زاڭىنا ماسليحاتتاردىڭ قۇزىرەتىن كەڭەيتۋ، ونىڭ ىشىندە ۋاكىلەتتى ورگان بەكىتەتىن ۇلگىلىك قاعيدالار نەگىزىندە «وبلىستىڭ (قالانىڭ، اۋداننىڭ) قۇرمەتتى ازاماتى» اتاعىن بەرۋ قاعيدالارىن ازىرلەۋ جانە بەكىتۋ ماسەلەلەرىن قوسۋ؛ ەرەۋىلدەر كەزىندە توقتاتىلۋعا جاتپايتىن ءوندىرىس تۇرلەرىن ناقتىلاۋ كوزدەلەدى.
اكەنىڭ دەكرەتتەگى ۋاقىتى ەڭبەك وتىلىنە ەسەپتەلەدى
سونىمەن قاتار، قازاقستان رەسپۋبليكاسى كونستيتۋسيالىق سوتىنىڭ نورماتيۆتىك قاۋلىسىن ىسكە اسىرۋ ماقساتىندا الەۋمەتتىك كودەكسكە جاسىنا بايلانىستى زەينەتاقى تولەمدەرىن تاعايىنداۋ كەزىندە جۇمىس ىستەمەيتىن اكەنىڭ جاس بالالاردى كۇتۋ ۋاقىتى ەڭبەك وتىلىنە ەسەپتەلۋىنە قاتىستى ناقتىلاۋلار ەنگىزىلدى.
ودان بولەك، دەپۋتاتتار زاڭ تەحنيكاسىنىڭ تالاپتارىنا سايكەستەندىرۋ جانە زاڭ جوباسىنىڭ مازمۇنىن ساپالى جەتىلدىرۋ ماقساتىندا رەداكسيالىق سيپاتتاعى تۇزەتۋلەر ەنگىزدى.
سونىمەن قاتار، جاسىنا بايلانىستى زەينەتاقى تولەمدەرىن تاعايىنداۋ كەزىندە جۇمىس ىستەمەيتىن اكەنىڭ جاس بالالاردى كۇتۋ ۋاقىتى ەڭبەك وتىلىنە ەسەپتەلەتىن بولادى. زاڭعا سايكەس، قازاقستاندا ءبىر ۇيىم شەڭبەرىندە ءبىر كاسىپ بويىنشا جۇمىسكەرشىلاردىڭ ەڭ جوعارى جانە ەڭ تومەنگى جالاقى مولشەرلەرى اراسىنداعى جول بەرىلەتىن اراقاتىناس بەلگىلەنەدى. سونداي-اق ەڭبەك قاتىناستارىنىڭ كەمىندە ءبىر بەلگىسى بولعان جاعدايدا جەكە تۇلعامەن ازاماتتىق-قۇقىقتىق سيپاتتاعى شارتتار جاساسۋعا تىيىم سالىنادى.
زاڭ ماجىلىستە قابىلدانىپ، سەناتتىڭ قاراۋىنا جىبەرىلدى.